ទីក្រុងបាងកក ៖ យោងតាមសេចក្តីរាយការណ៍របស់សារព័ត៌មានមួយបានឲ្យដឹងថា ស្ថានទូតចិនប្រចាំនៅទីក្រុងបាងកក បានចេញការព្រមានមួយទៅកាន់ភ្ញៀវទេសចរចិនដែលធ្វើដំណើរមកកាន់ប្រទេសថៃក្នុងអំឡុងខែក្រោយពីសុវត្ថិភាព បន្ទាប់ពីមានឧបទ្ទវហេតុលេចនាវាចំនួន៦កើតមានឡើងកាលពីខែសីហាកន្លងមក ។
យោងតាមសេចក្តីព្រមានរបស់ស្ថានទូតបានឲ្យដឹងថា បុណ្យប្រពៃណីជាតិរបស់ប្រទេសចិនដែលនឹងត្រូវបានប្រារព្ធនៅសប្តាហ៍ទីមួយខែតុលាជាធម្មតា ស្របពេលជាមួយនឹងរដូវម៉ូសុងវស្សានៅ Phuket, Phang Nga និង Krabi ប៉ុន្តែអាកាសធាតុនៅតែអាចផ្លាស់ប្តូរ និងមានខ្យល់បក់បោកខ្លាំង និងរលកធំៗជាដើម ។
សារព័ត៌មានហុងកុងខាងលើបានឲ្យដឹងថាជនជាតិចិនប្រមាណ៧លាននាក់ នឹងធ្វើដំណើរទៅបរទេសក្នុងអំឡុងពេលសប្តាហ៍នោះ ច្រើនជាងឆ្នាំមុនដែលមានតែ៦លាននាក់ប៉ុណ្ណោះ ។
យោងតាមវិទ្យាស្ថានទេសចរណ៍ចិនបានឲ្យដឹងថា ប្រទេសថៃស្ថិតក្នុងចំណោមទីតាំងទេសចរណ៍ដែលមានប្រជាប្រិយភាពជាងគេទាំង៣សម្រាប់ជនជាតិចិនជាយូរមកហើយ ។ សារព័ត៌មានខាងលើបានឲ្យដឹងទៀតថា កាលពីឆមាសទី១នាឆ្នាំនេះ ប្រទេសថៃទទួលភ្ញៀវទេសចរជនជាតិចិនប្រមាណជិត៦លាននាក់ ច្រើនជាងឆ្នាំមុនដល់ទៅ២៦%។
ស្ថានទូតចិនបានព្រមានដល់អ្នកដំណើរថារលកអាចមានកម្ពស់ដល់ទៅ២ម៉ែត្រក្នុងអំឡុងពេលរដូវកាលនេះ ហើយគួរជៀសវាងការហែលទឹក ឬការធ្វើដំណើរតាមសមុទ្រពេលស្ថានភាពអាកាសធាតុមិនល្អ ។
ជាមួយគ្នានេះផងដែរ នាយកដ្ឋានឧតុនិយមបានព្រមានកាលពីថ្ងៃអាទិត្យថា នៅឈូងសមុទ្រថៃមានសម្ពាធទាបដែលអាចនឹងមានភ្ញៀងធ្លាក់កាន់តែច្រើន ខណៈដែលតំបន់ប៉ែកខាងកើត និងត្បូង អាចនឹងមានភ្លៀងធ្លាក់ខ្លាំង ៕
ចែករំលែកព័តមាននេះ