ទីក្រុងតូក្យូ ៖ ខណៈដែលសហរដ្ឋអាមេរិកដាក់គោលដៅលើប្រទេសចិន កាណាដា និងម៉ិកស៊ិកព្រោះតែអតុល្យភាពពាណិជ្ជកម្ម ប្រទេសជប៉ុនកំពុងតែសង្ឃឹមថា មិត្តភាពរបស់លោកនាយករដ្ឋមន្ត្រី Shinzo Abe និងលោកប្រធានាធិបតីដូណាល់…
ទីក្រុងតូក្យូ ៖ ខណៈដែលសហរដ្ឋអាមេរិកដាក់គោលដៅលើប្រទេសចិន កាណាដា និងម៉ិកស៊ិកព្រោះតែអតុល្យភាពពាណិជ្ជកម្ម ប្រទេសជប៉ុនកំពុងតែសង្ឃឹមថា មិត្តភាពរបស់លោកនាយករដ្ឋមន្ត្រី Shinzo Abe និងលោកប្រធានាធិបតីដូណាល់ ត្រាំ (Donald Trump) អាចជួយឲ្យជប៉ុនជៀសផុតពីគោលដៅពន្ធអាមេរិកបាន ។
ប៉ុន្តែដោយលោក Abe និងលោកត្រាំ ចរចាពីជម្លោះពាណិជ្ជកម្ម មុខសញ្ញាបានលេចឡើងថាប្រទេសជប៉ុនអាចនឹងក្លាយជាគោលដៅបន្ទាប់របស់លោកប្រធានាធិបតីអាមេរិក ។
លោកប្រធានាធិបតីត្រាំ បានរិះគន់ម្តងហើយម្តងទៀតលើឱនភាពពាណិជ្ជកម្មដ៏ខ្ពស់ជាមួយនឹងជប៉ុន ។ កាលពីឆ្នាំមុន សហរដ្ឋអាមេរិកមានឱនភាពពាណិជ្ជកម្មជាមួយជប៉ុនប្រមាណ ៦៨,៨ប៊ីលានដុល្លារ តិចជាងជាមួយប្រទេសចិនដែលស្មើ៣៧៥ប៊ីលានដុល្លារ និងម៉ិកស៊ិកដែលស្មើ៧១ប៊ីលានដុល្លារ ។
យានយន្តនិងគ្រឿងបន្លាស់ស្មើ៨០%នៃអតុល្យភាពនៃពាណិជ្ជកម្មនេះ ហើយការមើលឃើញមានរថយន្តជប៉ុនរាប់លានគ្រឿងនៅសហរដ្ឋអាមេរិកបានជំរុញដល់ការរិះគន់របស់លោកត្រាំ ។
ប្រទេសជប៉ុនមិនបានដាក់ពន្ធលើរថយន្តនាំចូលទេ ព្រោះប្រជាជនភាគច្រើនប្រើវិធីធ្វើដំណើរសាធារណៈ ប៉ុន្តែសហរដ្ឋអាមេរិកវិញដាក់ពន្ធ២,៥% ។
ការចរចាដំណាក់កាលដំបូងរវាងអ្នក តំណាងពាណិជ្ជកម្មអាមេរិក Robert Lighthizer និងភាគីខាងជប៉ុនគឺលោក Toshimitsu Motegi ត្រូវបានប្រារព្ធឡើងដោយមិនមានផ្លែផ្កាឡើយ។ ប្រទេសជប៉ុនចង់ដោះស្រាយជម្លោះពាណិជ្ជកម្មក្នុងវេទិកាដូចជា កិច្ចព្រមព្រៀងដៃគូពាណិជ្ជកម្មអន្តរប៉ាស៊ីហ្វិក ប៉ុន្តែសហរដ្ឋអាមេរិកចង់បានកិច្ចព្រមព្រៀងទ្វេភាគីទៅវិញ ។
យ៉ាងណាក្តី ប្រទេសជប៉ុនអាចនឹងព្រមទទួលកិច្ចព្រមព្រៀងទ្វេភាគី ប្រសិនបើសហរដ្ឋអាមេរិក មិនដាក់ពន្ធបន្ថែមលើវិស័យយានយន្ត។ អ្នកវិភាគបានឲ្យដឹងថា លោកប្រធានាធិបតីត្រាំ អាចនឹងងាកមកចាប់អារម្មណ៍លើជប៉ុន បន្ទាប់ពីលោកដោះស្រាយបញ្ហាជាមួយនឹងចិន និងការចរចាលើកិច្ចព្រមព្រៀង NAFTA ៕
ចែករំលែកព័តមាននេះ