មនុស្សមានហេតុផលជាអ្នកដឹងហេតុដឹងផល រមែងសម្លឹងមើលហេតុផលដោយជុំវិញ និងដោយសព្វគ្រប់។ មិនមែនត្រឹមតែយល់ដឹងនូវហេតុផលផ្ទាល់ខ្លួនប៉ុណ្ណោះទេ ទោះហេតុផលរបស់អ្នកដទៃក៏ដោយ ក៏គេត្រូវដឹងបានតាមការពិតផងដែរ ។ មនុស្សមានហេតុ ផលរមែងព្រមទទួលនូវការចាំបាច់របស់អ្នកដទៃ ដែលគេត្រូវធ្វើជាចាំបាច់ ។
មនុស្សម្នាក់ៗមានការចាំបាច់ក្នុងជីវិតមិនដូចគ្នាទេ ហើយច្រើនតែ ព្រមចុះចាញ់ចំពោះការចាំបាច់របស់ខ្លួនឯងនោះទៀតផង ។ ការចាំបាច់បានចាប់បង្ខំឱ្យមនុស្សត្រូវតែធ្វើយ៉ាងនេះ ធ្វើយ៉ាងនោះ ដើម្បីដោះស្រាយ ឬកែខៃបញ្ហារកផ្លូវចេញពីភាពទាល់ច្រកសិន ។
នៅក្នុងសេចក្តីនេះ មនុស្សអ្នកមានហេតុផលរមែងមិនអាងដល់ការចាំបាច់ ហើយប្រព្រឹត្តធ្វើនូវអំពើឆ្គាំឆ្គងនោះឡើយ ព្រោះបើចេះតែអាងដល់ការចាំបាច់ ហើយធ្វើនូវអំពើអាក្រក់អញ្ចឹង អ្នកណាក៏អាងបានគ្រប់គ្នា និងអាចអាងទៅគ្រប់រឿងទៀតផង ។ ហេតុដូចនេះគួរអ្នកមានហេតុផលព្យាយាម អំណត់ តស៊ូរកវិធីដោះស្រាយតាមផ្លូវល្អដោយសុទ្ធចិត្ត ។
ចែករំលែកព័តមាននេះ