ពលរដ្ឋក្រុងបានលុងទ្រាំស្អុយសំរាមរាប់ខែ…គាត់ថាក្រុមហ៊ុនទាំង២ចង្រៃណាស់
- រតនគិរី
ខេត្តរតនគិរី ៖ រដ្ឋបាលសាលាខេត្តបានចេញលិខិតបន្ទាន់មួយជាលាយលក្ខណ៍អក្សរ ជូនលោក ជា គួង ប្រធានក្រុមហ៊ុន គីម ជ្រា អនាម័យក្រុងបានលុង…
ខេត្តរតនគិរី ៖ រដ្ឋបាលសាលាខេត្តបានចេញលិខិតបន្ទាន់មួយជាលាយលក្ខណ៍អក្សរ ជូនលោក ជា គួង ប្រធានក្រុមហ៊ុន គីម ជ្រា អនាម័យក្រុងបានលុង…
ខេត្តរតនគិរី ៖ រដ្ឋបាលសាលាខេត្តបានចេញលិខិតបន្ទាន់មួយជាលាយលក្ខណ៍អក្សរ ជូនលោក ជា គួង ប្រធានក្រុមហ៊ុន គីម ជ្រា អនាម័យក្រុងបានលុង ស្ដីពីការចាត់វិធានការប្រមូលសំរាមក្នុងក្រុងបានលុង និងបញ្ហាសំរាមចាក់ខុសទីតាំង បណ្ដាលមកពីទំនាស់គ្នាជាមួយក្រុមហ៊ុនវិនិយោគផ្សារកន្លងមក ។ ការតម្រូវឱ្យក្រុមហ៊ុនកើបសំរាមចេញនេះ បន្ទាប់ពីប្រជាពលរដ្ឋដែលរងផលប៉ះពាល់ធ្ងន់នៅភូមិ៣ សង្កាត់កាចាញ ក្រុងបានលុង បានលើកគ្នាទៅសាលាដំបូងខេត្ត និងសាលាខេត្ត សុំការអន្តរាគមន៍ ។
នៅថ្ងៃទី២២ ខែកញ្ញា រថយន្តដឹកសំរាមរបស់ក្រុមហ៊ុន គីមជ្រា បានចាប់ដំណើរការប្រមូលដឹកសំរាមក្នុងក្រុងបានលុងឡើងវិញហើយ បន្ទាប់ពីខកខានប្រមូលនិងដឹកជញ្ជូនអស់រយៈពេលជិត១០ថ្ងៃកន្លងមក ធ្វើឱ្យកកស្ទះសំរាមគរដូចភ្នំទាំងក្នុងផ្សារនិងក្រៅផ្សារ ដោយសារមានទំនាស់ជាមួយក្រុមហ៊ុន ហេង ដារ៉ា វិនិ
យោគផ្សារក្រុងបាលុង ដែលជាទំនាស់ដ៏រ៉ាំរ៉ៃដោះស្រាយមិនចេញជាច្រើនឆ្នាំមកហើយ ។
ពាក់ព័ន្ធនឹងករណីខាងលើ លោក ជា គួង ប្រធានក្រុមហ៊ុន គីម ជ្រា អនាម័យក្រុងបានលុង បានចោទប្រកាន់ថា លោកឧកញ៉ា សា លាង ប្រធានក្រុមហ៊ុនវិនិយោគផ្សារបង់ប្រាក់អនាម័យមិនគ្រប់ចំនួនរៀងរាល់ខែជាច្រើនឆ្នាំមកហើយ ។
បញ្ហានេះ ត្រូវបានដោះស្រាយគ្នាតាមប្រព័ន្ធតុលាការ ហើយសាលក្រមបានចេញកាលពីថ្ងៃទី៤ ខែមេសា ឆ្នាំ២០១៨ ដោយលោក ឈុន ច័ន្ទសីហា ចៅក្រមជំនុំជម្រះ សម្រេចបង្គាប់ឲ្យចុងចម្លើយឈ្មោះ សា លាង សងប្រាក់ទៅឲ្យដើមចោទឈ្មោះ ជា គួង សរុបចំនួន៤៣,៥លានរៀល ដោយគិតប្រាក់ជំពាក់រយៈពេល៨៧ខែ គឺគិតចាប់ពីថ្ងៃទី២០ ខែមេសា ឆ្នាំ២០១០ រហូតដល់ថ្ងៃទី២០ ខែមេសា ឆ្នាំ២០១៧ ។
