រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យនិងខណ្ឌដង្កោ បានបើកធ្វើវេទិកាសាធារណៈជាបន្ទាន់មួយ ដើម្បីទទួលយកសំណូមពរ និងផលលំបាកនានារបស់ប្រជាពលរដ្ឋ នៅក្នុងសហគមន៍បុរីសន្តិភាព២ និងដោះស្រាយរាល់បញ្ហាព្រមទាំងសំណូមពរទាំងឡាយជូនពួកគាត់ ។ វេទិកាសាធារណៈនេះ បានធ្វើឡើងកាលពីវេលាម៉ោង៨ព្រឹកថ្ងៃទី២៤ កញ្ញា នៅក្នុងបុរីសន្តិភាព២ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ ។ វេទិកានេះបានធ្វើឡើង ក្រោយពេល១ថ្ងៃដែលប្រជាពលរដ្ឋជាង៣០០គ្រួសារនាំគ្នាធ្វើការទាមទារសុំឲ្យក្រសួងមហាផ្ទៃ កាត់តំបន់គាត់រស់នៅចេញពីខណ្ឌពោធិ៍សែនជ័យ ចូលទៅខណ្ឌដង្កោ
វិញ ។
តាមប្រភពព័ត៌មានបានឲ្យដឹងថា ខាងអាជ្ញាធរខណ្ឌពោធិ៍សែនជ័យ ដឹកនាំដោយលោកអភិបាលខណ្ឌ ហែម ដារិទ្ធិ និងមានការអញ្ជើញចូលរួមដោយលោកវរសេនីយ៍ឯក យឹម សារ៉ាន់ អធិការនគរបាលខណ្ឌ និងលោក សើន កែវវណ្ណធី មេបញ្ជាការរងកងរាជអាវុធហត្ថខណ្ឌ ព្រមទាំមន្ត្រីក្រោមឱវាទ អាជ្ញាធរសង្កាត់ និងនាយប៉ុស្ដិ៍នគរបាលចោមចៅ២ផងដែរ ។ ដោយឡែក ខាងខណ្ឌដង្កោ ដឹកនាំដោយលោក អភិបាលខណ្ឌ
នុត ពុធដារ៉ា និងមានការអញ្ជើញចូលរួមពីលោកវរសេនីយ៍ឯក ជឹម ស៊ីថា អធិការនគរបាលខណ្ឌ លោក ស សុភ័ណ្ឌ មេបញ្ជាការកងរាជអាវុធហត្ថខណ្ឌ ព្រមទាំងមន្ត្រីក្រោមឱវាទ រួមនឹងអាជ្ញាធរសង្កាត់ និងនាយប៉ុស្តិ៍នគរបាលពងទឹក ។
ប្រភពដដែលឲ្យដឹងទៀតថា នៅក្នុងខណៈនោះ ស្ថានភាពក្ដៅបានកើតមានឡើងយ៉ាងខ្លាំង ដោយសារតែប្រជាពលរដ្ឋមាន២ភាគី គឺភាគីទី១ ដឹកនាំដោយប្រធានសហគមន៍ទាំង៧របស់បុរីសន្តិភាព២ ដែលមិនចង់ឲ្យមានការផ្លាស់ប្ដូរពីខណ្ឌមួយ ទៅខណ្ឌមួយ ។ រីឯភាគីទី២ គឺប្រជាពលរដ្ឋដែលធ្វើការទាមទារសុំឲ្យកាត់ពួកគាត់ចេញពីខណ្ឌពោធិ៍សែនជ័យ ចូលទៅក្រោម ការគ្រប់គ្រងរបស់ខណ្ឌដង្កោវិញ ។ ភាគីទាំង២ បានផ្ទុះពាក្យសម្ដីដាក់គ្នាទៅវិញទៅមក និងបានលើកពីហេតុផលលំបាក និងងាយស្រួលតែរៀងៗខ្លួន ។
