រាជធានីភ្នំពេញ ៖ រហូតមកដល់ពេលនេះរយៈពេល២សប្តាហ៍ហើយដែលក្រុមកំប្លែងនាយ កុយ បានសម្តែងឡើងវិញនៅស្ថានីយទូរទស្សន៍សុីធីអិន ក្នុងកម្មវិធីសោភ័ណតន្ត្រី ។ បើទោះបីជាក្រុមកំប្លែងរបស់លោកបានសម្តែងឡើងវិញក៏ដោយ ប៉ុន្តែវត្តមានរបស់នាយ ចេក គឺមិនមានឡើយ ខណៈពេលកូនក្រុមបានបង្ហាញខ្លួនទាំងអស់ បូករួមទាំងអ្នកនាងឃ្មឹប ផងដែរ ។
ការមិនមានឳកាសសម្តែងឡើងវិញនេះធ្វើឲ្យនាយចេក សម្តែងការខកចិត្ត និងសម្តែងក្តីបារម្ភ ដ្បិតការលក់ដូររបស់គាត់បានខកខាន ដោយសារបញ្ហាសុខភាព ។ នាពេល ថ្មីៗកន្លងមកនៅលើហ្វេសប៊ុកនាយ ចេក បានបង្ហោះសារស្តែងថា «ថ្ងៃនេះរៀបចំរទេះរ៉ីម៉ក ស្អែកនឹងទៅលក់វិញមិនដឹង យ៉ាងម៉េចទេពីព្រោះឈឺ២០ថ្ងៃហើយ អ៊ីចឹងមិនដឹងលក់ដាច់មិនដាច់ បើមិនដាច់ទេមិនដឹងរកអីវិញ បើខាងសិល្បៈកប្លែងវិញមួយរយៈនេះដូចជាមិនទាន់មាននរណាប្រាប់សោះ អុីចឹងរង់ចាំមើលក្នុងក្រុមក្រែងគេគិតថាខ្ញុំឈឺបានមិនទាន់ប្រាប់ »។
ទាក់ទិនរឿងនេះមិនទាន់មានការបញ្ជាក់ពីមូលហេតុយ៉ាងណាពីនាយកុយ ដែលជាមេក្រុមកំប្លែងរបស់នាយចេកនៅឡើយទេ ។ ប៉ុន្តែបើតាមការបញ្ជាក់ប្រាប់ពីនាយចេក ដល់ប្រិយមិត្តអ្នកគាំទ្រឲ្យដឹងថា «មេក្រុមគេថាលុយតិចហៅគ្នាច្រើន បានលុយពីណាចែក ។ ពីមុនចេះចែករំលែកកើត ចុះអីឡូវ ! បានន័យឲ្យយើងឈប់ហើយ »។
ក្រុមកំប្លែងនាយកុយ បានបង្ហាញវត្តមានសម្តែងជាថ្មីឡើងវិញ បន្ទាប់ពីអាក់ខានមួយរយៈពេលយូរ ។ ចូលរួមសម្តែងជាថ្មីមាននាយ ហុងដា នាយក្រិន នាយសានម៉ៅ នាងឃ្មឹប នាងប្រិបប្រិយ ជាមួយនឹងអ្នកល្ខោនបាសាក់មួយរូប ដោយឡែកនាយចេក និងអ្នកនាងគ្រត មិនឃើញមានវត្តមានសម្តែងទេ ៕
ចែករំលែកព័តមាននេះ