ខេត្តបាត់ដំបង ៖ សមត្ថកិច្ចបានរាយការណ៍ថា បុរសម្នាក់បានរត់គេចខ្លួន បន្ទាប់ពីប្រើកាំបិតចាក់ទៅលើបុរសម្នាក់ទៀត បណ្ដាលឲ្យរងរបួសធ្ងន់ក្នុងជម្លោះដ៏ឃោរឃៅមួយ កាលពីវេលាម៉ោង១១ និង៤៥នាទីថ្ងៃត្រង់ទី២៥ កញ្ញា នេះ ស្ថិតត្រង់ចំណុចផ្សារតាឡន ក្នុងភូមិត្រពាំងប្រលិត ឃុំសន្តិភាព ស្រុកសំពៅលូន។
សមត្ថកិច្ចបានឱ្យដឹងថា ជនដៃដល់ឈ្មោះ រ៉ូ រស់នៅកន្លែងកើតហេតុខាងលើ ។ ជននេះបានប្រើកូនកាំបិតចាក់ទៅលើឈ្មោះឆាន់ ពុត ភេទប្រុស អាយុ៣២ឆ្នាំ ត្រូវចំជើងមួយកាំបិត បណ្ដាលឲ្យរងរបួសធ្ងន់ ពេលមានការឈ្លោះប្រកែកគ្នាមួយប្រាវ ។ ប្រភពដដែលបានឱ្យដឹងទៀតថា ក្រោយពីចាក់គូបក្សដិបក្ស បណ្ដាលឱ្យរងរបួសហើយ ជនដៃដល់ឈ្មោះរ៉ូ ក៏បានរត់គេចខ្លួនបាត់ ពីកន្លែងកើតហេតុភ្លាមៗដែរ។
សមត្ថកិច្ចនិយាយថា ជនរងគ្រោះនិងជនដៃដល់ជាមនុស្សស្គាល់គ្នា តែគេមិនទាន់ដឹងអំពីមូលហេតុជាក់លាក់ ដែលនាំឱ្យពួកគេប្រើកាំបិតចាក់គ្នាបែបនេះនៅឡើយទេ ដោយគ្រាន់តែដឹងថា ពួកគេបានទាញកាំបិតចាក់គ្នាពេលកំពុងមានជម្លោះ។
ទោះជាយ៉ាងណា ពេលនេះ គេបានបញ្ជូនជនរងគ្រោះទៅកាន់មន្ទីរពេទ្យហើយ ខណ:កកម្លាំងសមត្ថកិច្ចកំពុងតាមស្វែងរកចាប់ខ្លួនជនដៃដល់ ។
ចែករំលែកព័តមាននេះ