ខេត្តតាកែវ ៖ បុរសម្នាក់បានស្លាប់ភ្លាមៗនៅនឹងកន្លែងក្នុងគ្រោះថ្នាក់ចរាចរណ៍មួយ ស្របពេលមានរថយន្ត១គ្រឿងខូចចតចោលនៅលើទ្រូងផ្លូវ ហើយជនរងគ្រោះគេចពីរថយន្តដែលខូចនោះក៏ត្រូវរថយន្តមួយគ្រឿងទៀតបើកបរក្នុងទិសដៅបញ្ច្រាសគ្នាបុកពេញទំហឹង បណ្តាលស្លាប់ភ្លាមៗតែម្តង ក្រោយពេលកើតហេតុរថយន្តបង្កបានបើកគេចបាត់ស្រមោល ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង៣០នាទីយប់ថ្ងៃទី២៣ កញ្ញា ឆ្នាំ២០១៨ លើផ្លូវលេខ១២៩E ត្រង់ចំណុចដីឈ្មោះ ញ៉ គើយ ស្ថិតនៅភូមិស៊ីស្លា ឃុំធ្លាប្រជុំ ស្រុកកោះ
អណ្តែត ខេត្តតាកែវ ។
ជនរងគ្រោះដែលស្លាប់ឈ្មោះ លឹម គឿន ភេទប្រុស អាយុ៥១ឆ្នាំ នៅភូមិដំណាក់ ឃុំពេជសារ ស្រុកកោះ
អណ្តែត ជាអ្នកបើកបរម៉ូតូម៉ាកហុងដា ធុនសេ១២៥ ស៊េរី២០១៧ ពណ៌ខ្មៅ ពាក់ផ្លាកលេខតាកែវ ១N-៩០២៨ ។
លោកជាល សុផាត នាយការិយាល័យចរាចរណ័ផ្លូវគោកខេត្តបានអោយដឹងថា ដោយមានរថយន្តមួយគ្រឿងប្រភេទកូរ៉េទម្ងន់១,២៥តោនបានខូចនៅទីនោះ ហើយជនរងគ្រោះបើកបរម៉ូតូមកពីទិសខាងលិចគេចពីរថយន្តដែលខូចនោះដោយមិនបានមើលមុខក្រោយក៏ត្រូវរថយន្តមួយគ្រឿងដែលបើកបរមកពីទិសខាងកើតបុកពេញទំហឹង បណ្តាលឱ្យស្លាប់នៅកន្លែងកើតហេតុ ។
លោកនាយការិយាល័យបានបន្តទៀតថា សមត្ថកិច្ចគ្រាន់តែដឹងថា រថយន្តបង្កជារថយន្តកូរ៉េ តែសមត្ថកិច្ចមិនបានស្គាល់ពិតប្រាកដនោះទេ ព្រោះរថយន្តបង្កបានបើកគេចទៅបាត់ហើយ រហូតមកដល់ពេលនេះសមត្ថកិច្ចស្រាវជ្រាវតាមរកមិនទាន់បានឃើញនៅឡើយទេ ។
សពជនរងគ្រោះត្រូវបានប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី រីឯវត្ថុតាងម៉ូតូត្រូវបានសមត្ថកិច្ចដកហូតរក្សាទុកនៅអធិការដ្ឋាននគរបាលស្រុកកោះអណ្តែតដោះស្រាយគ្នានៅពេលក្រោយ ៕
ចែករំលែកព័តមាននេះ