រាជធានីភ្នំពេញ ៖ ឃើញគោដេកនៅតាមផ្លូវចុះដេញគោត្រូវបុរសស្រវឹងស្រាបើកបុករថយន្តពីក្រោយ ដែលគ្រោះថ្នាក់ចរាចរណ៍នេះបង្កឲ្យមានការភ្ញាក់ផ្អើល កាលពីវេលាម៉ោង១និង៤០នាទីរំលងអធ្រាត្រឈានចូលថ្ងៃទី២៦ ខែកញ្ញា ឆ្នាំ២០១៨ នៅតាមបណ្ដោយផ្លូវសហព័ន្ធរុស្ស៊ី ទល់មុខព្រលានយន្តហោះអន្តរជាតិភ្នំពេញ ស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
រថយន្តបង្កដែលស្រវឹងស្រាម៉ាកកូរ៉ូឡា ពណ៌ស្ករ ពាក់ស្លាកលេខភ្នំពេញ 2L- 8347 បើកបរក្នុងទិសដៅពីកើតទៅលិច ក្នុងស្ថានភាពស្រវឹងជោគ ។ ចំណែករថយន្តរងគ្រោះម៉ាកកាមរីគូថស្វិត ពណ៌ស បើកបរក្នុងទិសដៅពីកើតទៅលិច ដែលឈប់ចតដេញគោ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុគេឃើញគោមួយហ្វូងកំពុងដេកតាមផ្លូវ ធ្វើឲ្យមានគ្រោះថ្នាក់ដល់ម៉ូតូជាងច្រើនគ្រឿង តែរងរបួសស្រាល ហើយបើកទៅបាត់អស់ទៅ បន្ទាប់មកឃើញរថយន្តរងគ្រោះម៉ាកគូថស្វិត ពណ៌ស ពាក់ស្លាកលេខភ្នំពេញ 2D- 6149 បើកក្នុងទិសដៅពីកើតទៅលិចបានចុះដេញគោខាងលើ ដោយបើកភ្លើងសុំផ្លូវភ្លឹបភ្លែតៗ បន្ទាប់មកទៀតស្រាប់តែឃើញរថយន្តបង្កម៉ាកកូរ៉ូឡា ពណ៌ស្ករខាងលើបើកក្នុងទិសដៅពីកើតទៅលិចក្នុងស្ថានភាពស្រវឹងបានបើកកៀររថយន្តជនជាតិចិនមួយគ្រឿងដែលចតតាមចិញ្ចើមផ្លូវរងការខូចខាតតិចតួច ហើយរថយន្តកូរ៉ូឡាខាងលើជ្រុលទៅបុករថយន្ត កាមរីគូថស្វិត ដែលម្ចាស់ចុះដេញគោបានបុកចំផ្នែកខាងក្រោយពេញទំហឹង បណ្តាលឲ្យរងការខូចខាតយ៉ាងធ្ងន់ធ្ងរ រហូតបើកទៅមុខមិនរួចរៀងៗខ្លួន ។
ប្រភពព័ត៌មានដដែលបានបន្តទៀតថា ខណៈពេលភ្លាមៗភាគីបង្កខាងលើបានទាក់ទងហៅបុរសម្នាក់ជាយោធាដោយប្រាប់ទៅភាគីរថយន្តរងគ្រោះថា ខ្ញុំសក្ដិធំដែរ តើចង់ម៉េច ? ចំណែកភាគីរថយន្តរងគ្រោះក៏ឆ្លើយថា ខ្ញុំក៏សក្ដិមិនតូចដែរ កុំយកសក្ដិមកអួតចរាចរណ៍ដោះស្រាយតាមចរាចរណ៍ទៅ ។
ក្រោយពេលកើតហេតុភាគីទាំង២ខាងលើបានសម្របសម្រួលនៅកន្លែងកើតហេតុ ដោយបញ្ចប់រឿង ដោយរថយន្តបង្កសងសំណងទៅរថយន្តរងគ្រោះចំនួន២២០ដុល្លារ ៕
ចែករំលែកព័តមាននេះ