ខេត្តសៀមរាប ៖ ស្ត្រីចំណាស់ម្នាក់បានមកដេកចាំវេនកាន់បិណ្ឌ ជាមួយក្រុមគ្រួសារនៅបរិវេនរោងបាយវត្ត បានគាំងបេះដូងស្លាប់ភ្លាមៗនៅហ្នឹងកន្លែងកើតហេតុ បង្កឱ្យមានការភ្ញាក់ផ្អើលពេញរោងបាយវត្ត នេះបើតាមសម្តីរបស់សមត្ថកិច្ចស្រុកពួក។
ហេតុការណ៍នេះបានកើតឡើងនៅចន្លោះវេលាម៉ោង១២យប់ដល់ម៉ោង៤ទៀបភ្លឺចូលថ្ងៃទី២៦ ខែកញ្ញា ឆ្នាំ២០១៨ ស្ថិតនៅចំណុចរោងបាយ វត្តស្វាយដង្គំរង្សី ហៅវត្តថ្មី ក្នុងភូមិគោកដូង ឃុំពួក ស្រុកពួក ខេត្តសៀមរាប ។
ជនរងគ្រោះដែលស្លាប់ខាងលើឈ្មោះ ពេជ្រ សន ភេទស្រី អាយុ៦២ឆ្នាំ មុខរបរធ្វើស្រែ រស់នៅភូមិគោកដូង ឃុំពួក ស្រុកពួក ខេត្តសៀមរាប ។
លោកបានបញ្ជាក់ថា ជនរងគ្រោះបានមកដេកជាមួយក្រុមគ្រួសារ នៅក្នុងបរិវេនរោងបាយវត្ត ដើម្បីចាំវេនកាន់បិណ្ឌ ខណៈជនរងគ្រោះធ្លាប់មានជម្ងឺប្រចាំកាយជាយូរឆ្នាំមកហើយ ក៏គាំងបេះដូងស្លាប់ភ្លាមៗនៅនឹងកន្លែង ដោយពុំមាននរណាម្នាក់ដឹងសោះ ។ បើមានអ្នកដឹង ហើយជួយធ្វើចលនា ប្រហែលជាគាត់មិនស្លាប់ភ្លាមៗបែបនេះនោះទេ។
លោកបានបញ្ជាក់បន្ថែមទៀតថា បើតាមការបំភ្លឺរបស់ឈ្មោះ ពេជ្រ សឿត ភេទស្រី អាយុ៦៨ឆ្នាំ ត្រូវជាបងស្រីបង្កើតរបស់ស្ត្រីរងគ្រោះ និងឈ្មោះ ប៉ែន អ៊ុន ភេទប្រុស អាយុ៦២ឆ្នាំ ត្រូវជាប្តីរបស់ស្ត្រីរងគ្រោះបានអះអាងថា ស្ត្រីរងគ្រោះធ្លាប់មានជំងឺខ្សោយបេះដូងរ៉ាំរ៉ៃ តែងតែមានអាការៈឈឺណែនដើមទ្រូងជាញឹកញាប់ ហើយការស្លាប់នេះគឺដោយសារជំងឺខ្លួនឯងពិតប្រាកដមែន មិនមានពាក់ព័ន្ធនិងបទល្មើសព្រហ្មទណ្ឌនោះទេ។
បើតាមលោកវរសេនីយ៍ឯក ទេព ពុំសែន អធិការស្រុកពួកបានប្រាប់តាមទូរស័ព្ទនៅល្ងាចថ្ងៃទី២៦ខែកញ្ញាឆ្នាំ២០១៨ ឱ្យដឹងថា ក្រោយពីពេលទទួលបានសេចក្តីរាយការណ៍ពាក់ព័ន្ធករណីខាងលើភ្លាម កម្លាំងនគរ
បាលជំនាញបានចុះទៅដល់កន្លែងកើតហេតុ និងពិនិត្យសពជនរងគ្រោះ ពុំឃើញមានស្លាកស្នាមអ្វីពាក់ព័ន្ធ នឹងបទល្មើសព្រហ្មទណ្ឌនោះទេ។
បន្ទាប់ពីពិនិត្យរួច កម្លាំងជំនាញរបស់អធិការស្រុកពួកបានប្រគល់សពជួនក្រុមគ្រួសារដើម្បីយកទៅធ្វើបុណ្យទៅតាមប្រពៃណី ៕
ចែករំលែកព័តមាននេះ