រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានព្រមានចំពោះសហគ្រាសគ្រឹះស្ថានណាដែលស្ថិតនៅក្រោមបញ្ញត្តិច្បាប់ស្តីពីការងារមិនបើកប្រាក់ខែ២ដងក្នុងមួយខែតាមផ្លូវច្បាប់ ។
ការព្រមាននេះ ខណៈដែលក្រសួងការងារបានចេញសេចក្តីប្រកាសមួយកាលពីពេលថ្មីកន្លមនេះដោយបានសម្រេចឲ្យសហគ្រាសទាំងអស់ត្រូវបើកប្រាក់ខែជូនកម្មករចំនួនពីរដងក្នុងមួយខែចាប់ពីខែមករា ឆ្នាំ២០១៩ តទៅ ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ឲ្យដឹងនៅថ្ងៃទី២៥ ខែកញ្ញា យ៉ាងដូច្នេះថា ៖«សហគ្រាស គ្រឹះស្ថានទាំងអស់ដែលស្ថិតនៅក្រោមបទបញ្ញត្តិស្តីពីការងារចាប់ពីខែមករា ឆ្នាំ២០១៩ ទៅត្រូវបើកប្រាក់ឈ្នួលចំនួន២ដង ។ សប្តាហ៍ទី២ត្រូវបើកប្រាក់ឈ្នួល៥០%ត្រូវយកប្រាក់ឈ្នួលមូលដ្ឋាន ហើយសប្តាហ៍ទី៤ ត្រូវគិតសរុបទាំងប្រាក់បន្ទាប់សន្សំផ្សេង» ។
ចំពោះ ក្រុមហ៊ុន សហគ្រាស ណាដែលមិនអនុវត្តត្រូវបានលោករដ្ឋមន្ត្រីក៏បានគូសបញ្ជាក់ថា ៖«មិនបានទេ នេះជាប្រកាស បើមិនអនុវត្តគឺត្រូវទទួលផាកពិន័យ ហើយផាកពិន័យមិនស្តាប់ទេ ត្រូវបញ្ជូនទៅតុលាការ» ។
លោករដ្ឋមន្ត្រីបានបន្ថែមថា គ្រប់សហគ្រាសទាំងអស់ រួមមានផ្នែកឧស្សាហកម្ម និងសេវាកម្ម ត្រូវតែអនុវត្តតាមប្រកាសរបស់ក្រសួងការងារជាចាំបាច់ ។
សូមជម្រាបថា ក្រសួងការងារ និងបណ្តុះបណ្តាលវិជ្ជាជីវៈបានសម្រេចឲ្យថៅកែរោងចក្រទាំងអស់ត្រូវបើកប្រាក់ខែជូនកម្មករនិយោជិកក្នុង១ខែពីដងចាប់ពីដើមឆ្នាំ២០១៩តទៅ ។
យោងតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈចេញផ្សាយកាលពីថ្ងៃទី២១ ខែកញ្ញា ឆ្នាំ២០១៨ បានសម្រេចយ៉ាងដូច្នេះថា ចាប់ពីខែមករា ឆ្នាំ២០១៩ តទៅម្ចាស់សហគ្រាសគ្រឹះស្ថានទាំងឡាយណា ដែលស្ថិតនៅក្រោមបទបញ្ញត្តិនៃច្បាប់ស្តីពីការងារត្រូវរៀបចំឲ្យមានការបើកប្រាក់ឈ្នួលជួនកម្មករនិយោជិតចំនួន២ដងក្នុងមួយខែ ដោយត្រួវបើកលើកទី១ក្នុងសប្តាហ៍ទី២(ចំនួន៥០% (ហាសិបភាគរយ) នៃប្រាក់ឈ្នួលសុទ្ធសាធក្នុងមួយខែ) និងលើកទី២ក្នុងសប្តាហ៍ទី៤ (ស្មើនឹងចំនួនប្រាក់ឈ្នួលសុទ្ធសាធដែលនៅសល់ប្រាក់ឈ្នួលបន្ទាប់បន្សំ និងអត្ថប្រយោជន៍ផ្សេងៗទៀតដែលកម្មករនិយោជិតត្រូវទទួលបាននៅក្នុងខែនីមួយៗ) ៕
ចែករំលែកព័តមាននេះ