រាជធានីភ្នំពេញ ៖ នគរបាលប៉ុស្តិ៍ត្រពាំងក្រសាំងបានចាប់ខ្លួនបុរសម្នាក់ ក្រោយពេលគេចខ្លួនបាន១១ថ្ងៃ បន្ទាប់ពីចាប់ស្ត្រីម្នាក់ ដែលមានប្តីហើយនៅក្បែរគ្នារំលោភ ។ ហេតុការណ៍ចាប់រំលោភនេះ បានកើតឡើង កាលពីថ្ងៃទី១៤…
រាជធានីភ្នំពេញ ៖ នគរបាលប៉ុស្តិ៍ត្រពាំងក្រសាំងបានចាប់ខ្លួនបុរសម្នាក់ ក្រោយពេលគេចខ្លួនបាន១១ថ្ងៃ បន្ទាប់ពីចាប់ស្ត្រីម្នាក់ ដែលមានប្តីហើយនៅក្បែរគ្នារំលោភ ។ ហេតុការណ៍ចាប់រំលោភនេះ បានកើតឡើង
កាលពីថ្ងៃទី១៤ កញ្ញា កន្លងទៅ វេលាម៉ោង៨និង៣០នាទីយប់ នៅបន្ទប់ទឹកដែលប្រើរួមគ្នាជិតបន្ទប់ផ្ទះជួល ស្ថិតក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ ។ លុះមកដល់ថ្ងៃទី២៥ ខែកញ្ញា គឺ១១ថ្ងៃក្រោយមក ទើបជនសង្ស័យខាងលើត្រូវនគរបាលចាប់ខ្លួនបាន នាំយកទៅសាកសួរនិងកសាងសំណុំរឿងចាត់ការតាមច្បាប់ ។
បុរសម្នាក់នេះឈ្មោះ យាត រ៉ែម ហៅជេម អាយុ៣៥ឆ្នាំ ជាកម្មកររោងចក្រ ស្នាក់នៅបន្ទប់ជួលក្នុងឃុំខាងលើ ចំណែកស្ត្រីរងគ្រោះអាយុ២៣ឆ្នាំ ជាកម្មការិនីរោងចក្រកាត់ដេរ ស្នាក់នៅបន្ទប់ជួលក្បែរគ្នា ។ស្ត្រីរងគ្រោះបានឲ្យដឹងថា នៅថ្ងៃកើតហេតុវេលាម៉ោង៨យប់ ក្រោយពេលចេញពីធ្វើការមកដល់បន្ទប់ជួលវិញ នាងបានដាំបាយ និងលាងចានឆ្នាំងរួចរាល់អស់ ទើបផ្លាស់សម្លៀកបំពាក់ ។ បន្ទាប់មក នាងស្លៀកសារុងចោមពុងរួចដើរទៅបន្ទប់ទឹក ដែលប្រើរួមគ្នា។
ខណៈនោះស្រាប់តែបុរសខាងលើ ដែលកំពុងស្ថិតនៅក្នុងបន្ទប់ទឹកនោះស្រាប់ ស្ទុះមកដាល់នាងមួយដៃចំក្បាលពោះបណ្តាលឱ្យចុកឆ្អល់ ។ ប្រភពដដែលបន្តថា បន្ទាប់មក ជននេះបានខ្ទប់មាត់នាងមិនឲ្យស្រែក រួចធ្វើសកម្មភាពរំលោភរហូតបានសម្រេច និងគំរាមថា «បើហ៊ាននិយាយរឿងនេះប្រាប់គេ ខ្លួននឹងតាមសម្លាប់ចោល» ។ ក្រោយពីរំលោភនិងគំរាមនាងរួចជននេះក៏គេចខ្លួនទៅបន្ទប់ជួលបាត់ទៅ លុះព្រឹកឡើងថ្ងៃទី១៥ ខែកញ្ញា ស្រាប់តែគេចខ្លួនទៅស្រុកបាត់ ។
ចំណែករូបនាងបានប្រាប់ប្ដីនិងប្ដឹងនគរបាលឲ្យជួយអន្តរាគមន៍ ហើយរហូតដល់ថ្ងៃទី២៥ ខែកញ្ញា ទើបជននេះត្រឡប់មកវិញ និងត្រូវនគរបាលប៉ុស្តិ៍ត្រពាំងក្រសាំងចាប់ខ្លួនតែម្តង ។ បន្ទាប់មក នគរបាលបាននាំខ្លួនជននេះទៅសាកសួរ និងកសាងសំណុំរឿងបញ្ចូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