ខេត្តមណ្ឌលគិរី៖ ស្ពានបេតុងចំនួនពីរកន្លែងនឹងជួយសម្រួលដល់ការធ្វើដំណើររបស់ប្រជាពលរដ្ឋបានបណ្តោះអាសន្ន ក្នុងរដូវវស្សានេះក្រោយពេលលោក ស្វាយ សំអ៊ាង អភិបាលខេត្តមណ្ឌលគិរី អញ្ជើញជួបសំណេះសំណាល និងត្រួតពិនិត្យសមិទ្ធផល ស្ថិតនៅឃុំរយ៉ ស្រុកកោះញែក នាថ្ងៃទី២៤ ខែកញ្ញា ឆ្នាំ២០១៨។
លោក ស្វាយ សំអ៊ាង បានលើកឡើងថា ការសាងសង់ស្ពានបេតុងរួចរាល់នាពេលនេះ ជាជំនួសឥតសំណងរបស់រដ្ឋាភិបាល និងប្រជាជនជប៉ុន ដើម្បីជួយសម្រួលដល់ការធ្វើដំណើររបស់ប្រជាពលរដ្ឋនៅខេត្តមណ្ឌលគិរី ជាពិសេសប្រជាពលរដ្ឋនៅក្នុងឃុំរយ៉ ស្រុកកោះញែក។ ការចុះត្រួតពិនិត្យស្ពាន គឺដើម្បីឱ្យប្រជាពលរដ្ឋប្រើប្រាស់បណ្តោះអាសន្ន ស្របពេលរដូវនេះ ជារដូវវស្សា ដែលធ្វើឱ្យទឹកជន់លិចតាមដងអូរ។
ជាងនេះទៅទៀត លោក បានស្នើដល់ប្រធានមន្ទីរអភិវឌ្ឍន៍ជនបទខេត្ត ត្រូវធ្វើការជួសជុលផ្លូវឡើងវិញ ចាប់ពីផ្លូវជាតិលេខ៧៦ រហូតដល់ឃុំរយ៉នេះ ដើម្បីបង្ករលក្ខណ:ងាយស្រួលដល់ការធ្វើដំណើររបស់ពួកគាត់។ ទន្ទឹមនឹងនេះដែរ លោក បានណែនាំដល់ប្រជាពលរដ្ឋទាំងអស់ ត្រូវចេះថែរក្សាសមិទ្ធផលទាំងនេះទុកជាសម្បតិ្តរួម និងជម្រុញដល់មន្ទីរអង្គភាព ត្រូវធ្វើយ៉ាងណាខិតខំកសាងអភិវឌ្ឍន៍ក្នុងមូលដ្ឋានបន្ថែមទៀត ដោយប្រើប្រាស់ថវិការដ្ឋឲ្យបានសមស្រប ជាពិសេសត្រូវបម្រើសេវាសាធារណ:ឲ្យទាន់ពេលវេលា និងមានប្រសិទ្ធភាព។
តាមការលើកឡើងរបស់លោក យ៉ន់ សារ៉ោម បានឲ្យដឹងថា ដោយមានការសំណូមពរពីប្រជាពលរដ្ឋ ដែលធ្វើដំណើឆ្លងកាត់អូរចំនួនពីរកន្លែង ក្នុងឃុំរយ៉ ស្រុកកោះញែក ជាពិសេសក្នុងរដូវវស្សា ទឹកឡើងខ្លាំងត្រូវជិះក្បូន ទូក ឬរង់ចាំទឹកស្រកទៅវិញ មន្ទីរអភិវឌ្ឍន៍ជនបទខេត្តមណ្ឌលគិរី បានរៀបចំសំណើរគម្រោងស្វែងរកដៃគូរនានា ដើម្បីលើកគម្រោងសាងសង់ស្ពានខាងលើនេះ។
លោកបន្ថែមថា ជាលទ្ធផលមន្ទីរបានទទួលគម្រោងជំនួយឥតសំណងរបស់ប្រទេសជប៉ុន លើគម្រោងសាងសង់ស្ពានប៉េតុងចំនួនពីរកន្លែងគឺនៅអូររវ៉ាក់ មានប្រវែង១៨ម៉ែត្រ និងទទឹង៥ម៉ែត្រ និងអូររយ៉ មានប្រវែង២៤ម៉ែត្រ និងទទឹង៥ម៉ែត្រ ដោយចំណាយថវិកាជាង២៤ម៉ឺនដុល្លារ ដោយប្រើរយៈពេលសាងសង់ចំនួន៨ខែ ចាប់ពីថ្ងៃទី១ ខែធ្នូ ឆ្នាំ២០១៧ ដល់ថ្ងៃទី១០ ខែសីហា ឆ្នាំ២០១៨៕
ចែករំលែកព័តមាននេះ