ប្រភពខាងលើបន្តថា ភាគីខាងប្រជាពលរដ្ឋដែលចង់ប្ដូរការគ្រប់គ្រងថ្មីនោះ បានចោទប្រកាន់ទៅលើប្រធានសហគមន៍ទាំង៧របស់បុរីសន្តិភាព២ថា មិនចង់ផ្លាស់ប្ដូរចេញពីខណ្ឌពោធិ៍សែនជ័យ ព្រោះតែខ្លាចបាត់បង់លាភសក្ការៈដោយមិនបានគិតគូរពីទុក្ខលំបាករបស់ពួកគាត់ដែលកំពុងរស់នៅដោយការលំបាកគ្រប់បែបយ៉ាងនោះ ។ មិនតែប៉ុណ្ណោះ ពួកគាត់ទាំងនោះក៏បានធ្វើការចោទប្រកាន់ទៅលើអាជ្ញាធរ និងសមត្ថកិចខណ្ឌពោធិ៍សែនជ័យថា អសមត្ថភាពក្នុងការបង្ក្រាបចោរលួច ចោរគាស់ផ្ទះ គ្រឿងញៀន និងល្បែងស៊ីសងគ្រប់ប្រភេទ កន្ទុយលេខជាដើម ជាពិសេសបញ្ហាសេវាសាធារណៈមិនបានល្អតែម្ដង មិនមើលផ្លូវថ្នល់ និងមិនគិតគូរពីបញ្ហាអនាម័យនៅក្នុងមូលដ្ឋានឡើយ ។ សូម្បីតែបាត់លិខិតស្នាមឬអត្តសញ្ញាណប័ណ្ណ ចង់បើកថ្មីនគរបាលទារលុយ៥០ដុល្លារ ចំណែកមេភូមិប្រធានសហគមន៍ នៅពេលពួកគាត់ត្រូវការម្ដងៗគឺដឹងតែពីលុយប៉ុណ្ណោះ ។ ដោយសារតែបែបនេះ ទើបពួកគាត់ចង់សុំឲ្យកាត់ចេញពីខណ្ឌពោធិ៍សែនជ័យចូលទៅខណ្ឌដង្កោវិញ ព្រោះរស់នៅក្នុងខណ្ឌដង្កោមានសេចក្ដីសុខជាង ។
ប្រភពដដែលបានបន្តថា ចំណែកខាងភាគីប្រធានសហគមន៍ និងអ្នកគាំទ្រ បានលើកឡើងតបវិញថា ការរស់នៅក្រោមការគ្រប់គ្រងរបស់រដ្ឋបាលខណ្ឌពោធិ៍សែនជ័យសព្វថ្ងៃគឺមានសេចក្តីសុខគ្រប់បែបយ៉ាងទាំងអស់ មិនដែលមានបញ្ហាអ្វីឡើយ ទាំងផ្នែកសន្តិសុខ សណ្ដាប់ធ្នាប់ និងសេវាសាធារណៈជាដើម ហើយ
គ្មានចោរលួច ចោរប្លន់ ចោរគាស់ផ្ទះនោះឡើយរីឯបញ្ហាគ្រឿងញៀនក៏មិនមានច្រើនដែរ ។ ពួកគាត់សូមប្រឆាំងមិនឲ្យផ្ទេរចេញពីក្រោមការគ្រប់គ្រងរបស់រដ្ឋបាលខណ្ឌពោធិ៍សែនជ័យឡើយ នៅទីណាបានសុខ ពួកគាត់ចង់នៅទីនោះរហូត ។
