រដ្ឋាភិបាលភូមាពេលនេះកំពុងបញ្ជូនជំនួយសង្គ្រោះទៅតំបន់នានាដែលរងគ្រោះដោយការរញ្ជួយព្រះធរណីកម្រិត៧រីស្ទ័រ កាលពីយប់ថ្ងៃទី២៤ មីនា កន្លងមក ដែលកើតឡើងនៅតំបន់ព្រំដែនជាប់ជាមួយប្រទេស៤ គឺចិន ឡាវ ថៃ និងវៀតណាម ។ ជំនួយសង្គ្រោះនោះត្រូវបានបញ្ជូនក្រោមការរៀបចំរបស់ក្រសួងកិច្ចការសង្គមដោយមានកិច្ចសហប្រតិបត្តិការពីអាជ្ញាធរមូលដ្ឋាន ។
ជំនួយសង្គ្រោះនោះត្រូវបានដឹកតាមយន្តហោះទៅកាន់ព្រលានយន្តហោះ Kengtung និង ព្រលានយន្តហោះ Tachileik បន្ទាប់មកត្រូវដឹកតាមរថយន្តយោធាទៅកាន់តំបន់ដែលរងគ្រោះដោយការរញ្ជួយដី ។ នេះបើតាមការឱ្យដឹងដោយវិទ្យុ និងទូរទស្សន៍របស់ភូមា ។
តាមប្រភពព័ត៌មានក្រៅផ្លូវការមួយថា គិតត្រឹមថ្ងៃទី២៧ មីនា ចំនួនអ្នកស្លាប់ដោយសារបាតុភូតរញ្ជួយដីនៅប្រទេសភូមាកើនឡើងដល់១០០នាក់ និងអ្នករបួសមានជាង១០០នាក់ ។ រដ្ឋមន្ត្រីក្រសួងកិច្ចការសង្គមភូមា លោក U Maung Maung បានអញ្ជើញទៅត្រួតពិនិត្យតំបន់ដែលរងគ្រោះដោយការរញ្ជួយដីកាលពីថ្ងៃទី២៦ មីនា កន្លងមក ។
- ចិនផ្តល់ជំនួយមនុស្សធម៌ជាប្រាក់៥០ម៉ឺនដុល្លារដល់ភូមា
ចិនដែលជាប្រទេសមានសេដ្ឋកិច្ចរីកលូតលាស់យ៉ាងលឿនមួយលើពិភពលោក បានផ្តល់ជំនួយផ្នែកមនុស្សធម៌បន្ទាន់ជាប្រាក់៥០០.០០០ដុល្លារអាមេរិកទៅឱ្យប្រទេសភូមាកាលពីពេលថ្មីៗកន្លងមក ។ នេះបើតាមការឱ្យដឹងដោយក្រសួងពាណិជ្ជកម្មចិន កាលពីថ្ងៃទី២៦ មីនា ។ ក្រសួងពាណិជ្ជកម្មចិននិយាយក្នុងសេចក្តីថ្លែងការណ៍មួយថា ជំនួយនេះត្រូវបានផ្តល់ទៅឱ្យប្រទេសភូមា ដើម្បីជួយដល់កិច្ចខិតខំប្រឹងប្រែងជួយសង្គ្រោះរបស់ភូមា និងដល់ការស្តារតំបន់រងគ្រោះដោយការរញ្ជួយដីឡើងវិញ ៕
ចែករំលែកព័តមាននេះ