ខេត្តសៀមរាប ៖ ដោយមានការគាំទ្រពីអង្គការអាគ្រីស៊ុត ប្រចាំនៅស្រុកបន្ទាយស្រី ប្រជាកសិករនៅតំបន់នោះបាននាំគ្នាដាំស្លឹកគ្រៃ ដើម្បីផ្គត់ផ្គង់លើទីផ្សារ និងចម្រាញ់ជាផលិតផលប្រេង ដែលអាចបង្កើតប្រាក់ចំណូលប្រចាំគ្រួសារ ។ បើតាមអ្នកស្រីម៉ៅ…
ខេត្តសៀមរាប ៖ ដោយមានការគាំទ្រពីអង្គការអាគ្រីស៊ុត ប្រចាំនៅស្រុកបន្ទាយស្រី ប្រជាកសិករនៅតំបន់នោះបាននាំគ្នាដាំស្លឹកគ្រៃ ដើម្បីផ្គត់ផ្គង់លើទីផ្សារ និងចម្រាញ់ជាផលិតផលប្រេង ដែលអាចបង្កើតប្រាក់ចំណូលប្រចាំគ្រួសារ ។
បើតាមអ្នកស្រីម៉ៅ រស់នៅឃុំព្រះដាក់ ស្រុកបន្ទាយស្រី បានប្រាប់កោះសន្តិភាពថា បច្ចុប្បន្ននេះ មានកសិករច្រើនគ្រួសារហើយដែលកំពុងដាំស្លឹកគ្រៃសម្រាប់លក់ជូនសហគមន៍ ដើម្បីយកទៅផ្គត់ផ្គង់ទីផ្សារនៅក្រុងសៀមរាប និងចម្រាញ់ជាប្រេងស្លឹកគ្រៃ ។ អ្នកស្រីបន្ដថា ៖« ដោយមានការគាំទ្រពីអង្គការអាគ្រីស៊ុត ពួកយើងចងក្រងជាក្រុមៗដើម្បីដាំស្លឹកគ្រៃសម្រាប់ផ្គត់ផ្គង់ទីផ្សារ និងផលិតជាប្រេង ដោយអង្គការនេះសម្លឹងឃើញទីផ្សារនាពេលអនាគត ផលិតផលនេះនឹងមានតម្រូវការខ្ពស់ ហើយបច្ចុប្បន្នក៏បានរៀបចំឲ្យមានទីតាំងសម្រាប់ចម្រាញ់ប្រេងស្លឹកគ្រៃនេះផងដែរ »។
កញ្ញា គង់ រដ្ឋា អ្នកទទួលបន្ទុកផ្នែកទីផ្សារនៃអង្គការអាគ្រីស៊ុត បានឲ្យដឹងថា ហេតុផលដែលអង្គការរៀបចំការផលិតប្រេងស្លឹកគ្រៃនេះដោយសារតដំណាំនេះកំពុងជួបបញ្ហាទីផ្សារ និងមានតម្លៃទាប ហើយយើងចង់ស្រោចស្រង់ទីផ្សារមួយនេះ។ ម្យ៉ាងទៀត នៅតំបន់នេះ ឆ្ងាយដាច់ស្រយាលពីទីប្រជុំជន ផលដំណាំផ្សេងៗដែលកសិករផលិតបានមិនសូវមានទីផ្សារ ដូច្នេះហើយទើបអង្គការអាគ្រីស៊ុត បង្កើតឲ្យមានទីតាំងសម្រាប់ចម្រាញ់ប្រេងស្លឹកគ្រៃ ដើម្បីបង្កើតចំណូលដល់ប្រជាសហគមន៍ក្នុងតំបន់ ។ កញ្ញាបញ្ជាក់ថា ៖« សម្រាប់គម្រោងចម្រាញ់ប្រេងស្លឹកគ្រៃនេះ បានចាប់ផ្តើមដំណើរការសាកល្បងនៅដើមឆ្នាំ២០១៨ ជាមួយនឹងក្រុមកសិករចំនួន២០គ្រួសារ ។ ចំណែកប្រេងដែលចម្រាញ់បាន ត្រូវលក់ឱ្យសហគមន៍ធំដើម្បីយកទៅផ្គត់ផ្គង់លើទីផ្សារ។ ទោះបីយ៉ាងណា បច្ចុប្បន្នប្រេងស្លឹកគ្រៃនេះកំពុងស្ថិតក្នុងដំណាក់កាលសាកល្បងពីអតិថិជននៅឡើយ »។
យ៉ាងនេះក្ដី កញ្ញាអះអាងថា ៖« ផលិតផលនេះនឹងទទួលបានការគាំទ្រលើទីផ្សារ ដោយសារតែវាជាប្រេងធម្មជាតិសុទ្ធ និងមានគុណភាពខ្ពស់ »។ ចំពោះតម្លៃវិញ អ្នកទទួលបន្ទុកផ្នែកទីផ្សាររូបនេះបញ្ជាក់ថា ៖« អង្គការអាគ្រីស៊ុតមិនទាន់កំណត់ជាក់លាក់នោះទេ ប៉ុន្ដែអាចខ្ពស់ជាងផលិតផលនាំចូលពីខាងក្រៅ ដែលសព្វថ្ងៃលក់លើទីផ្សារក្នុង១គីឡូក្រាមតម្លៃ៦០ដុល្លារ »។
ប្រធានក្រុមកសិករផលិតប្រេងស្លឹកគ្រៃ លោក ខឹម សម្រេច បានឱ្យដឹងថា ដោយសារតែវាជាដំណាក់កាលចាប់ផ្ដើម ដូច្នេះដំបូងការចងក្រងជាក្រុមមានតែ២០នាក់ប៉ុណ្ណោះ ព្រោះទីផ្សារមិនទាន់ដំណើរការល្អ ប៉ុន្ដែប្រសិនបើទីផ្សារមានការគាំទ្រច្រើន លោកនឹងបង្កើនសមាជិកបន្ថែម និងបង្កើនការផលិតដើម្បីបំពេញតម្រូវការទីផ្សារ ។
លោកក៏ស្នើឲ្យសមាជិកក្រុមទាំងអស់មានការអត់ធ្មត់ និងរង់ចាំទទួលផលទាំងអស់គ្នានៅពេលដ៏ខ្លីខាងមុខ ព្រោះប្រសិនបើទីផ្សារប្រេងស្លឹកគ្រៃ និងដំណាំស្លឹកគ្រៃដូចអ្វីដែលអង្គការអាគ្រីស៊ុតបានរំពឹងទុកនោះ យើងមិនត្រឹមតែដាំសម្រាប់ផ្គត់ផ្គង់ទីផ្សារក្នុងស្រុកប៉ុណ្ណោះទេ ថែមទាំងនាំចេញទៅក្រៅប្រទេសផងដែរ ៕
ចែករំលែកព័តមាននេះ