រាជធានីភ្នំពេញ ៖ ក្នុងពេលដែលក្រសួងវប្បធម៌សម្រេចចេញលិខិតផ្លូវការឲ្យតារាប៉ុន្មានដួងផ្អាកអាជីពសិល្បៈរយៈពេល១ឆ្នាំ បន្ទាប់ពីពិនិត្យលើទម្រង់ស្លៀកពាក់សិចស៊ីជាមូលដ្ឋានបានបង្កឲ្យមានការភ្ញាក់ផ្អើលពេញសង្គមសិល្បៈ និងមជ្ឈដ្ឋានទូទៅ
យ៉ាងណាមិញស្រីស្អាតសាច់សដែលរងឈ្មោះហាមកញ្ញា ពេជ្រ អាវីហ្សា បានសម្តែងនូវភាពអស់សង្ឃឹមក្រោយក្រសួងដាក់សម្ពាធ ហើយស្ទើរតែដើរចេញពីសិល្បៈ បន្ទាប់ពីនាងយល់ថា ចំណុចល្អក្នុងសង្គមសិល្បៈគេមើលមិនឃើញទាល់តែសោះ។
ពេជ្រ អាវីហ្សា ចាត់ទុកការដាក់បម្រាមមកលើនាង និងក្រុមតារាប៉ុន្មានរូបទៀតរបស់ក្រសួងវប្បធម៌ថា ជារឿងលម្អៀងពេកហើយ សិល្បៈតែងតែមានគ្រប់ទម្រង់ ហើយនាងយល់ថា ការបង្ហាញរូបភាពឆើតឆាយរបស់នាងកន្លងមក គឺមិនដល់ថ្នាក់ទទួលយកមិនបាននោះទេ។ នាងចោទទៀតថា តារាច្រើនណាស់គេហ៊ានសម្ញែង តែគេមើលមិនឃើញមកជាន់លើនាងទៅវិញ។
ពេជ្រ អាវីហ្សា គឺជាតារាសម្តែងដ៏ទាន់សម័យមិនថា ម៉ូដសម្លៀកបំពាក់ ឬសម្ភារផ្សេងៗ គឺនាងចូលចិត្តផ្លាស់ប្តូរមិនឱ្យជាន់គ្នានោះទេ ។ ហើយក្រសួងវប្បធម៌ និងវិចិត្រសិល្បៈបានសម្រេចកំណត់ឈ្មោះតារារួចអស់ហើយ ដែលត្រូវចូលខ្លួនមកទទួលពិន័យ និងណែនាំ បន្ទាប់ពីបានបង្ហាញសកម្មភាពសិចស៊ីជ្រុលក្នុងវិស័យសិល្បៈ។ ក្នុងនោះមានកញ្ញា សេង សូណា, លោក អែន ឌី, កញ្ញា ពេជ្រ អាវីហ្សា, កញ្ញា រតនៈ ពិសី និងអ្នកនាង ស្រីម៉ុច។
ក្នុងចំណោមតារាទាំង៥ដួងនោះមានតែ សេង សូណា មួយគត់ដែលរងការពិន័យធ្ងន់ជាងគេ គឺត្រូវក្រសួងវប្បធម៌ហាមឃាត់មិនឲ្យបន្តប្រឡូកក្នុងអាជីពសិល្បៈរយៈពេល១ឆ្នាំ ខណៈពេលដែលតារាផ្សេងទៀតត្រឹមតែព្រមានប៉ុណ្ណោះ ។ ចំពោះមហាជនវិញ អ្នកខ្លះគាំទ្រចំណាត់ការរបស់ក្រសួងវប្បធម៌ និងវិចិត្រសិល្បៈ ដោយថា ធ្វើបែបនេះដើម្បីកុំឲ្យអ្នកសិល្បៈធ្វើឲ្យខូចតម្លៃប្រពៃណីវប្បធម៌ជាតិ ។
ពេជ្រ អាវីហ្សា បាននិយាយជាមួយអ្នកយកព័ត៌មានក្នុងពិធីពិព័រណ៍ឈុតអាពាហ៍ពិពាហ៍ថ្មីៗនេះថា ក្រោយពេលចេញបម្រាមបែបនេះមក នាងស្ទើរតែលែងមានទឹកចិត្តក្នុងការប្រឡូកសិល្បៈ។ នាងថា «គេមិនមើលចំណុចល្អនាងទេ កន្លងមករយៈពេល៧ឆ្នាំក្នុងសិល្បៈដ្បិតតែរូបនាងមានដាននិយមស្លៀកពាក់យេរៗ បញ្ចេញសាច់ តែនៅមិនអាក្រក់ឡើយ។ នាងបានព្យាយាមចូលរួមក្នុងកិច្ចការសង្គមជាច្រើន លះបង់ពេលវេលាកិច្ចការមនុស្សធម៌ឲ្យតែមាន គឺចូលរួមស្ម័គ្រចិត្តមិនដែលដកថយឡើយ។ ពេលនេះនាងឆ្អែតជាមួយសិល្បៈមួយនេះច្រើនអាចថា ការចេញលិខិតនេះធ្វើឲ្យនាងប៉ះពាល់ការងារមួយផ្នែកដែរ»។
យ៉ាងណាមិញនាងសុំចិត្តមើលឲ្យគ្រប់ជ្រុងជ្រោយ កុំលម្អៀង ហើយសិល្បៈចាប់ពីពេលនេះទៅនាងផ្អាកច្រើនយកពេលទៅពង្រឹងមុខរបរថ្មីឲ្យខ្លាំង និងមិនចោលសិល្បៈនេះទេ ព្រោះនាងតស៊ូច្រើនឆ្នាំ។ មិនព្រោះតែរឿងនេះនាងចុះចាញ់ទេ នាងនិងក្រោកឈរឲ្យរឹងមាំឡើងវិញ។
ចែករំលែកព័តមាននេះ