ខេត្តកំពង់ស្ពឺ ៖ ជនសង្ស័យម្នាក់ខឹងវាយបុរសម្នាក់ជាគូទំនាស់ក្នុងវង់ផឹកស៊ីជាមួយគ្នាមិនបាន ក៏លបមកផ្ទះឃើញប្រពន្ឋគេនៅផ្ទះតែម្នាក់ឯង បានស្ទុះវាយលើរាងកាយស្ត្រីរងគ្រោះ រហូតរបួសធ្ងន់ ត្រូវបញ្ជូនទៅព្យាបាលនៅមន្ទីរពេទ្យបង្អែក ។ ករណីបង្ករបួសស្នាមលើប្រពន្ឋគេនេះ បានកើតឡើងតាំងពីថ្ងៃទី២៣ ខែកញ្ញា ឆ្នាំ២០១៨ តែឃាត់ខ្លួនបាននៅថ្ងៃទី២៤ ខែកញ្ញា ឆ្នាំ២០១៨ ស្ថិតក្នុងភូមិស្តុកជ្រៃ ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។
ជនសង្ស័យខាងលើឈ្មោះកន សុខនីម ភេទប្រុស អាយុ១៩ឆ្នាំ ។ ចំណែកស្ត្រីរងគ្រោះឈ្មោះជិន ស្រីម៉ៅ អាយុ២៣ឆ្នាំ។ ពួកគេទាំង២នាក់រស់នៅភូមិកើតហេតុខាងលើជាមួយគ្នា។
ប្រភពព័ត៌មានពីក្រុមគ្រួសារស្ត្រីរងគ្រោះ បានឲ្យដឹងថា មុនកើតហេតុ នៅម៉ោងប្រមាណ៨ និង៣០នាទីយប់ថ្ងៃទី២៣ ខែកញ្ញា ឆ្នាំ២០១៨នេះ ស្ត្រីរងគ្រោះកំពុងនៅក្នុងផ្ទះតែម្នាក់ឯង ស្រាប់តែជនសង្ស័យចូលមកដល់គ្មានសួរនាំអ្វីមួយម៉ាត់សោះ បានស្ទុះវាយស្ត្រីរងគ្រោះជាច្រើនដៃ និងច្របាច់កប៉ុនប៉ងសម្លាប់ តែមានអ្នកជិតខាងរត់មកជួយទាន់ ទើបជនសង្ស័យរត់គេចខ្លួន។
ប្រភពដដែលបន្តថា ដោយសារស្ត្រីរងគ្រោះមានរបួសធ្ងន់ ក្រុមគ្រួសារក៏ប្រញាប់បញ្ជូនទៅព្យាបាលនៅមន្ទីរពេទ្យបង្អែកស្រុកភ្លាមៗ រួចបានប្តឹងសមត្ថកិច្ចតាមក្រោយ។
ប្រភពព័ត៌មានពីសមត្ថកិច្ច បានឲ្យដឹងថា ក្រោយទទួលពាក្យបណ្តឹងរួច សមត្ថកិច្ចបានចុះឃាត់ខ្លួនជនសង្ស័យបាននៅថ្ងៃទី២៤ ខែកញ្ញា ឆ្នាំ២០១៨ នេះ មកសាកសួរ។
នៅមុខសមត្ថកិច្ច ជនសង្ស័យបានឆ្លើយសារភាពថា មុនឈានដល់ប្រើហិង្សាលើស្ត្រីរងគ្រោះ គេ និងប្តីស្ត្រីរងគ្រោះឈ្មោះថន បានផឹកស៊ីជាមួយគ្នា ហើយបានបង្កជម្លោះពាក្យសម្តី តែដោយសារខឹងវាយប្តីមិនបាន ក៏មកផ្ទះឃើញស្ត្រីរងគ្រោះនៅផ្ទះតែម្នាក់ឯង ក៏ស្ទុះទៅវាយដើម្បីស្រាយគំនុំតែម្តង។
បច្ចុប្បន្ន ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់ការិយាល័យព្រហ្មទណ្ធចាត់ការតាមផ្លូវច្បាប់៕
ចែករំលែកព័តមាននេះ