រាជធានីភ្នំពេញ ៖ សេចក្តីរាយការណ៍ឱ្យដឹងថា លោកឧកញ៉ា ឡុង ហ៊ួរ ត្រូវបុរសជាសន្តិសុខយាមផ្ទះរបស់ខ្លួនចោទប្រកាន់ថា យកដងអំបោសវាយក្បាល៣ដងអំបោស ខណៈគាត់បានដេកលក់ក្នុងប៉ុស្តិ៍យាម
បណ្តាលឱ្យរងរបួសបែកក្បាលហូរឈាមជោក កើតឡើងកាលពីវេលាម៉ោងប្រហែល១០យប់ថ្ងៃទី២៣ កញ្ញា ស្ថិតនៅក្នុងផ្ទះឧកញ៉ាជាប់អធិការដ្ឋាននគរបាលខណ្ឌពោធិ៍សែនជ័យ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ហើយគ្រូពេទ្យបានដេរចំនួន៥ថ្នេរ ។
សេចក្តីរាយការណ៍បន្តថា បុរសរងគ្រោះឈ្មោះព្រុំ សារ៉េត អាយុ៤៣ឆ្នាំ ជាសន្តិសុខរបស់ក្រុមហ៊ុនឯកជន មួយ មានទីលំនៅក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ បើតាមជនរងគ្រោះឱ្យសមត្ថកិច្ចដឹងទៀតថា មិនតែប៉ុណ្ណោះ លោកឧកញ៉ាបានប្រើអង្គរក្សមកគំរាមគាត់ប្រាប់ថា «ចេញឱ្យឆ្ងាយទៅ ប្រយ័ត្នគាត់ចូលទៅក្នុង យកកាំភ្លើងមកបាញ់ស្លាប់»។
ក្រោយពីទទួលការវាយដំនិងគំរាមបាញ់សម្លាប់ចោលទៀតនោះ ធ្វើឱ្យគាត់ភ័យខ្លាច ក៏បានរត់គេចចេញពីផ្ទះឧកញ៉ានោះ ។ បន្ទាប់មក ធ្វើដំណើរទៅសុំការអន្តរាគមន៍ពីនគរបាលប៉ុស្តិ៍កាកាកាប១ ជួយរកយុត្តិធម៌ ។ បច្ចុប្បន្ន នគរបានប៉ុស្តិ៍កាកាប១ បានទទួលបណ្ដឹងជនរងគ្រោះរួចរាល់ហើយ ដោយរង់ចាំការសម្រេចរបស់ថ្នាក់លើតែប៉ុណ្ណោះ ។
ទាក់ទិននឹងការចោទប្រកាន់ខាងលើនេះ កោះសន្តិភាពនៅមិនអាចទំនាក់ទំនងសុំការបំភ្លឺណាមួយពីខាងលោកឧកញ៉ា ឡុង ហួរ បាននៅឡើយទេ ។
ចែករំលែកព័តមាននេះ