ឈ្វេងយល់ពីប្រវត្តិពិធីបិណ្ឌភ្ជុំ
ប្រជាជនខ្មែរយើងបាននាំគ្នាប្រារព្ធពិធីបុណ្យនេះឡើងជារៀងរាល់ឆ្នាំមិនដែលអាក់ខានឡើយគឺ ចាប់ពីថៃ្ង ១រោច ខែភទ្របទ រហូតដល់ថៃ្ង១៥រោច ដែលមានរយៈពេល ១៥ថៃ្ង យើងតែងហៅថាបិណ្ឌ1, បិណ្ឌ2 បិណ្ឌ៣……
ប្រជាជនខ្មែរយើងបាននាំគ្នាប្រារព្ធពិធីបុណ្យនេះឡើងជារៀងរាល់ឆ្នាំមិនដែលអាក់ខានឡើយគឺ ចាប់ពីថៃ្ង ១រោច ខែភទ្របទ រហូតដល់ថៃ្ង១៥រោច ដែលមានរយៈពេល ១៥ថៃ្ង យើងតែងហៅថាបិណ្ឌ1, បិណ្ឌ2 បិណ្ឌ៣… និងថៃ្ងបញ្ចប់គឺជាថៃ្ង បិណ្ឌភ្ជុំ។ បិណ្ឌភ្ជុំជាពិធីបុណ្យមួយ ក្នុងចំណោមពិធីបុណ្យធំៗដទៃទៀតនៃព្រះរាជពិធីត្រូវបានធ្វើឡើងតាមបែបព្រះពុទ្ធសាសនា ។
ពាក្យថា បិណ្ឌភ្ជុំ មកពីពាក្យបិណ្ឌបូកជាមួយនឹងពាក្យភ្ជុំ ដែលមានន័យថា បិណ្ឌ ជាភាសាបាលីប្រែថា ដុំបាយ ឯភ្ជុំគឺការប្រមូលផ្តុំ ឬប្រជុំ ដូច្នេះអាចទាញពាក្យនេះជារួម ឱ្យងាយស្តាប់បានគឺ ការប្រជុំ ឬប្រមូលផ្តុំដុំបាយ ។
តាមដែលធ្លាប់ចំណាំមកជារៀងរាល់ឆ្នាំ នៅពេលដល់ថ្ងៃដែលត្រូវប្រារព្ធពិធីបុណ្យបិណ្ឌភ្ជុំ បងប្អូនកូនចៅជាសាច់ញាតិទោះនៅទីជិត ឬទីឆ្ងាយ តែងតែធ្វើដំណើរទៅជួបជុំឪពុកម្ដាយនៅស្រុកកំណើត ដើម្បីជូនប្រាក់កាក់ សម្លៀកបំពាក់ គ្រៀងបរិក្ខារផ្សេងៗ និងរៀបចំម្ហូបអាហារ បាយសម្ល ធ្វើចង្ហាន់យកទៅប្រគេនព្រះសង្ឃដែលគង់នៅវត្តអារាមដើម្បីឧទ្ទិសដល់ បេតបុគ្គលជា ញាតិសន្តានទាំងឡាយ ដែលបានចែកឋានទៅ ហើយ មិនដឹងជាទៅចាប់កំណើតនៅលោកខាងមុខជាអ្វីនោះ។ ប៉ុនែ្តបើតាមអ្នកប្រាជ្ញខាងព្រះពុទ្ធសាសនាលោកបានចែកន័យបិណ្ឌភ្ជុំជាបីផ្នែកគឺ :
១-ធ្វើដើម្បីឧទិ្ទសកុសលចំពោះបេតបុគ្គល ឬប្រេតបុគ្គល (ពាក្យ បេត ជាពាក្យបាលី ឯពាក្យ ប្រេត ជាពាក្យសំស្ក្រឹត ។
២-ប្រារព្ធដើម្បីឲ្យបានសុខចម្រើន មានសិរីសួស្តីដែលកើតពីផលទានរបស់ខ្លួន។
៣-ដើម្បីបង្កើតសាមគ្គីភាពរបស់ជាតិ គឺការស្រុះស្រួលគ្នាទាំងពេលវេលាកំណត់ ទាំងការធ្វើនំគម នំអន្សម ពេញទូទាំងព្រះរាជាណាចក្រកម្ពុជា ។
កាលពីដើមគេធ្វើពិធីបុណ្យនេះដើម្បីរៀបចំធ្វើសង្ឃភត្ត ទំនុកបម្រុងព្រះសង្ឃដែលគង់ចាំវស្សាក្នុងវត្តរយៈពេល៣ខែ ចាប់តាំងពីថ្ងៃចូលវស្សារហូតដល់ថ្ងៃចេញវស្សា ព្រោះនៅក្នុងរដូវវស្សានេះមានភ្លៀងធ្លាក់ជោកជាំធ្វើឲ្យមានការលំបាកដល់ព្រះសង្ឃក្នុងពេលធ្វើគោចរបិណ្ឌបាត។
ហេតុដូច្នេះទើបបណ្ដាពុទ្ធបរិស័ទនាំគ្នារៀបចំពិធីនេះ ដើម្បីផ្គត់ផ្គង់ព្រះសង្ឃប្រចាំថ្ងៃរហូតដល់ថ្ងៃចេញវស្សា។ ម្យ៉ាងវិញទៀត នៅក្នុងពិធីបុណ្យនេះ ផងដែរធ្វើឡើងដើម្បីឧទ្ទិសកុសលផលបុណ្យដល់ពពួកប្រេតជាញាតិទាំង៧សន្តាន ដែលតំណញាតិជាច្រើនមហាកប្បនេះ រស់រងទុក្ខវេទនា កើតជាប្រេតមានកម្មពៀរ ជាប់ទោសធ្ងន់ រងកម្មក្រហល់ក្រហាយអត់ឃ្លានផង ដោយអានុភាពនៃសង្ឃគតាទក្ខិណាទាននេះទៅជួយយិតយោងសណ្តោងវិញ្ញាណក្ខន្ធបេតបុគ្គលទាំងនោះបានរួចចាកផុតពីក្ដីលំបាកសោកសៅ ទៅកើតក្នុងសុគតិភព ។
ចែករំលែកព័តមាននេះ