រាជធានីភ្នំពេញ ៖ មន្ត្រីយោធាម្នាក់បានធ្វើសកម្មភាពជួញដូរ និងចែកចាយគ្រឿងញៀនទ្រង់ទ្រាយធំគួរសម ហើយខណៈពេលកំពុងមានការកាក់កបផងស្រាប់តែត្រូវបែកការណ៍ ដឹងដល់កម្លាំងនគរបានលអន្ដរាគមន៍ នៃអធិការដ្ឋានខណ្ឌដង្កោ បានចុះទៅធ្វើការឃាត់ខ្លួននាំយកទៅសាកសួរ និងកសាងសំណុំរឿងចាត់ការ តាមច្បាប់តែម្ដង។ ការចាប់ខ្លួននោះបានធ្វើឡើងកាលពីវេលាម៉ោង១០ និង៤៥នាទីព្រឹក ថ្ងៃទី២៦ ខែកញ្ញា ឆ្នាំ២០១៨ នៅចំណុចផ្លូវចូលក្រុមហ៊ុនប្រមូលសំរាមស៊ីនទ្រី ស្ថិតនៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ។
ជនសង្ស័យដែលត្រូវបាននគរបាលឃាត់ខ្លួនបាននោះឈ្មោះ ហៃ សាបាន អាយុ២២ឆ្នាំ ជាតិខ្មែរ មុខរបរយោធា មានទីលំនៅផ្ទះគ្មានលេខ ផ្លូវលំ ភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។ ខណៈនោះកម្លាំងនគរបាលបានរកឃើញថ្នាំញៀន ១កញ្ចប់ធំ ហើយបានដកហូតយករួមជាមួយម៉ូតូ ០១គ្រឿងម៉ាក MSX ស្លាកលេខ ភ្នំពេញ 1DH-6754 មួយគ្រឿងផងដែរ។ ប្រភពដដែលបានបន្តទៀតថា នៅមុនពេលឃាត់ខ្លួន ជនសង្ស័យខាងលើកម្លាំងនគរបាលអន្តរាគមន៍នៃអធិការដ្ឋានខណ្ឌដង្កោ ក្រោមការដឹកនាំ និងបញ្ជាដោយផ្ទាល់ពី លោកវរសេនីយ៍ឯក ជឹម ស៊ីថា អធិការនគរបាលខណ្ឌ។
បានចុះល្បាតពួនស្ទាក់បទល្មើសនៅក្នុងមូលដ្ឋាន ហើយបានទទួលព័ត៌មានពីប្រជាពលរដ្ឋថា មន្ត្រីយោធាម្នាក់នេះ គឺជាមុខសញ្ញាជួញដូរ និងចែកចាយគ្រឿងញៀនយ៉ាងសកម្ម នៅតំបន់ខាងលើ។ ភ្លាមៗនោះកម្លាំងបានចុះទៅធ្វើការចាប់ខ្លួន និងឆែកឆេររកឃើញវត្ថុតាងខាងលើ បន្ទាប់មកបាននាំទៅសួរនាំនៅអធិការដ្ឋាននគរបាលខណ្ឌដង្កោ ដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