សហរដ្ឋអាមេរិក ៖ សហរដ្ឋអាមេរិកបានប្រកាសកាលពីថ្ងៃទី២៤កញ្ញា ពីការលក់អាវុធជាថ្មីឲ្យដល់តៃវ៉ាន់ ចំថ្ងៃជាមួយគ្នានឹងការចូលជាធរមាន ការយកពន្ធគយថ្មីរបស់អាមេរិកលើបណ្ដាទំនិញចិន មានទឹកប្រាក់២០០ពាន់លានដុល្លារ។
នេះជាការសម្រេចថ្មីរបស់ក្រុងវ៉ាស៊ិនតោន ដែលប្រាកដណាស់ នាំឲ្យចិនផ្ទុះកំហឹងហើយអាចញ៉ាំងឲ្យមានការស្រុតចុះថែមទៀតនៃទំនាក់ទំនងចិន-អាមេរិក ដែលតានតឹងស្រាប់ដោយសង្គ្រាមពាណិជ្ចកម្មជំរុញដោយលោកដូណាល់ត្រាំ។
មន្ទីរប៉ង់តាហ្គោនគូសបញ្ជាក់ថា ក្រសួងការបរទេសបានអនុម័តលើការលក់គ្រឿងបន្លាស់សម្រាប់បណ្ដាយន្តហោះប្រដេញ ធុន F-16 និង F-5 ព្រមទាំងសម្រាប់យន្តហោះដឹកជញ្ជូនយោធាធុន C-130 ឲ្យដល់តៃវ៉ាន់ មានទឹកប្រាក់៣៣០លានដុល្លារ។
ប្រតិបត្តិការនោះនឹងរួមចំណែកដល់កិច្ចការពារសន្តិសុខរបស់សហរដ្ឋអាមេរិក ដោយកែលម្អសមត្ថភាពការពាររបស់តៃវ៉ាន់។ ក្រសួងនេះបន្តថា តៃវ៉ាន់នៅតែជាកម្លាំងសំខាន់នៃស្ថេរភាពនយោបាយ តុល្យភាពយោធា ព្រមទាំងនៃការរីកចម្រើនខាងសេដ្ឋកិច្ចក្នុងតំបន់។ សភាអាមេរិកមានពេល២សប្ដាហ៍ ដើម្បីជំទាស់នឹងការលក់នោះ តែតាមមើលទៅសភានឹងមិនជំទាស់ឡើយ។
ការប្រកាសនេះកើតមានខណៈពេលដែលក្រុងវ៉ាស៊ិនតោនពង្រឹងមិនឈប់ឈរ ឥរិយាបថរបស់ខ្លួនចំពោះក្រុងប៉េកាំង លើផ្នែកពាណិជ្ជកម្មក៏ដូចជាផ្នែកការទូត។ ចំណែកអនុរដ្ឋមន្ត្រីពាណិជ្ជកម្មចិនមួយរូប ថ្លែងនាថ្ងៃទី២៥ កញ្ញាថា ការចរចាពាណិជ្ជកម្មរវាងចិននិងសហរដ្ឋអាមេរិកពិបាកធ្វើណាស់ ពេលក្រុងវ៉ាស៊ិនតោនយកកាំបិតមកភ្ជង់កចិននោះ៕
ចែករំលែកព័តមាននេះ