ខេត្តស្វាយរៀង ៖ ផ្ទះឈើប្រក់ពីស័ង្កសី និងជញ្ជាំងស័ង្កសី១ខ្នងត្រូវបានភ្លើងឆេះម៉ត់សល់តែផេះផង់ ករណីគ្រោះអគ្គីភ័យនេះបង្កការភ្ញាក់ផ្អើលដល់ពលរដ្ឋក្នុងភូមិចេញមកជួយពន្លត់ដែរ តែអណ្តាតភ្លើងឆេះសន្ធោសន្ធៅទៅហើយមិនអាចពន្លត់ឈ្នះ។ ករណីនេះបានកើតឡើងកាលពីវេលាម៉ោង១០ព្រឹកថ្ងៃទី២៥ ខែកញ្ញា ឆ្នាំ២០១៨ ស្ថិតក្នុងភូមិព្រៃតាធឹក ឃុំគគីរសោម ស្រុកស្វាយទាប។
បើតាមម្ចាស់ផ្ទះរងគ្រោះឈ្មោះភោគ រ៉ា ភេទស្រី អាយុ៤១ឆ្នាំមានទីលំនៅភូមិ ឃុំកើតហេតុខាងលើ បានឲ្យដឹងថា នៅវេលាម៉ោង១០ព្រឹកថ្ងៃកើតហេតុ គាត់បានដាក់ឆ្នាំងដាំបាយលើចង្ក្រានហើយបានប្រាប់កូនប្រុសអាយុ១០ឆ្នាំចាំមើលដោយរូបគាត់ជាប់រវល់ទៅបេះបន្លែ ពេលនោះស្រាប់តែភ្លើងចង្ក្រានឆេះកាន់តែខ្លាំងឡើងៗ រាលដាលមកដល់កន្លែងដាក់ចំបើងបណ្តាលឲ្យឆាបឆេះពាសពេញផ្ទះទាំងស្រុង។
ប្រភពដដែលបានបន្តទៀតថា ក្នុងពេលដែលភ្លើងកំពុងឆាបឆេះនោះឃើញមានពលរដ្ឋនៅជិតខាងមកជួយពន្លត់ដែរ តែពន្លត់មិនឈ្នះ និងរាយការណ៍មកសមត្ថកិច្ច ប៉ុន្តែពេលដែលសមត្ថកិច្ចមកដល់ គឺអ្វីៗបានរលាយក្លាយទៅជាផេះផង់អស់ទៅហើយ ។
អគ្គិភ័យឆាបឆេះនេះ បានបំផ្លាញផ្ទះបណ្តោយ៥ម៉ែត្រគុណនឹង៥ម៉ែត្រ ព្រមទាំងខូចខាតទ្រព្យសម្បត្តិមួយចំនួនទៀត ប៉ុន្តែមិនបង្កឲ្យមានអ្នករងរបួស ឬស្លាប់នោះទេ ។
សូមបញ្ជាក់ផងដែរថា ករណីអគ្គិភ័យនេះ បានកើតឡើង២ករណីជាប់ៗគ្នានៅក្នុងស្រុកស្វាយទាប ដោយលើកទី១កើតឡើងកាលពីវេលាម៉ោង៧និង១៥នាទីយប់ថ្ងៃទី២៤ខែកញ្ញាឆ្នាំ២០១៨ស្ថិតនៅភូមិអង្គ្រង ឃុំស្វាយរំពារស្រុកស្វាយទាប ។
ម្ចាស់ផ្ទះឈ្មោះ សេក សាភឿន ភេទស្រី អាយុ៥២ឆ្នាំ ក្នុងនោះសម្ភារដែលខូចខាតរួមមាន អង្ករចំនួន៦តៅ សៀវភៅគ្រួសារមួយក្បាល សៀវភៅស្នាក់នៅមួយក្បាល សំបុត្រកំណើត៤នាក់ អត្តសញ្ញាណបណ្ណ័ពីរសន្លឹក ប្លង់ដីពីរប្លង់ បណ្ណ័ក្រីក្រមួយសន្លឹក លុយ៥០០០០០រៀលនិងកាត ប.ស.ស មួយសន្លឹក សំលៀកបំពាក់ និងមុងភួយនិងសម្ភារជាងដែកកំពុងសង់ផ្ទះថ្មី១ចំនួន៕
ចែករំលែកព័តមាននេះ