ខេត្តបន្ទាយមានជ័យ ៖ គ្រោះថ្នាក់ចរាចរណ៍ដ៏រន្ធត់មួយ បានកើតឡើងកាលពីព្រឹកថ្ងៃទី២៣ កញ្ញា នៅលើផ្លូវលេខ២៥៨D ក្នុងភូមិស្នួលទ្រេត ឃុំអូរបីជាន់ បណ្តាលឱ្យតាយាយស្លាប់ទាំង២នាក់ ដោយសាររថយន្តបុកពីក្រោយពេលកំពុងជិះម៉ូតូ តែចៅស្រីអាយុ៨ខែ បានរួចផុតពីស្លាប់និងនៅដេកឱបសពជីដូនគួរឲ្យសង្វេគ ។
តាយាយ២នាក់នេះ តាឈ្មោះ សៀក សេ អាយុ៥៧ឆ្នាំ យាយឈ្មោះ ចៀប ឡេង អាយុ៦៥ឆ្នាំ ឯចៅស្រីឈ្មោះ ម៉ី លីឌៀ ពួកគាត់រស់នៅក្នុងភូមិ ឃុំ ខាងលើ ។ អ្នកស្រុកនិយាយថា ជនរងគ្រោះជាប្តីបើកម៉ូតូសេ១២៥ ពណ៌ខ្មៅ ស៊េរីឆ្នាំ២០០៣ ពាក់ផ្លាកលេខ បន្ទាយមានជ័យ ១H-៣១៧០ដឹកប្រពន្ធនិងចៅ ទៅរកទិញថ្នាំពេទ្យនៅផ្សារអូរបីជាន់ឲ្យចៅលេប ។
ជាអកុសល ពេលទៅដល់ចំណុចខាងលើ ស្រាប់តែមានរថយន្តមួយគ្រឿងបើកបរស្របទិសគ្នាពីត្បូងទៅជើង បានបុកពីក្រោយពេញទំហឹង បណ្តាលឲ្យជនរងគ្រោះជាតានិងយាយស្លាប់នៅនឹងកន្លែង ដោយយាយដាច់ជា២កំណាត់ ។ អ្វីដែលគួរឲ្យសង្វេគនោះ គឺអ្នកស្រុកឃើញចៅស្រីដែលគ្រាន់តែរបួសជើងតិចតួច នៅដេកឱបលើទ្រូងជីដូនដែលស្លាប់ ។
ក្រោយកើតហេតុ រថយន្តបានបើករត់ទៅទិសខាងជើងដល់ភូមិចំការគ ឃុំស្វាយចេក ទើបចតរថយន្តចោលហើយគេចខ្លួនបាត់ តែរថយន្តត្រូវសមត្ថកិច្ចតាមរកឃើញនិងនាំយកទៅរក្សាទុកនៅអធិការដ្ឋាននគរបាលស្រុកអូរជ្រៅដើម្បីបន្តនីតិវិធី ។ចំណែកសពជនរងគ្រោះ ត្រូវបានសាច់ញាតិយកទៅតម្កល់នៅវត្តសាមគ្គីវ័ន្ត ហៅវត្តស្នួលទ្រេត ដើម្បីធ្វើបុណ្យតាមប្រពៃណី ៕
ចែករំលែកព័តមាននេះ