ខេត្តកំពង់ចាម ៖ តាមសេចក្តីរាយការណ៍បឋមបានឲ្យដឹងថា មានការភ្ញាក់ផ្អើលមួយបានកើតឡើងជុំវិញការវាយសម្លាប់ក្មេងស្រីម្នាក់អាយុ៥ឆ្នាំ ទម្លាក់ក្នុងទឹកស្រះខាងក្រោយភូមិ ។ ទោះបីជាបែបណា ជនដៃដល់ត្រូវបានសមត្ថកិច្ចចាប់ខ្លួនពាក់ព័ន្ធនឹងរឿងគំនុំនៅក្នុងគ្រួសារ ។ កុមារីរងគ្រោះឈ្មោះ…
ខេត្តកំពង់ចាម ៖ តាមសេចក្តីរាយការណ៍បឋមបានឲ្យដឹងថា មានការភ្ញាក់ផ្អើលមួយបានកើតឡើងជុំវិញការវាយសម្លាប់ក្មេងស្រីម្នាក់អាយុ៥ឆ្នាំ ទម្លាក់ក្នុងទឹកស្រះខាងក្រោយភូមិ ។ ទោះបីជាបែបណា ជនដៃដល់ត្រូវបានសមត្ថកិច្ចចាប់ខ្លួនពាក់ព័ន្ធនឹងរឿងគំនុំនៅក្នុងគ្រួសារ ។
កុមារីរងគ្រោះឈ្មោះ ធូ សុជាតិ មានទីលំនៅក្នុងភូមិកោះប្រាក់ក្នុង ឃុំកោះទន្ទឹម ស្រុកកំពង់សៀម ។ កាលពីវេលាម៉ោង៥និង៣០នាទីល្ងាចថ្ងៃទី២៤ ខែកញ្ញា សមត្ថកិច្ចមូលដ្ឋានឃុំកោះទន្ទឹម បានទទួលពាក្យបណ្តឹងផ្ទាល់មាត់ពីស្ត្រីឈ្មោះ ប្រាក់ អុន អាយុ៥៦ឆ្នាំ ដែលជាជីដូនក្មេងស្រី មានទីលំនៅក្នុងភូមិ
កោះប្រាក់ក្នុង ឃុំកោះទន្ទឹម ។
តាមពាក្យបណ្តឹងរៀបរាប់ថា កាលពីវេលាម៉ោងជាង២រសៀលថ្ងៃទី២៤ ខែកញ្ញា ចៅស្រីរបស់គាត់ឈ្មោះ ធូ សុជាតិ បានដើរលេងនៅក្នុងភូមិ លុះក្រោយមកស្រាប់តែបាត់មិនដឹងទៅណា ហើយរហូតដល់វេលាម៉ោង៥ល្ងាច ក៏នៅតែមិនឃើញត្រឡប់មកផ្ទះវិញដែរ ។ ដោយសារបាត់ចៅស្រី រូបគាត់ជាជីដូនរួមជាមួយប្តីឈ្មោះ យន់ ស បានដើររកចៅគ្រប់ច្រកល្ហកពេញក្នុងភូមិតែរកមិនឃើញ ហើយក៏បានដើរសួរអ្នកស្រុកនិងក្មេងៗជិតខាងដែលធ្លាប់លេងជាមួយគ្នា ប៉ុន្តែនៅតែគ្មានដំណឹង ។
ជីដូនក្មេងស្រីបានប្តឹងសមត្ថកិច្ចទៀតថា ពេលនោះ គាត់បានជួបស្ត្រីអ្នកភូមិម្នាក់បានប្រាប់ថា ឃើញឈ្មោះ គីម សុខរស់ ហៅវ៉ូ ភេទប្រុស អាយុ២៩ឆ្នាំ នាំចៅស្រីគាត់ដើរទៅទិសខាងលិច ។ គ្រាន់តែបានដំណឹងនេះភ្លាម គាត់និងប្តីប្រញាប់ទៅរាយការណ៍ជូន នគរបាលប៉ុស្តិ៍កោះទន្ទឹម ហើយនគរបាលបានហៅឈ្មោះ គីម សុខរស់ហៅវ៉ូ ទៅសាកសួរទើបសារភាព និងជូនសមត្ថកិច្ចទៅកាន់កន្លែងដែលខ្លួនបានធ្វើសកម្មភាពវាយសម្លាប់ក្មេងស្រី គឺនៅមាត់ស្រះទឹកខាងក្រោយផ្ទះអ្នកភូមិម្នាក់ ។
ពេលទៅដល់មាត់ស្រះទឹករបស់អ្នកភូមិនោះ ក៏បានចុះរាវរកក្នុងស្រះទឹកតែរកមិនឃើញ ហើយពេលនោះឈ្មោះ គីម សុខរស់ ហៅវ៉ូ ក៏ចង្អុលប្រាប់ថា ក្មេងស្រីដែលខ្លួនវាយសម្លាប់នៅត្រង់កែងមាត់ស្រះខាងលិចឆៀងខាងត្បូង ។ ពេលឮដូច្នោះភ្លាម ជីដូនក្មេងស្រីក៏បានចុះរាវរកក្នុងទឹកស្រះត្រង់ចំណុចដែលឈ្មោះ គីម សុខរស់ ហៅវ៉ូ ចង្អុលប្រាប់ ទើបឃើញសពចៅស្រីនៅក្នុងទឹកស្រះនោះ ។ ពេលរាវរកឃើញចៅហើយ ជីតាក៏បានលើកសពចៅស្រីឡើងលើគោក និងឃើញលើផ្ទៃមុខចៅស្រីមានរបួសជាច្រើនកន្លែងដោយការវាយសម្លាប់ ។
បន្ទាប់ពីទទួលបានព័ត៌មាននិងបណ្តឹងភ្លាមសមត្ថកិច្ចនគរបាលស្រុកកំពង់សៀម សហការជាមួយនគរបាលប៉ុស្តិ៍កោះទន្ទឹម ដឹកនាំដោយលោកវរសេនីយ៍ទោ ណោ ឌីណា នាយរងការិយាល័យបច្ចេកទេសវិទ្យាសាស្ត្រ បានចុះទៅពិនិត្យនិងចាត់វិធានការជាបន្ទាន់ដល់កន្លែងកើតហេតុ និងបានរឃាត់ខ្លួនជនសង្ស័យគឺឈ្មោះ
គីម សុខរស់ ហៅវ៉ូ ។
ជនសង្ស័យឆ្លើយសារភាពថា ខ្លួនពិតជាបានសម្លាប់ក្មេងស្រីនោះមែន ដោយយកកំណាត់ឈើវាយនិងចាប់ច្របាច់.ក ហើយច្រានចូលក្នុងទឹកស្រះតែម្តង ។ ជននេះសារភាពទៀតថា មូលហេតុដោយសារមានគំនុំជាមួយក្រុមគ្រួសារក្មេងស្រី ។ ជនសង្ស័យ ក៏ត្រូវបានសមត្ថកិច្ចធ្វើតេស្តទឹកនោមរកសារធាតុញៀនដែរ ដែលលទ្ធផលគឺវិជ្ជមាន ៕
ចែករំលែកព័តមាននេះ