ខេត្តប៉ៃលិន ៖ កសិករមួយគ្រួសារនៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន កំពុងមានជីវភាពធូរធារតាមរយៈការចិញ្ចឹមមាន់ ដោយទទួលបានចំណូលពី២ទៅ៣លានរៀលក្នុងរដូវៗចន្លោះពី៣ទៅ៤ខែ ។ លោក ស៊ិម…
ខេត្តប៉ៃលិន ៖ កសិករមួយគ្រួសារនៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន កំពុងមានជីវភាពធូរធារតាមរយៈការចិញ្ចឹមមាន់ ដោយទទួលបានចំណូលពី២ទៅ៣លានរៀលក្នុងរដូវៗចន្លោះពី៣ទៅ៤ខែ ។
លោក ស៊ិម បូរ៉ា កសិករចិញ្ចឹមមាន់រូបនេះបានរៀបរាប់ថា បច្ចុប្បន្នលោកបានចិញ្ចឹមមាន់ស្រែចំនួន៧០០ក្បាលនៅកសិដ្ឋានមួយកន្លែង ហើយប្រពន្ធជាអ្នកលក់ដូរនៅក្នុងផ្សារសាមគ្គីហៅប៉ាហ៊ី ។ លោកបន្ដថា ការចិញ្ចឹមនេះ លោកមិនបានរៀនពីអ្នកជំនាញទេ គឺឈ្វេងយល់តាមប្រព័ន្ធអុីនធើរណែត(You tube)ប៉ុណ្ណោះ រហូតដល់ដឹង ពីរបៀបចិញ្ចឹម ទើបចាប់ផ្ដើមអនុវត្តខ្លួនឯងតែម្តង។ ទោះបីយ៉ាងណា លោកបានបន្ដទៅរៀនដកបទពិសោធន៍ពីកសិដ្ឋានមួយកន្លែងក្នុងខេត្តកំពង់ចាមផងដែរ ។
លោក ស៊ិម បូរ៉ា និយាយថា ៖« ការប្រកបរបរនេះពិតជាធ្វើឲ្យជីវភាពគ្រួសារខ្ញុំប្រសើរជាងមុន ព្រោះមាន់លក់បានថ្លៃ គឺក្នុង១គីឡូក្រាមតម្លៃ១៨.០០០រៀល ហើយប្រសិនជាធ្វើរួច លក់បានតម្លៃ២៥.០០០រៀលឯណោះ ។ លើសពីនេះក្នុងមួយវគ្គៗដែលមានរយៈពេលចំនួន៣ខែ ខ្ញុំអាចរកចំណូលបានចំនួន២លានទៅ៣លានរៀលដែរ ហើយខ្ញុំរំពឹងថា ក្នុងរដូវភ្ជុំបិណ្ឌនេះ នឹងមានតម្រូវការកាន់តែច្រើនថែមទៀត » ។
លោកបានចែករំលែកពីរបៀបចិញ្ចឹមមាន់នេះផងដែរ ដោយដំបូងគឺត្រូវមើលទីតាំងដើម្បីសង់រោង ព្រមទាំងរកពូជល្អៗមកចិញ្ចឹម ព្រោះកូនមាន់ដែលល្អ មិនសូវមានជំងឺអ្វីកើតឡើងទេ ជាពិសេសត្រូវការអនាម័យទ្រង់ជាញឹកញាប់បំផុត បើមិនឧស្សាហ៍ទេ នោះមាន់នឹងកើតជំងឺច្រើន ហើយក៏ឈឺងាប់ផងដែរ ។
លោកបញ្ជាក់ថា ៖« ខ្ញុំមិនទិញកូនមាន់មកចិញ្ចឹមទេ គឺយកពងមាន់ទៅភ្ញាស់ក្នុងទូម៉ាស៊ីន រយៈពេលពីរថ្ងៃ ទើបវាញាស់ បន្ទាប់មកយើងយកវាទៅចាក់វ៉ាក់សាំងការពារជំងឺ រួចយកទៅដាក់ក្នុងទូកំដៅជំនួសមេមាន់ ព្រមទាំងឲ្យចំណីទៅតាមអាយុកាលរបស់កូនមាន់ »។ លោកបន្ថែមថា ៖« ចំណីដែលដាក់ឲ្យវាស៊ីនោះ យើងកិនគ្រាប់ពោត លាយជាមួយម្ហូបអាហាផ្ទះបាយ ហើយក្នុងរយៈពេល៣ខែកន្លះ យើងអាចចាប់លក់បានហើយ ដោយមាន់១ក្បាលមានទម្ងន់ចាប់ពីមួយគីឡូកន្លះឡើងទៅ »៕
ចែករំលែកព័តមាននេះ