រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានប្រកាសសន្យាយ៉ាងដាច់ណាត់ថា ទោះបីស្ថិតនៅក្នុងតម្លៃណាក៏ដោយ ត្រូវតែការពារសន្តិភាព និងការពារជាតិ ជីវិតប្រជាជនកម្ពុជាឲ្យខាងតែបាន ។ ការប្រកាសជំហររបស់សម្តេចតេជោនេះ គឺស្របនឹងខួប២០នៃការប៉ុនប៉ងធ្វើឃាតសម្តេចនៅក្នុងទឹកដីខេត្តសៀមរាប ។
សម្តេចតេជោ ហ៊ុន សែន បានសរសេរលើបណ្តាញសង្គមផ្លូវការថា «ថ្ងៃទី២៤ ខែកញ្ញា ឆ្នាំ២០១៨នេះ គឺជាខួប២០ឆ្នាំនៃការប៉ុនប៉ងធ្វើឃាតលើរូបខ្ញុំនៅខេត្តសៀមរាប(២៤ ខែកញ្ញា ១៩៩៨-២៤ ខែកញ្ញា ២០១៨) នៅម៉ោង៨និង៥២នាទី មានគ្រាប់រ៉ុក្កែតបេ៤០មួយគ្រាប់ក្នុងចំណោម៤គ្រាប់ បានហោះសំដៅរថយន្តខ្ញុំ តែមិនបានត្រូវរថយន្តខ្ញុំទេ ហើយជាអកុសលវាបានទៅបុកផ្ទះប្រជាជននៅម្ខាងផ្លូវធ្វើឲ្យប្រជាជនម្នាក់ស្លាប់ និងម្នាក់ទៀតត្រូវរបួសជាទម្ងន់» ។
សម្តេចតេជោបានបន្ថែមថា ការរៀបចំធ្វើឃាតលើរូបខ្ញុំនាពេលនោះ ត្រូវបានធ្វើឡើងស្របពេលនៃការប្រជុំសភានីតិកាលទី២ ដែលត្រូវប្រជុំនៅព្រះរាជដំណាក់នាទីក្រុងសៀមរាប ក្រោមព្រះរាជាធិបតីភាពសម្តេចព្រះ នរោត្តម សីហនុ ។ ប្រសិនបើពេលនោះគ្រាប់បេ៤០ ទាំង៤គ្រាប់ផ្ទុះព្រមគ្នាទាំងអស់ ឬព្រឹកនោះមិនមានភ្លៀងធំស្ទើរបាក់មេឃ ដែលធ្វើឲ្យខ្សែភ្លើងបញ្ជាគ្រាប់ទាំងនេះឆ្លងទឹក គឺប្រហែលជីវិតខ្ញុំត្រូវចប់តាំងពីពេលនោះមក ។
សម្តេចតេជោបញ្ជាក់ថា «ប្រសិនបើខ្ញុំស្លាប់នាពេលនោះ តើនឹងមានរឿងអ្វីកើតឡើង ក្រោយពេលខ្ញុំស្លាប់នៅក្នុងក្រុងសៀមរាប ? បន្ទាប់មកតើសង្គ្រាមអាចបញ្ចប់បានតាមរយៈនយោបាយឈ្នះ-ឈ្នះដូចពេល ហ៊ុន សែន នៅរស់ឬទេ ? នេះជាចម្លើយដែលត្រូវឆ្លើយសម្រាប់សំណួរទាំងពីរខាងលើនេះ» ។ ជាមួយគ្នានេះ សម្តេចប្រមុខរាជរដ្ឋាភិបាលក៏បានអរព្រះគុណទេវតាថែរក្សាអង្គរវត្ត ព្រះអង្គចេកព្រះអង្គចម និងបារមីវត្ថុស័ក្តិសិទ្ធិទាំងអស់ដែលជួយការពារសម្តេចនាពេលនោះផងដែរ ។
សម្តេចតេជោគូសបញ្ជាក់ថា «ខ្ញុំជឿច្បាស់ណាស់ថា អ្នកជួយជីវិតខ្ញុំនាពេលនោះគឺតាមផ្លូវងងឹត គឺគុណបុណ្យទេវតា ទាំងភូមិទេវតា រុក្ខទេវតា អាកាសទេវតា បារមីព្រះអង្គចេកព្រះអង្គចម បារមីដែលតាមថែរក្សាខ្ញុំជាប្រចាំកន្លងមកបានជួយជីវិតខ្ញុំឲ្យខ្ញុំរស់បាន២០ឆ្នាំកន្លងមកនេះ ដែលធ្វើឲ្យខ្ញុំបានដឹកនាំប្រទេសចេញពីសង្គ្រាមមកកាន់សន្តិភាព និងការអភិវឌ្ឍដូចសព្វថ្ងៃ» ។ សម្តេចតេជោបានលើកឡើងថា «ខ្ញុំបានអហោសិកម្មឲ្យអ្នកដែលចង់សម្លាប់ខ្ញុំនៅខេត្តសៀមរាបរួចហើយ បើទោះជាខ្ញុំមានពន្លឺក្នុងការស្រាវជ្រាវក៏ដោយ តែអ្នកត្រូវដឹងថា ពេលណាខ្ញុំនៅកាន់តំណែងជានាយករដ្ឋមន្ត្រី ខ្ញុំមិនឲ្យពួកអ្នកសម្លាប់ខ្ញុំបានទេ មិនឲ្យពួកអ្នកធ្វើរដ្ឋប្រហារឬធ្វើបដិវត្តពណ៌បានទេ» ។ សម្តេចតេជោបន្តថា «ទោះដោយតម្លៃណាក៏ដោយ ខ្ញុំត្រូវការពារសន្តិភាព និងការពារជីវិតប្រជាជនកម្ពុជាឲ្យខាងតែបាន» ៕
ចែករំលែកព័តមាននេះ