រាជធានីភ្នំពេញ ៖ ជនសង្ស័យ២នាក់ ត្រូវកម្លាំងប្រជាការពារ រួមជាមួយកម្លាំងកងរាជអាវុធហត្ថខណ្ឌចុះអន្តរាគមន៍ដេញចាប់ឃាត់ខ្លួនភ្លាមៗ បន្ទាប់ពីពួកគេឆក់ទូរស័ព្ទពីស្ត្រីម្នាក់សម្រេចនៅចំណុចក្រោមស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីម៉ោង៧និង៣០នាទីព្រឹក ថ្ងៃទី២៧…
រាជធានីភ្នំពេញ ៖ ជនសង្ស័យ២នាក់ ត្រូវកម្លាំងប្រជាការពារ រួមជាមួយកម្លាំងកងរាជអាវុធហត្ថខណ្ឌចុះអន្តរាគមន៍ដេញចាប់ឃាត់ខ្លួនភ្លាមៗ បន្ទាប់ពីពួកគេឆក់ទូរស័ព្ទពីស្ត្រីម្នាក់សម្រេចនៅចំណុចក្រោមស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីម៉ោង៧និង៣០នាទីព្រឹក ថ្ងៃទី២៧ ខែកញ្ញា ឆ្នាំ២០១៨នេះ ។
ជនសង្ស័យទាំង២នាក់ខាងលើម្នាក់ឈ្មោះ សាទ ចាន់ដារ៉ូ ភេទប្រុស អាយុ២០ឆ្នាំ និងម្នាក់ទៀតឈ្មោះ សិន ស៊ីអិក ភេទប្រុស អាយុ២០ឆ្នាំ ពួកគេទាំង២នាក់មានមុខរបរជាអ្នកក្រឡឹកដូចគ្នា និងមានស្នាក់នៅរួមគ្នានៅផ្ទះលេខ២៣៧ សង្កាត់ទឹកល្អក់១ ខណ្ឌទួលគោក ព្រមទាំងមានស្រុកកំណើតភូមិបាលី ឃុំជើងខ្នារ ស្រុកកំពង់ឆ្នាំង ខេត្តកំពង់ឆ្នាំង ។ ចំណែកស្ត្រីរងគ្រោះឈ្មោះ ពេជ្រ ចាន់ណារី អាយុ៣៦ឆ្នាំ មុខរបរគ្រូបង្រៀន ស្នាក់នៅភូមិម័ល សង្កាត់ដង្កោ ខណ្ឌដង្កោ ។
ប្រភពព័ត៌មានឱ្យដឹងថា មុនកើតហេតុស្ត្រីរងគ្រោះកំពុងជិះម៉ូតូតែម្នាក់ឯង ពេលនោះនាងជិះបណ្តើរកាន់ទូរស័ព្ទនិយាយបណ្តើរ លុះជិតមកដល់ចំណុចកើតហេតុ ស្រាប់តែជនសង្ស័យ២នាក់ជិះម៉ូតូមួយគ្រឿងម៉ាកស្គុបពី ពណ៌ស ស៊េរីឆ្នាំ២០១៨ ពាក់ស្លាកលេខភ្នំពេញ 1HC-5723 មកពីក្រោយ ហើយក៏ឆក់យកទូរស័ព្ទពីជនរងគ្រោះម៉ាក IPhone 7Plus តែម្តង ។
ប្រភពដដែលបន្តថា ពេលឆក់បានហើយនោះ ជនសង្ស័យទាំង២នាក់ព្យាយាមជិះម៉ូតូរត់គេច តែត្រូវស្ត្រីរងគ្រោះជិះម៉ូតូដេញតាមពីក្រោយ និងស្រែកថា «ចោរៗ» រហូត ។ លុះដេញដល់មុខវត្តស្ទឹងមានជ័យ ដោយសារផ្លូវត្រូវកកស្ទះជនសង្ស័យទាំង២នាក់ បង្ខំចិត្តជិះម៉ូតូចូលទៅក្នុងសាលាបឋមសិក្សាស្ទឹងមានជ័យ ហើយត្រូវកម្លាំងកងរាជអាវុធហត្ថ និងកម្លាំងប្រជាការពារកំពុងឈរប្រចាំការនៅទីនោះនាំគ្នាព័ទ្ធចាប់ឃាត់បានភ្លាមៗតែម្តងទៅ ។
ក្រោយពេលឃាត់ខ្លួនពួកគេត្រូវបានបញ្ជូនខ្លួនទៅកាន់ ទីបញ្ជាការដ្ឋានកងរាជអាវុធហត្ថខណ្ឌមានជ័យ ដើម្បីសាកសួរនាំ និងបន្តនីតិវិធីច្បាប់ ។ ចំណែកទូរស័ព្ទដៃដែលជនសង្ស័យឆក់ នោះ គឺត្រូវប្រគល់ជូនស្ត្រីជាម្ចាស់ដើមវិញផងដែរ ៕
ចែករំលែកព័តមាននេះ