បង្គាប់ឲ្យសងប្រាក់ដែលភាគីចុងចម្លើយអះអាងថា ខាតបង់ទាំងស្រុងជារៀងរាល់ខែចំនួន៣,៥លានរៀល គិតចាប់ពីថ្ងៃទី២០ ខែមីនា ឆ្នាំ២០១៧ រហូតដល់ថ្ងៃទូទាត់ចប់ ព្រមទាំងបង្គាប់ឲ្យចុងចម្លើយសងការខូចខាតពេលវេលា ជំងឺចិត្ត និងសេវាកម្មមេធាវីចំនួន២ម៉ឺនដុល្លារសហរដ្ឋអាមេរិកទៀតផង ។
ក្រោយមក ដីកាសម្រេចរក្សាការពារលេខ០២ច ចុះថ្ងៃទី១៩ ខែមេសា ឆ្នាំ២០១៨ ដោយលោកចៅក្រម យិន វិសិដ្ឋ ហាមឃាត់កូនបំណុលឈ្មោះ សា លាង នាយកក្រុមហ៊ុន ហេងតារា អ្នកវិនិយោគផ្សារបានលុងមិនឲ្យបុគ្គលិកធ្វើសកម្មភាពយកភាស៊ីនៅតំបន់ទី៤(បរិវេណជុំវិញផ្សារ) និងហាមកូនបំណុលយកសំរាមមកចាក់នៅលើដីតំបន់៤ នៃប្លង់ផ្សារបានលុង ។
ប៉ុន្តែក្រោយមក លោកចៅក្រម សាន ប៊ុនធឿន បានចេញដីកាសម្រេចមួយទៀត នៅថ្ងៃទី៤ ខែឧសភា ឆ្នាំ២០១៨ ចុះថ្ងៃទី២ ខែឧសភាឆ្នាំ២០១៨ ឲ្យក្រុមហ៊ុន ហេង ដារា ដែលមានឈ្មោះ សា លាង ជាអគ្គនាយក ធ្វើសកម្មភាពប្រមូលនិងដឹកជញ្ជូនសំរាមនៅផ្សារក្រុងបានលុងជាបណ្ដោះអាសន្ន ហើយផ្អាកបង់ថ្លៃប្រមូលដឹកសំរាមឲ្យទៅក្រុមអនាម័យក្រុងបានលុង ជាបណ្ដោះអាសន្ន ។
ករណីរថយន្តដឹកសំរាម២ក្រុមហ៊ុន គឺក្រុមហ៊ុនវិនិយោគអនាម័យ និងក្រុមហ៊ុនមិនមានអាជ្ញាប័ណ្ណវិនិយោគអនាម័យ បានធ្វើឲ្យកាន់តែមានទំនាស់គ្នាកាន់តែធំឡើង បណ្ដាលឲ្យប្រជាពលរដ្ឋក្នុងក្រុងបានលុង ទទួលរងផលប៉ះពាល់យ៉ាងខ្លាំង ដោយសារទំនាស់ក្រុមហ៊ុនទាំងពីរ កើតមានឡើងជាច្រើនឆ្នាំមកហើយនោះ ។ យ៉ាងណាមិញ អាជ្ញាធរខេត្ត និងអាជ្ញាធរក្រុង មិនអាចលូកដៃបាន ដោយសារសំណុំរឿងក្រុមហ៊ុនទាំងពីរនៅក្នុងដំណើរការតុលាការ ។
ម្យ៉ាងវិញទៀត អាជ្ញាធរខេត្តបានត្រឹមដោះស្រាយបណ្ដោះអាសន្ននៅពេលហេតុការណ៍កើតឡើង ដូចពេលនេះទាក់ទិននឹងរឿងជម្លោះខាងលើ ប្រជាពលរដ្ផទូទាំងក្រុងបានលុងរាប់រយគ្រួសារ បានធ្វើការរិះគន់ទៅលើក្រុមហ៊ុនទាំង២ថា គិតតែរឿងឈ្លោះគ្នា ធ្វើឱ្យអាជ្ញាធរដែនដីវិលមុខខ្លាំងណាស់ ហើយប្រជាពលរដ្ឋរាប់រយគ្រួសារទ្រាំស្អុយសំរាមរាប់ខែ ក្រុមហ៊ុនទាំង២នេះចង្រៃណាស់ ៕
ចែករំលែកព័តមាននេះ