ខេត្តកំពង់ចាម ៖ សេចក្តីរាយការបឋមឲ្យដឹងថា កាលពីថ្ងៃទី២៤ ខែកញ្ញានេះ ធ្វើឲ្យមានការភ្ញាក់ផ្អើលមួយពីអំពើឃាតកម្មមួយ ដែលជនជាឃាតករ បានវាយក្មេងស្រី អាយុ៥ឆ្នាំ ទម្លាក់ក្នុងទឹកស្រះ…
ខេត្តកំពង់ចាម ៖ សេចក្តីរាយការបឋមឲ្យដឹងថា កាលពីថ្ងៃទី២៤ ខែកញ្ញានេះ ធ្វើឲ្យមានការភ្ញាក់ផ្អើលមួយពីអំពើឃាតកម្មមួយ ដែលជនជាឃាតករ បានវាយក្មេងស្រី អាយុ៥ឆ្នាំ ទម្លាក់ក្នុងទឹកស្រះ នៅខាងក្រោយភូមិ ហើយជនដៃដល់ត្រូវបានសមត្ថកិច្ចចាប់ខ្លួន ពាក់ពន្ធរឿងគំនុំក្នុងគ្រួសារ ។
កុមារីរងគ្រោះឈ្មោះ ធូ សុជាតិ អាយុ៥ឆ្នាំ មានទីលំនៅភូមិកោះប្រាក់ ក្នុងឃុំកោះទន្ទឹម ស្រុកកំពង់សៀម ខេត្តកំពង់ចាម ។
សេចក្តីរាយការបន្តថា កាលពីវេលាម៉ោង៥និង៣០នាទីល្ងាច ថ្ងៃទី២៤ កញ្ញានេះ សមត្ថកិច្ចមូលដ្ឋានឃុំកោះទន្ទឹមបានទទួលពាក្យបណ្តឹងផ្ទាល់មាត់ពីឈ្មោះ ប្រាក់ អុន ភេទស្រី អាយុ៥៦ឆ្នាំ ជាជាតិខ្មែរ មានទីលំនៅភូមិកោះប្រាក់ក្នុង ឃុំកោះទន្ទឹម ស្រុកកំពង់សៀម ខេត្តកំពង់ចាម មកប្តឹងសមត្ថកិច្ចថា កាលពីវេលាម៉ោងជាង២រសៀលថ្ងៃដដែលនេះចៅស្រីរបស់គាត់ឈ្មោះ ធូ សុជាតិ អាយុ៥ឆ្នាំ បានដើរលេងនៅក្នុងភូមិកោះប្រាក់ក្នុងនេះត្រូវបានបាត់ខ្លួនមិនដឹងទៅណា ។ ហើយការបាត់ខ្លួនចៅស្រីនោះ រហូតដល់វេលាម៉ោង៥ល្ងាចមិនឃើញត្រឡប់មកផ្ទះវិញសោះ ។ គាត់ជាជីដូនបាននាំប្តីឈ្មោះ យន់ ស ដើររកចៅស្រី ដើររកចៅស្រីគ្រប់ច្រកល្ហក ពេញក្នុងភូមិ តែរកមិនឃើញ ហើយក៏បានដើរសួរអ្នកស្រុក និងក្មេងៗជិតខាងលេងជាមួយគ្នា នៅតែគ្មានដំណឹង ។
លោកយាយប្រាក់ អុន ប្តឹងសមត្ថកិច្ចទៀតថា ពេលនោះគាត់បានជួបឈ្មោះ សឿន អ៊ិត ភេទស្រី អាយុ៤៨ឆ្នាំ អ្នករស់នៅភូមិ ឃុំខាងលើបានប្រាប់ថា គាត់បានឃើញឈ្មោះ គីម សុខ រស់ ហៅវ៉ូ ភេទប្រុស អាយុ២៩ឆ្នាំ បាននាំចៅស្រីដើរទៅទិសខាងលិច ។ គ្រាន់តែបានឈ្មោះ សឿន អ៊ិត និយាយដូច្នេះគាត់ និងប្តីប្រញាប់ប្រញល់ទៅរាយការណ៍ជូនសមត្ថកិច្ចនគរបាលប៉ុស្តិ៍កោះទន្ទឹម ពេលនោះនគរបាលបានហៅឈ្មោះ គីម សុខរស់ ហៅវ៉ូ ទៅសួរនាំទើបបានសារភាព និងជូនសមត្ថកិច្ចទៅកាន់កន្លែងដែលខ្លួនបានធ្វើសកម្មភាពវាយសម្លាប់ចៅស្រីរបស់ខ្លួន នៅចំណុចមាត់ស្រះទឹក ខាងក្រោយផ្ទះតាធឹម ស្ថិតនៅក្នុងភូមិនោះ ។
ពេលដល់មាត់ឈ្មោះ យន់ ស (ជីតា) ក៏បានចុះរាវរកក្នុងស្រះទឹក តែរកមិនឃើញ ហើយពេល នោះឈ្មោះ គីម សុខរស់ ហៅវ៉ូ ក៏បានចង្អុលប្រាប់ថា ចៅស្រីរបស់គាត់ពិតជានៅត្រង់ចំណុច ក្នុងទឹកកែងមាត់ស្រះខាងលិចឆៀងខាងត្បូងនេះ ។
ឮដូច្នោះភ្លាមឈ្មោះ យុន ស ជាជីតា ក៏បានចុះរាវរកក្នុងទឹកស្រះត្រង់ចំណុចដែលឈ្មោះ គីម សុខរស់ ហៅវ៉ូ ចង្អុលប្រាប់ ទើបឃើញសពចៅស្រីរបស់ខ្លួនស្លាប់នៅក្នុងទឹកស្រះនោះប្រាកដមែន ។ ពេលរាវឃើញចៅហើយជីតា(យុន ស) បានលើកសពចៅស្រីឡើងលើគោកដោយឃើញលើផ្ទៃមុខចៅស្រីមានរបួសជាច្រើនកន្លែង ។ បន្ទាប់ពីទទួលបានព័ត៌មាន និងបណ្តឹងភ្លាមសមត្ថកិច្ចជំនាញអធិការដ្ឋាននគរបាលស្រុកកំពង់សៀមសហការជាមួយកម្លាំងសមត្ថកិច្ចប៉ុស្តិ៍កោះទន្ទឹមដឹកនាំដោយលោកវរៈសេនីយ៍ទោ ណោ ឌីណា នាយរងការិយាល័យបច្ចេកទេសវិទ្យាសាស្ត្រចុះទៅពិនិត្យចាត់វិធានការជាបន្ទាន់ដល់កន្លែងកើតហេតុ និងបានធ្វើការឃាត់ខ្លួនមុខសញ្ញាសង្ស័យភ្លាម គឺឈ្មោះ គីម សុខរស់ ហៅវ៉ូ ។
ក្រោយពីឃាត់ខ្លួនជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពសម្លាប់កុមារីនោះមែន ។ ជនសង្ស័យបន្តថា ការសម្លាប់កុមារីនោះដោយយកកំណាត់ឈើវាយនឹងចាប់ច្របាច់.ក ហើយច្រានទម្លាក់ចូលក្នុងទឹកស្រះតែម្តង មូលហេតុដោយមានគំនុំនឹងជាមួយក្រុមគ្រួសារជនរងគ្រោះ ។ ចំណែកជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកកំពង់សៀម និងបានធ្វើតេស្តទឹកនោមស្វែងរកសារធាតុញៀនលទ្ធផល គឺ(វិជ្ជមាន) ៕
ចែករំលែកព័តមាននេះ