រឿងសទ្ធានេះកាលបើបុគ្គលជឿស៊ប់ដាមជាប់ក្នុងអារម្មណ៍ពិតប្រាកដហើយ នឹងហុចផលឱ្យភ្លាមៗឃើញជាក់ច្បាស់នឹងភ្នែក មិនបាច់រង់ចាំជាតិក្រោយទេ។ សូមលើកយកនាយព្រាហ្មណ៍ពីរនាក់ប្តីប្រពន្ធដែលគាត់មានសទ្ធាជ្រះថ្លាក្នុងព្រះសង្ឃ តែគ្មានលទ្ធភាពធ្វើទានដល់លោកក៏យកកូនទៅឱ្យនាគស៊ីក្នុងបំណងឱ្យអ្នកស្រុកអាណិតអាសូរនាំយកអង្ករ យកប្រាក់មកចូលបុណ្យសពកូន នឹងបានធ្វើចង្ហាន់ប្រគេនព្រះសង្ឃ។
តទៅនេះជាការរៀបរាប់នូវដំណើររឿងនៃព្រាហ្មណ៍ពីរនាក់ប្តីប្រពន្ធនោះដោយសង្ខេបដូចតទៅ កាលនោះ មានទុគ្គតព្រាហ្មណ៍ពីរនាក់ប្តីប្រពន្ធមានសទ្ធាជឿស៊ប់ក្នុងព្រះពុទ្ធសាសនា ជាអ្នកពេញចិត្តក្នុងការធ្វើទាន ប៉ុនែ្តពួកគេមិនមានវត្ថុអ្វីសូម្បីតែបន្តិចបន្តួចដើម្បីធ្វើទាននឹងព្រះសង្ឃសោះ ។
ទុគ្គតព្រាហ្មណ៏នោះមានកូនប្រុសម្នាក់ ជាទីស្រទ្បាញ់ពេញចិត្តនៃឪពុកមានិងម្តាយមីងក្រៃពេក ។ ថ្ងៃមួយមានព្រះអរហន្តមួយអង្គនិមន្តបិណ្ឌបាត ទុគ្គតព្រាហ្មណ៏ឃើញហើយមានសេចក្តីជ្រះថ្លា និមន្តចូលទៅក្នុងផ្ទះដើម្បីទទួលភត្ត លុះលោកចូលទៅគង់ហើយទូលលោកឲ្យរង់ចាំភត្តបន្តិច ទើបគិតគ្នាពីរនាក់ប្តីប្រពន្ធថា យើងបានអ្វីធ្វើចង្ហាន់លោក បើក្នុងផ្ទះយើងសូម្បីតែអង្ករ ១គ្រាប់ក៏គ្មានផងនោះ។ ទុគ្គតព្រាហ្មណ៍នឹកឃើញថា បងប្អូនយើងស្រទ្បាញ់កូនយើងណាស់ បើយើងយកកូនទៅដាក់នៅមាត់រូងនាគរាជខាងក្រោយផ្ទះ នាគនឹងខាំស៊ីមួយរំពេច ហើយយើងទៅប្រាប់បងប្អូនថា កូនស្លាប់ឥទ្បូវបាននិមន្តលោក១អង្គមកធ្វើបុណ្យឲ្យសពកូន ។
បងប្អូនយើងគេមុខតែយកអង្ករត្រីសាច់ជាដើមមកឲ្យយើងធ្វើចង្ហាន់លោកមិនខាន។ លុះគិតហើយក៏យកកូនទៅដាក់នៅមាត់រន្ធនាគរាជ រួចពួនចាំមើល។ នាគរាជកាលបើធុំក្លិនមនុស្សហើយក៏ស្ទុះចេញមកប្រុងខាំស៊ី តែដោយគុណនៃសទ្ធាពិតប្រាកដរបស់ព្រាហ្មណ៍ និងអានុភាពនៃអាយុរបស់កុមារនោះមិនទាន់អស់ផង បណ្តាលឲ្យនាគរាជនោះភ្ញាក់ផ្អើលនឹងកុមារនោះក៏ស្ទុះរត់ចេញទៅជ្រុះកែវមណីពីក្នុងមាត់ក្បែរមាត់រន្ធ ។
កុមារឃើញកែវមណីភ្លឺៗក៏រើសយកមកកាន់លេង ឯព្រាហ្មណ៍ជាឪពុកម្តាយឃើញកូនកាន់កែវដូច្នោះ ក៏ស្ទុះទៅយកកូននិងកែវដ៏ល្អក្រៃលែងរកថ្លៃកាត់មិនបាននោះ ហើយយកកែវដ៏ប្រណីតនោះទៅលក់ឲ្យសេដ្ឋីក្នុងនគរ គេមិនហ៊ានទិញទេព្រោះគ្មានលុយឲ្យ។ ទុគ្គតព្រាហ្មណ៍ក៏បញ្ចាំកែវទុកនៅនឹងសេដ្ឋីសិនចុះដើម្បីយកប្រាក់ទៅទិញអង្ករត្រីសាច់មកធ្វើម្ហូបចំណីបាយសម្លប្រគេនព្រះសង្ឃ ។
លុះក្រោយមកក៏បានយកកែវមណីនោះទៅថ្វាយព្រះរាជា ព្រះអង្គទ្រង់តាំងឲ្យធ្វើជាសេដ្ឋីក្នុងនគរនោះ ដល់អស់អាយុបានទៅកើតនៅក្នុងស្ថានសួគ៌ សោយសម្បត្តិទិព្វអស់កាលជាអង្វែង ។
ទាញយករឿងនេះមកបំភ្លឺឲ្យឃើញថា សទា្ធបើមានពិតប្រាកដហើយ អាចរក្សានូវសម្បត្តិ ដែលប្រុងនឹងវិនាសហើយមិនឲ្យវិនាសទៅវិញ ហើយញុំាងប្រយោជន៍ឲ្យសម្រេចបានដូចបំណងប្រាថ្នា ។
ចែករំលែកព័តមាននេះ