បន្ទាប់ពីមានការជជែកជះដាក់គ្នាទៅវិញទៅមករហូតប៉ពាល់យ៉ាងខ្លាំងដល់អាជ្ញាធរ និងសមត្ថកិច្ចខណ្ឌពោធិ៍សែនជ័យរួចមក បានបង្កឲ្យវេទិកាសាធារណៈនោះ មានភាពក្ដៅគគុក ហើយនៅក្នុងខណៈនោះ ស្ទើរតែផ្ទុះហិង្សាទៀតផង ។ ភ្លាមៗនោះ លោក ហែម ដារិទ្ធិ អភិបាលខណ្ឌពោធិ៍សែនជ័យ បានថ្លែងប្ដេជ្ញាថានឹងបម្រើប្រជាពលរដ្ឋឲ្យបានល្អ និងទទួលយកនូវសំណូមពររបស់បងប្អូនប្រជាពលរដ្ឋទៅដោះស្រាយជូន ហើយក៏កែលម្អរាល់ចំណុចខ្វះខាតទាំងឡាយផងដែរ ។ដោយឡែកលោក យឹម សារ៉ាន់ អធិការអធិការនគរបាលខណ្ឌពោធិ៍សែនជ័យ បានសំណូមពរសុំឲ្យប្រជាពលរដ្ឋនិយាយអ្វីតាមត្រង់កុំភូតកុហក និងបំផ្លើសឲ្យសោះ ជាពិសេសកុំយកកំហឹង ឬគំនុំផ្ទាល់ខ្លួនមកនិយាយខ្វះការពិត ។
ដូចជាចោទថា នគរបាលអសមត្ថភាពក្នុងការបង្ក្រាបបទល្មើសនោះមិនត្រឹមត្រូវទេ កន្លងមកកម្លាំងនគរបាលរបស់អធិការដ្ឋាន ធ្លាប់បង្ក្រាបក្រុមចោរគាស់ផ្ទះបានជាបន្តបន្ទាប់៥ករណីដោយឃាត់ខ្លួនប្រមាណ៤០នាក់មកហើយ ។ ចំណុចមួយទៀតគឺបញ្ហាដែលថា នគរបាលយកលុយ៥០ដុល្លារ រឿងបើកអត្តសញ្ញាញណប័ណ្ណថ្មីនោះ ក៏សូមបងប្អូននិយាយចុចឲ្យចំឈ្មោះបុគ្គលតែម្ដងទៅ តើមន្ត្រីម្នាក់ណា ឈ្មោះអ្វី អត្តលេខប៉ុន្មាន ព្រោះនគរបាលក៏មានកិត្តិយសដែរ មិនអាចថាទាំងអស់បានឡើយ ។
ទោះបីជាបែបណា លោកអធិការបានសន្យាថានឹងពង្រឹងកម្លាំងការពារសន្តិសុខ ដើម្បីឆ្លើយតបទៅនឹងអ្វីដែលប្រជាពលរដ្ឋបានលើកឡើងនិងបានចែកលេខទូរស័ព្ទជូនពួកគាត់ សម្រាប់ផ្ដល់ព័ត៌មាននៅពេលមានរឿងអ្វីកើតឡើង ។នៅក្នុងឱកាសនោះ លោក នុត ពុធដារ៉ា អភិបាលខណ្ឌដង្កោ បានថ្លែងសំណូមពរដល់ប្រជាពលរដ្ឋដែលសុំផ្លាស់ប្ដូរខណ្ឌ សុំកុំផ្លាស់អី ព្រោះទាំងអាជ្ញាធរនិងសមត្ថកិច្ចខណ្ឌពោធិ៍សែនជ័យ បានប្ដេជ្ញាពង្រឹងការងារជូនបងប្អូនគ្រប់ផ្នែកទាំងអស់ទៅហើយ ។ ដូច្នេះ គួរតែបោះបង់ចោលការតវ៉ា ហើយចូលរួមចំណែកជាមួយអាជ្ញាធរខណ្ឌខាងលើក្នុងភាពជឿជាក់វិញ ។ ទោះបីជាបែបណា ប្រជាពលរដ្ឋខាងលើមិនទាន់យល់ព្រមនៅឡើយទេ ប៉ុន្តពួកគាត់រង់ចាំមើលការសន្យារបស់អាជ្ញាធរ និងសមត្ថកិច្ចខណ្ឌពោធិ៍សែនជ័យ ចំពោះពួកគាត់ផងដែរ ៕
ចែករំលែកព័តមាននេះ