ខេត្តកំពង់ធំ ៖ ស្ត្រីម្នាក់បានឈឺពោះឆ្លងទន្លេប្តីឌុបតាមម៉ូតូទៅមណ្ឌលសុខភាព តែទៅមិនទាន់ដល់ផង ក៏បានឆ្លងទន្លេតាមផ្លូវតែម្ដង។ ហេតុការណ៍នេះបានបណ្តាលឲ្យមានការភ្ញាក់ផ្អើលដល់ប្រជាពលរដ្ឋ និងអាជ្ញាធរកាលពីវេលាម៉ោង១០ និង៥០នាទីព្រឹក ថ្ងៃទី២៥ ខែកញ្ញា…
ខេត្តកំពង់ធំ ៖ ស្ត្រីម្នាក់បានឈឺពោះឆ្លងទន្លេប្តីឌុបតាមម៉ូតូទៅមណ្ឌលសុខភាព តែទៅមិនទាន់ដល់ផង ក៏បានឆ្លងទន្លេតាមផ្លូវតែម្ដង។ ហេតុការណ៍នេះបានបណ្តាលឲ្យមានការភ្ញាក់ផ្អើលដល់ប្រជាពលរដ្ឋ និងអាជ្ញាធរកាលពីវេលាម៉ោង១០ និង៥០នាទីព្រឹក ថ្ងៃទី២៥ ខែកញ្ញា ឆ្នាំ២០១៨ នៅតាមផ្លូវពីឃុំមានរិទ្ធ ស្រុកសណ្តាន់ ទៅកាន់មណ្ឌុលសុខភាពសណ្តាន់ ខេត្តកំពង់ធំ។ ប្រភពព័ត៌មានពីប្រជាពលរដ្ឋប្រាប់ថា ស្ត្រីដែលមានផ្ទៃពោះគ្រប់ខែឆ្លងទន្លេតាមផ្លូវឈ្មោះ អ៊ុ ផាន អាយុ២៧ឆ្នាំ មានប្ដីឈ្មោះ ភូមិ ផន អាយុ៣០ឆ្នាំ រស់នៅភូមិជាំស្វាយ ឃុំមានរិទ្ធ ស្រុកសណ្ដាន់ ខេត្តកំពង់ធំ។
បើយោងតាមបុរសជាប្តីនិយាយថា ភរិយារបស់លោកមានផ្ទៃពោះគ្រប់ខែ តែមិនដឹងថាត្រូវសម្រាលនៅពេលណា លុះនៅព្រឹកថ្ងៃកើតហេតុ ប្រពនន្ធរបស់គាត់ប្រាប់គាត់ថា នាងឈឺពោះហើយ ឮដូច្នោះរូបគាត់ជាប្តីក៏ប្រញាប់ឌុបប្រពន្ធដោយម៉ូតូ ក្នុងគោលបំណងយកនាងទៅ សម្រាលកូននៅឯមណ្ឌលសុខភាពសណ្តាន់។ នៅពេលកំពុងជិះម៉ូតូមកដល់ពាក់កណ្តាលផ្លូវ ត្រង់ចំណុចអូរពកសាមគ្គី ឃុំមានរិទ្ធ ដោយសារតែផ្លូវពិបាកពេក ខ្លាចដួលព្រោះផ្លូវរអិល ក៏បានឈប់ម៉ូតូឲ្យប្រពន្ធចុះដើរតិចៗ។ ពេលនាងដើរបានមួយសន្ទុះតូច នាងថាឈឺពោះខ្លាំងណាស់ ទ្រាំមិនបានទេ គាត់ក៏ដាក់ឲ្យប្រពន្ធសម្រាកនៅក្រោមដើមឈើ ក៏ឆ្លងទន្លេបានកូនប្រុសម្នាក់តាមផ្លូវ ទើបបង្កឲ្យមានការភ្ញាក់ផ្អើលដល់អ្នកភូមិដែលនៅជិតនោះនាំគ្នារត់មកចោមរោមមើល និងជួយសង្គ្រោះស្ត្រីកូនខ្ចីនេះ។
អ្នកខ្លះបានទូរស័ព្ទប្រាប់លោកអភិបាលស្រុក បន្ទាប់ពីទទួលបានដំណឹងនេះ លោក ឡង គឺសឹង អភិបាលស្រុកសណ្តាន់ ក៏បានឲ្យខាងរថយន្តសង្គ្រោះរបស់មណ្ឌលសុខភាពសណ្តាន់ និងក្រុមគ្រូពេទ្យ ទៅជួយអន្ដរាគមន៍ដឹកយកមកជួយសង្គ្រោះនៅមណ្ឌលសុខភាពស្រុកសណ្ដាន់ ដោយមើលឃើញពីកង្វះខាតរបស់ប្តីប្រពន្ធទាំងពីរ លោកអភិបាលស្រុក និងសហការី ក៏បានពាំនាំយកនូវសម្ភារមួយចំនួន និងថវិកាចំនួន២០ម៉ឺនរៀល រួមជាមួយថវិការរបស់លោក សុខ លូ អភិបាលខេត្តកំពង់ធំ ចំនួន៥០ម៉ឺនរៀល ទៅជួយឧបត្ថម្ភដល់ប្តីប្រពន្ធខាងលើ។ ព្រមទាំងបានផ្តាំផ្ញើដល់អ្នកទាំងពីរត្រូវថែរក្សាសុខភាពឲ្យបានល្អ លើកក្រោយៗនៅពេលដែលមាន ផ្ទៃពោះទៀត ត្រូវតែមកពិនិត្យផ្ទៃពោះឲ្យបានត្រឹមត្រូវ និងទៀងទាត់ពេលវេលា។
លោកអភិបាលស្រុកផ្តាំផ្ញើយ៉ាងដូច្នេះ បន្ទាប់ពីបានសាកសួរអ្នកពីរនាក់ប្តីប្រពន្ធប្រាប់ថា ចាប់តាំងពីមានផ្ទៃពោះពេលណាមក ដោយសារតែជីវភាពក្រីក្រផង ពួកគេមិនដែលបាននាំប្រពន្ធមក ពិនិត្យផ្ទៃពោះម្តងណានោះទេ ទន្ទឹមនឹងនោះ លោកអភិបាលស្រុក ក៏បានថ្លែងអំណរគុណដល់បងប្អូន ប្រជាពលរដ្ឋដែលបានទូរស័ព្ទមកប្រាប់ដល់រូបលោកឲ្យបានដឹង និងជួយសង្គ្រោះបានទាន់ពេលវេលា៕
ចែករំលែកព័តមាននេះ