ប្រទេសរុស្ស៊ី-អ៊ីស្រាអែល ៖ អ៊ីស្រាអែល កាលពីថ្ងៃទី២៤កញ្ញា បានព្រមានក្រុងមូស្គូពីបណ្ដាផលវិបាកនៃការសម្រេចរបស់ខ្លួន ពង្រឹងកិច្ចការពារអាកាសរបស់សម្ព័ន្ធមិត្តស៊ីរី ក្រោយការបាញ់ធ្លាក់ដោយច្រឡំយន្តហោះរុស្ស៊ីមួយគ្រឿង ដែលវិមានក្រឹមឡាំងទម្លាក់ការទទួលខុសត្រូវលើអ៊ីស្រាអែល។
មួយសប្ដាហ៍ក្រោយការកម្ទេចយន្តហោះធុន IL-20 មួយគ្រឿងរបស់កងទ័ពរុស្ស៊ី ពីលើសមុទ្រមីឌីទែរ៉ាណេ ដោយកងកម្លាំងការពារអាកាសស៊ីរីពេលតបតចំពោះការវាយប្រហាររបស់អ៊ីស្រាអែល រុស្ស៊ីបានបង្កើនភាពតានតឹងដោយប្រកាសពីការផ្ដល់ឲ្យស៊ីរី រយៈពេល២សប្ដាហ៍ទៀត បណ្ដាប្រព័ន្ធការពារអាកាស S-300 ខណៈស៊ីរីនាពេលបច្ចុប្បន្នមានតែប្រព័ន្ធមីស៊ីលS-200។ ប្រព័ន្ធមីស៊ីលS-300ពិតជាទំនើបជាងS-200។
ពេលទាក់ទងតាមទូរស័ព្ទជាមួយប្រធានាធិបតីរុស្ស៊ីលោកវ្ល៉ាឌីមៀរ ពូទីន នាយករដ្ឋមន្ត្រីអ៊ីស្រាអែល លោកបេនចាមីននេ តាន់យ៉ាហ៊ូ បានព្រមានថា ការផ្ទេរប្រព័ន្ធអាវុធទំនើបឲ្យធ្លាក់ក្នុងដៃពួកអ្នកគ្មានការទទួលខុសត្រូវ នឹងបង្កើនគ្រោះថ្នាក់ក្នុងតំបន់។ លោកបន្តថា អ៊ីស្រាអែលនឹងការពារសន្តិសុខព្រមទាំងផលប្រយោជន៍របស់ខ្លួន។
ទោះបីអ៊ីស្រាអែលខំបកស្រាយបែបណាចំពោះមូលហេតុនៃការបាញ់ធ្លាក់យន្តហោះរបស់ខ្លួន បណ្ដាលឲ្យមនុស្ស១៥នាក់ស្លាប់ លោកពូទីន នៅតែអះអាងទៅកាន់លោកនេតាន់យ៉ាហ៊ូថា ប្រាកដណាស់ដែលសកម្មភាពរបស់កងទ័ពអ៊ីស្រាអែលជាមូលហេតុសំខាន់នៃសោកនាដកម្មនេះ។
លោកអះអាងថា ការពង្រឹងសមត្ថភាពការពារនៃរបបលោកបាចាអាល់អាសាដ ប្រកាសប៉ុន្មានម៉ោងមុននេះ ដោយរដ្ឋមន្ត្រីការពារប្រទេសរុស្ស៊ី លោកស័រហ្គេយឆយហ្គូ សំដៅជាបឋមចៀសវាងរាល់ការគំរាមកំហែងដល់អាយុជីវិតរបស់កងយោធារុស្ស៊ី។
រយៈពេល២សប្ដាហ៍ទៀត កងទ័ពស៊ីរីនឹងទទួលប្រព័ន្ធការពារអាកាស S-300 ដែលការផ្ដល់សម្រេចកាលពីឆ្នាំ២០១០មានការយឺតយ៉ាវ មកពីការប្រឆាំងរបស់អ៊ីស្រាអែល ខណៈរុស្ស៊ីមានទំនាក់ទំនងល្អជាមួយប្រទេសនេះ។ ប្រព័ន្ធការពារនោះអាចស្ទាក់កម្ទេចបណ្ដាយន្តហោះក្នុងចម្ងាយជាង២៥០គីឡូម៉ែត្រ ហើយអាចវាយប្រហារដំណាលគ្នា បណ្ដាគោលដៅលើអាកាស។
បច្ចុប្បន្នមីស៊ីល S-300 ដែលរុស្ស៊ីគ្រប់គ្រងដាក់ពង្រាយនៅជុំវិញមូលដ្ឋាននាវាចរណ៍រុស្ស៊ី TARTOUS ហើយ S-400 ដ៏ទំនើបដាក់ពង្រាយនៅជុំវិញមូលដ្ឋានអាកាសចរណ៍HMEINIM ក្នុងប្រទេសស៊ីរីដូចគ្នា។
ម្យ៉ាងវិញទៀតការហោះហើររបស់បណ្ដាផ្កាយរណប បណ្ដារ៉ាដា និងប្រព័ន្ធគមនាគមន៍របស់បណ្ដាយន្តហោះយោធា ដែលវាយប្រហារលើបណ្ដាគោលដៅក្នុងដែនដីស៊ីរីនឹងត្រូវរំខានបំផ្លាញដោយប្រព័ន្ធអេឡិចត្រូនិក៕
ចែករំលែកព័តមាននេះ