ខេត្តព្រៃវែង ៖ កាលពីរសៀលថ្ងៃទី២៦ កញ្ញាម្សិលមិញនេះអាជ្ញាធរខេត្តព្រៃវែងបានកោះអញ្ជើញក្រុមអាជីវករផ្សារអ្នកលឿងប្រមាណជាង៥០នាក់ មកធ្វើការប្រជុំនៅក្នុងបរិវេណវត្តសន្សំកុសល ក្នុងឃុំព្រែកខ្សាយ (ខ) ស្រុកពាមរក៌ ដើម្បីពិភាក្សារកច្រកចេញរឿងជួសជុលផ្សារអ្នកលឿងវិញ ។…
ខេត្តព្រៃវែង ៖ កាលពីរសៀលថ្ងៃទី២៦ កញ្ញាម្សិលមិញនេះអាជ្ញាធរខេត្តព្រៃវែងបានកោះអញ្ជើញក្រុមអាជីវករផ្សារអ្នកលឿងប្រមាណជាង៥០នាក់ មកធ្វើការប្រជុំនៅក្នុងបរិវេណវត្តសន្សំកុសល ក្នុងឃុំព្រែកខ្សាយ (ខ) ស្រុកពាមរក៌ ដើម្បីពិភាក្សារកច្រកចេញរឿងជួសជុលផ្សារអ្នកលឿងវិញ ។
លោកជុំ ជា មេឃុំព្រែកខ្សាយ(ខ)បានឲ្យដឹងថា បច្ចុប្បន្នផ្សារអ្នកលឿងនេះមានសភាពចាស់ទ្រុឌទ្រោមបន្តិចហើយ ដោយដំបូលផ្សារធ្លុះធ្លាយ និងមានទឹកលិចស្រក់ជាច្រើនកន្លែងទ្វារជុំវិញផ្សារក៏គាំងខូចអស់មួយចំនួន ជាពិសេសប្រព័ន្ធលូជុំវិញផ្សារបានកកស្ទះអស់ទៅហើយ ពេលភ្លៀងមកម្តងៗទឹកចាល់ចេញមកក្រៅជះក្លិនស្អុយអសោចប៉ះពាល់ដល់សុខភាពក្រុមអាជីវករ និងប្រជាពលរដ្ឋជាខ្លាំង ដោយសារកត្តាទាំងនេះហើយទើបតម្រូវឲ្យមានការជួសជុលនិងស្តារប្រព័ន្ធលូនេះជាចាំបាច់ ។
លោក ស្រេង វ៉ន អនុប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រៃវែងបានមានប្រសាសន៍ថា ខាងមន្ទីរ និងអាជ្ញាធរបានឯកភាពគ្នាប្រគល់សិទ្ធិទៅឲ្យក្រុមហ៊ុន១ដែលមានទីតាំងស្ថិតនៅក្នុងទីប្រជុំជនអ្នកលឿងនេះតែម្តងក្នុងការចុះសិក្សា និងជួសជុលកែលំអផ្សារអ្នកលឿងនេះឡើងវិញ ហើយពេលនេះក្រុមហ៊ុនបានធ្វើការសិក្សាពីការងារជួសជុលកែលំអផ្សារនេះរួចហើយទើបអាជ្ញាធរ និងមន្ត្រីជំនាញកោះអញ្ជើញក្រុមអាជីវករចូលរួមស្តាប់បទបង្ហាញពីគម្រោងជួសជុលផ្សារ ហើយឆ្លើយតប តើព្រមទទួលយកគំរោងជួសជុលនេះឬទេ ។
ចំណែកក្រុមអាជីវករដែលបានចូលរួមក្នុងការប្រជុំនេះបានលើកឡើងថា ផ្សារអ្នកលឿងនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានប្រគល់មកឲ្យក្រុមអាជីវករហើយមានន័យថា អាជីវករជាម្ចាស់ផ្សារ ដូច្នេះរឿងជួសជុលផ្សារពួកគាត់ និងរៃលុយគ្នាធ្វើការជួសជុលផ្សារនេះដោយខ្លួនឯង ដោយមិនទទួលយកក្រុមហ៊ុនណាមួយឲ្យចូលមកជួសជុលនោះទេ ។ ប៉ុន្តែពួកគាត់ស្នើសុំទៅមន្ត្រីជំនាញ និងអាជ្ញាធរស្រុកខេត្តសូមជួយផ្តល់ឡានទឹក និងឧបករណ៍ពន្លត់អគ្គិភ័យដល់ក្រុមអាជីវករផង ព្រោះពេលនេះផ្សារអ្នកលឿងគ្មានឡានទឹក គ្មានឧបករណ៍ពន្លត់អគ្គិភ័យទេ បើកើតមានអគ្គិភ័យឡើង គឺគ្រោះថ្នាក់ខ្លាំងណាស់ ។
លោកសួន សុម៉ាលីន អភិបាលរងខេត្តព្រៃវែងបានមានប្រសាសន៍ថា ដោយសារបងប្អូនក្រុមអាជីវករមិនទទួលយកក្រុមហ៊ុន ដោយអះអាងថា និងធ្វើការជួសជុលផ្សារដោយខ្លួនឯង ដូច្នេះអាជ្ញាធរ និងឲ្យក្រុមហ៊ុនដកខ្លួនចេញវិញ ហើយទុកឲ្យគណៈកម្មការរួមជាមួយអាជ្ញាធរប្រជុំពិភាក្សាគ្នារកដំណោះស្រាយនៅពេលក្រោយ ។ ដោយឡែកចំពោះសំណូមពររបស់បងប្អូនក្រុមអាជីវករ លោក និងរាយការណ៍ជូនទៅឯកឧត្តមអភិបាលខេត្ត ដើម្បីសុំគោលការណ៍ដោះស្រាយជូន ។
គួរបញ្ជាក់ផងដែរថា បញ្ហានៅក្នុងផ្សារអ្នកលឿងនេះបានកើតមានឡើងរយៈពេល២ទៅ៣ឆ្នាំមកហើយ ប៉ុន្តែរកដំណោះស្រាយមិនបានដោយសារផ្សារនេះ គ្មានគណៈកម្មការគ្រប់គ្រងត្រឹមត្រូវ អាជីវករអះអាងថា ខ្លួនជាម្ចាស់ផ្សារ តែគ្មានអ្នកណាទទួលខុសត្រូវច្បាស់លាស់ ទើបបញ្ហាដែលកើតឡើងរកដំណោះស្រាយមិនឃើញ ៕
ចែករំលែកព័តមាននេះ