រាជធានីភ្នំពេញ ៖ ជនសង្ស័យម្នាក់ដែលជាមុខសញ្ញាចាស់ពូកែខាងលួច ឆក់ និងឆបោកនោះកន្លងមកតែងធ្វើ សកម្មភាព នៅក្នុងភូមិសាស្ត្រខណ្ឌពោធិ៍សែនជ័យ ហើយធ្លាប់ត្រូវបាននគរបាលចាប់ខ្លួនពីបទលួច២លើក មកហើយនោះ។ ពេលនេះស្រាប់តែលេចមុខទៅធ្វើសកម្មភាពឆបោកជនជាតិចិនដែលជាម្ចាស់ហាងលក់អីវ៉ាន់ មួយកន្លែងនៅក្នុងខណ្ឌ៧មករាម្តង ដោយបានកុម្មង់ស្រាបៀរចំនួន១០កេស បាយម្ហូប៥មុខ និងលុយ១០០ដុល្លារ ។ ប៉ុន្តែល្បិចបោកនោះត្រូវបានម្ចាស់ហាងមានការសង្ស័យ ក៏បានរាយការណ៍ទៅនគរបាលឲ្យចុះទៅឃាត់ខ្លួន ភ្លាមៗ រួចនាំទៅសាកសួរទើបធ្លាយរឿងបោកពិតមែន។
ហេតុការណ៍នេះបានកើតឡើងកាលពីវេលាម៉ោង២ និង១០នាទីរសៀល ថ្ងៃទី២៥ ខែកញ្ញា ឆ្នាំ២០១៨ នៅហាងលក់អីវ៉ាន់យីហោ «វើយ សៀង» ដែល មានទីតាំងស្ថិតនៅតាមបណ្តោយផ្លូវលេខ១២៨ សង្កាត់មនោរម្យ ខណ្ឌ៧មករា រាជធានីភ្នំពេញ។ ជនសង្ស័យខាងលើឈ្មោះ អេង លី អាយុ២២ឆ្នាំ មានទីលំនៅផ្ទះជួល ក្នុងភូមិប៉ប្រកខាងត្បូង ក្នុងសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ និងមានស្រុកកំណើតនៅខេត្តសៀមរាប ចំណែកជនរងគ្រោះដែលជា ម្ចាស់ហាង គឺជាជនជាតិចិន។
ស្ត្រីម្នាក់ឈ្មោះ វន ម៉ី អាយុ២៧ឆ្នាំ ជនជាតិខ្មែរ ដែលជាបុគ្គលិក និងជាអ្នកបកប្រែភាសាចិនប្រចាំហាងមួយនោះបាននិយាយថា នៅមុនពេលកើតហេតុជនសង្ស័យខាងលើ បានមកក្នុងហាង ហើយបានកុម្មង់បាយ និងម្ហូបចំនួន៥មុខ រួមនឹងស្រាបៀរកម្ពុជាចំនួន១០កេស។ ខណៈនោះបុគ្គលិកហាងបាននាំគ្នាលើកស្រាបៀរឲ្យ ហើយជននេះបានប្រាប់ឲ្យទុកនៅមុខហាង ដោយរង់ចាំយកបាយម្ហូបទៀត។ ប្រភពដដែលបានបន្តទៀតថា បន្ទាប់មក ជនសង្ស័យបានប្រាប់ឲ្យបុគ្គលិកហាងទៅយកលុយរាយដុល្លារចំនួន១០០ដុល្លារ មកឲ្យខ្លួនទៀត រួចបាននិយាយថា «ចាំចែខ្ញុំមកចាំគិតលុយសរុបទាំងអស់តែម្តងទៅទាំងទាំងថ្លៃស្រាបៀរ ថ្លៃបាយម្ហូប និងលុយ១០០ដុល្លារនេះ»។
ខណៈនោះម្ចាស់ហាងមានការសង្ស័យក៏បានឲ្យនាងជាអ្នកបកប្រែជួយប្ដឹង នគរបាលប៉ុស្តិ៍មនោរម្យ ចុះទៅឃាត់ខ្លួនតែម្តង បន្ទាប់មកបាននាំជននេះទៅសាកសួរនៅប៉ុស្តិ៍ ហើយទើបបានដឹងថា ជននេះពិតជាធ្វើសកម្មភាពបោកជនរងគ្រោះខាងលើយ៉ាងពិតប្រាកដមែន។ សូមបញ្ជាផងដែរថា ជនសង្ស័យខាងលើនេះគឺជាមុខសញ្ញាឆបោក និងលួចយ៉ាងសកម្មនៅក្នុងខណ្ឌ ពោធិ៍សែនជ័យ ហើយក៏ធ្លាប់ត្រូវបាននគរបាលខណ្ឌពោធិ៍សែនជ័យឃាត់ខ្លួនបាន២លើករួចមកហើយ។
គឺលើកទី១ចាប់ខ្លួនខណៈពេលលួចទូរស័ព្ទដៃនៅក្នុងសង្កាត់ចោមចៅ៣ និងលើកទី២ឃាត់ខ្លួនក្រោយចូលផឹកស៊ី នៅហាងមួយស្ថិតក្នុងភូមិសាស្ត្រសង្កាត់កាកាប១ អត់ឲ្យលុយគេ ហើយក៏នៅមានការប្រព្រឹត្តបទល្មើស ជាច្រើនទៀតផងដែរ។ ពេលនេះនគរបាលប៉ុស្តិ៍មនោរម្យ ខណ្ឌ៧មករាបានធ្វើការ សាកសួរ និងកសាងសំណុំរឿងដើម្បីចាត់ការតាមផ្លូវច្បាប់ហើយ៕
ចែករំលែកព័តមាននេះ