រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា សម្រាប់ការចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៣ នៅបុរីញូវយ៉ក លើកនេះជាកិច្ចការតំបន់ និងអន្តរជាតិដែលកំពុងវិវត្តន៍តាន់តឹង…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ថា សម្រាប់ការចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៣ នៅបុរីញូវយ៉ក លើកនេះជាកិច្ចការតំបន់ និងអន្តរជាតិដែលកំពុងវិវត្តន៍តាន់តឹង និងស្មុគស្មាញ ។
សម្តេចតេជោបានសរសេរលើកបណ្តាញសង្គម នៅថ្ងៃទី២៧ ខែកញ្ញា ខណៈដែលសម្តេចតេជោកំពុងជិះយន្តហោះ ដើម្បីចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៣ រយៈពេល៤ថ្ងៃ ។ សម្តេចបានសរសេរថា ខ្មែរស្ទើរគ្រប់គ្នាស្គាល់បទដ៏ពេញនិយមមួយដែលមានចំណងជើងថា លាទៅបម្រើជាតិ ។ តែសម័យនោះ គឺទៅច្បាំងដោយប្រដាប់អាវុធសុទ្ធសាធយកជីវិតជាដើមទុនមករំដោះជាតិ យកដើមទ្រូងមកពាំងគ្រាប់ ដើម្បីការពារជាតិ ។
សម្តេចបញ្ជាក់ថា «ខ្ញុំធ្លាប់ស្គាល់រស់ជាតិនេះច្បាស់ជាងគេ អញ្ចឹងហើយខ្ញុំមិនចង់ឱ្យកូនខ្មែរជំនាន់ក្រោយត្រូវទទួលភ្លក់រសជាតិនេះទៀតឡើយ ។ ថ្ងៃនេះខ្ញុំសូមលាទៅបម្រើជាតិជាថ្មីម្តងទៀត ដោយប្រើនយោបាយការទូត នៅលើឆាកអន្តរជាតិ» ។ សម្តេចគូសបញ្ជាក់ថា «កម្ពុជា មិនអាចឱ្យគេបង្ខូចជាន់ឈ្លី ទោះបីក្នុងរូបភាពណាមួយក៏ដោយ ។ ខ្ញុំចេញទៅលើកនេះក៏នឹងចូលរួមផងដែរ នូវការងារជាកិច្ចការតំបន់ និងអន្តរជាតិដែលកំពុងវិវត្តន៍យ៉ាងតានតឹង និងស្មុគស្មាញ» ។ ជាមួយគ្នានោះដែរសម្តេចក៏បានលើកឡើងថា ចំពោះជនរួមជាតិដែលគាំទ្រខ្ញុំ និងគាំទ្រកម្ពុជានៅក្រៅប្រទេសខ្ញុំនឹងទៅជួបបងប្អូនក្នុងពេលដ៏ខ្លីខាងមុខ ។ យើងនឹងអាច សន្ទនាផ្លាស់ប្ដូរសេចក្តីនឹករឮកជាមួយគ្នាខ្ញុំនឹងអាចរាយការណ៍ជូនពីសភាពការណ៍ទូទៅការវិវឌ្ឍ និងការអភិវឌ្ឍនានាលើមាតុភូមិកម្ពុជានាពេលបច្ចុប្បន្ន ។
សម្តេចក៏បានលើកឡើងទៀតថា ចំពោះជនរួមជាតិនៅក្រៅប្រទេសដែលមិនចូលចិត្តខ្ញុំក៏សូមចែកឱ្យដាច់នូវអ្វីជាផលប្រយោជន៍មុខមាត់ ហ៊ុន សែន ពីអ្វីជាមុខមាត់ និងផលប្រយោជន៍ជាតិខ្មែរទាំងមូលដោយសម្បជញ្ញៈវិចារណញ្ញាណ និងមនសិការផ្ទាល់រៀងៗខ្លួនទៅចុះ ។ សម្តេចក៏បានឲ្យដឹងថា សម្តេចត្រូវស្ថិតនៅលើយន្តហោះជាង១៧ម៉ោង ក្នុងដំណើរផ្លូវពីភ្នំពេញទៅកាន់ញូវយ៉ក ។ សង្ឃឹមថា នឹងបានសម្រាកលក់លើយន្តហោះបន្ទាប់ពីហត់នឿយនៃ ការងារក្នុងប្រទេស ។
សូមជម្រាបថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានដឹកនាំគណៈប្រតិភូជាន់ខ្ពស់ទៅចូលរួមកិច្ចប្រជុំទូទៅលើកទី៧៣ នៃមហាសន្និ បាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងទៀតរយៈពេល៤ថ្ងៃចាប់ពីថ្ងៃទី២៧ ដល់៣០ ខែកញ្ញា នៅទីក្រុងញូវយ៉ក សហរដ្ឋអាមេរិក ៕
ចែករំលែកព័តមាននេះ