រាជធានីភ្នំពេញ ៖ បុរសជាជនសង្ស័យម្នាក់បានប្រើកាំបិតចុងស្រួចចំនួនមួយទៅភ្ជង់.កនារីជាបុគ្គលិកម្នាក់នៅក្នុងកន្លែង Net 24 ម៉ោងធ្វើឲ្យមានការភ្ញាក់ផ្អើលទៅដល់កម្លាំងមានសមត្ថកិច្ចមូលដ្ឋានខណ្ឌចំការមន ចុះមកដល់កន្លែងកើតហេតុខាងលើទាំងព្រឹកតែម្តង ។
ហេតុការណ៍នេះបានបង្កឡើងនៅវេលាម៉ោង៩និង៣០នាទីព្រឹកថ្ងៃទី២៦ ខែកញ្ញា ឆ្នាំ២០១៨ នៅចំណុចកន្លែង Net 24ម៉ោង យីហោ AV2 ផ្លូវលេខ២៧៦ កែងនឹងផ្លូវលេខ១១៣ ក្នុងសង្កាត់បឹងកេងកងទី២ ខណ្ឌចំការមន ។
ចំណែកនារីម្នាក់ឈ្មោះ រុន គឹមលាង អាយុ២៩ឆ្នាំ ជាបុគ្គលិកបម្រើការងារនៅកន្លែង Net 24ម៉ោង យីហោ AV2 ខាងលើ ស្នាក់នៅផ្ទះជួលម្តុំវត្តសន្សំកុសល ផ្លូវតាផុន ក្នុងសង្កាត់បឹងទំពុនទី១ ខណ្ឌមានជ័យបានប្រាប់ឱ្យដឹងថា មុនពេលកើតហេតុវេលាម៉ោងប្រមាណជា៨ទៅ៩ព្រឹកមិញនេះ ។ មានបុរសជាភ្ញៀវម្នាក់មានអាយុប្រមាណជាជាង២០ឆ្នាំបានចូលមកលេងនៅក្នុងកន្លែង Net 24ម៉ោងខាងលើ ដែលជាកន្លែងធ្វើការរបស់នាង និងចូលទៅអង្គុយលេងមួយសន្ទុះ ប្រហែលជាជាងកន្លះម៉ោង ដោយលេងចាញ់អស់លុយចំនួនជាង១២០០ដុល្លារ ហើយក៏ដើរចេញទៅក្រៅវិញបាត់ ។ នាងក៏បានរៀបរាប់ប្រាប់បន្តទៀតថា លុះបន្តិចក្រោយមកនាងបានឃើញបុរសជាជនសង្ស័យម្នាក់នោះវិលត្រឡប់ចូលមកកន្លែង Net សារជាថ្មីម្តងទៀត តែរូបគេមិនបានមកអង្គុយនៅកន្លែងលេងនោះទេ ដោយបានដើរចូលទៅក្នុងបន្ទប់ទឹកទៅវិញ ។
ពេលដែលរូបគេចេញពីក្នុងបន្ទប់ទឹកមកវិញនោះ ខណៈដែលរូបនាងកំពុងតែអង្គុយនៅកន្លែងគិតលុយនោះក៏ស្រាប់តែបុរសជាជនសង្ស័យបានយកកាំបិតចុងស្រួចមួយមកភ្ជង់.ក របស់នាងជាប់ ហើយក៏បានគំរាមសម្លាប់នាង ហើយសួររកកន្លែងទុកលុយ ។ ដោយការភ័យខ្លាចនោះ រូបនាងក៏បានប្រាប់កន្លែងទុកលុយពេលនោះរូបគេក៏បានយកកូនសោទៅចាក់ទូ និងបាយកលុយអស់ចំនួនជាង៣ពាន់ដុល្លារ ហើយក៏ដើរចេញក្រៅ និងរត់គេចខ្លួនចេញពីកន្លែង Net ខាងលើ រត់គេចខ្លួនបាត់ស្រមោលឈឹងតែម្តងទៅ ។ នាងក៏បានបញ្ជាក់ទៀតថា ពាក់ពន្ធ័ទៅនឹងបុរសជាជសង្ស័យម្នាក់យកកាំបិតមកភ្ជង់.កប្លន់យកលុយអស់ជាង៣ពាន់ដុល្លារខាងលើនេះ រូបនាងមិនដែលបានស្គាល់ទេ កាលពីពេលមុនមកដោយទើបតែបានឃើញរូបគេចូលមកលេង កាលពីថ្ងៃម្សិលមិញ (ថ្ងៃទី២៥ ខែកញ្ញានេះ) ម្តងឈ្នះបានលុយពី៣០០ទៅ៤០០ដុល្លារ ម្តង និងព្រឹកមិញឃើញចូលមកលេងម្តងទៀត ដោយចាញ់អស់លុយចំនួន១២០០ដុល្លារវិញ ក៏ស្រាប់រូបគេយកកាំបិតមកភ្ជង់.ក ប្លន់យកលុយបានចំនួនជាង៣ពាន់ដុល្លារ និងធ្វើឲ្យមានការភ្ញាក់ផ្អើលកើតឡើងបែបនេះតែម្តង ។
គួរឱ្យកត់សម្គាល់ឃើញថា នៅក្នុងភូមិសាស្ត្រខណ្ឌចំការមនទាំងមូលមានទីតាំង Net 24 ម៉ោង ដែលបង្កប់ល្បែងស៊ីសង តាមអនឡាញប្រភេទនេះយ៉ាងច្រើកស្អេកស្កះផងដែរ តែមិនដែលឃើញមានអាជ្ញាធរមូលដ្ឋានណាម្នាក់ចុះបង្ក្រាបឡើយ ហើយករណីលួច ប្លន់ និងអំពើចោរកម្មផ្សេងៗក៏កំពុងតែកើតមានច្រើនដែរ ។
ក្រោយពេលកើតហេតុគេក៏បានឃើញមានកម្លាំងមានសមត្ថកិច្ចមូលដ្ឋានខណ្ឌចំការមនជាច្រើនបានចុះមកដល់កន្លែង Net 24 ម៉ោង ដែលមានបង្កប់ល្បែងស៊ីសងខាងលើ និងហៅនារីជាបុគ្គលិកម្នាក់ខាងលើយកទៅកាន់នគរបាលប៉ុស្តិ៍បឹងកេងកងទី២ ដើម្បីធ្វើការសាកសួរ និងធ្វើការស្រាវជ្រាវរកចាប់ខ្លួនបុរសជាជនសង្ស័យយកមកធ្វើការផ្តន្ទាទោសទៅតាមផ្លូវច្បាប់ជាបន្តទៅទៀត ៕
ចែករំលែកព័តមាននេះ