រាជធានីភ្នំពេញ ៖ ក្រុមចោរប្រដាប់អាវុធ២នាក់បានបាញ់ចំនួន២គ្រាប់ ខណៈធ្វើសកម្មភាពចូលលួចម៉ូតូហុងដាឌ្រីម ស៊េរីឆ្នាំ២០១២មួយគ្រឿងបានសម្រេច តែត្រូវម្ចាស់ដេញតាមទាន់ និងប្រុងស្ទុះទៅក្របួច ។ ទោះបីជាយ៉ាងណា ការផ្ទុះអាវុធនេះពុំបណ្តាលឱ្យមនុស្សណាម្នាក់រងរបួសឡើយ ហើយក្រុមចោរបានជិះម៉ូតូដែលធ្វើសកម្មភាពរត់គេចខ្លួនបាត់ស្រមោល ចោលម៉ូតូដែលលួចបាននោះ ។
ហេតុការណ៍ចោរផ្ទុះអាវុធនេះ បង្កឱ្យមានការភ្ញាក់ផ្អើលកាលពីវេលាម៉ោង១០ និង៣០នាទីព្រឹកថ្ងៃទី២៤ កញ្ញា នៅផ្លូវលេខ១០៧ ក្នុងភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ ។ ម្ចាស់ម៉ូតូឈ្មោះ គង់ គីម ភេទប្រុស អាយុ២៩ឆ្នាំ ជាមន្ត្រីរាជការ មានទីលំនៅតាមផ្លូវលេខ៥៩៨ ក្បែរស្ថានីយទូរទស្សន៍ប៉ុស្តិ៍លេខ៣ ក្នុងភូមិពោងពាយ សង្កាត់ទួលសង្កែ២ ខណ្ឌឫស្សីកែវ ។
តាមព័ត៌មានឱ្យដឹងថា ជនសង្ស័យទាំង២នាក់ជិះម៉ូតូមួយគ្រឿងមិនចាំម៉ាក បានធ្វើសកម្មភាពលួចម៉ូតូហុងដាឌ្រីម សេ៊រីឆ្នាំ២០១២ ពាក់ផ្លាកលេខភ្នំពេញ ១BX-១០៧៣បានសម្រេច ខណៈម្ចាស់ចតទុកនៅក្រោយផ្ទះ ។ ប៉ុន្តែនៅពេលចោរលួចជិះចេញទៅ ម្ចាស់ឃើញទាន់ក៏ហៅម៉ូតូឌុបនៅក្បែរនោះជិះតាម
ដោយពុំបានស្រែកឱ្យភ្ញាក់ផ្អើលនោះទេ ហើយក៏រាយការណ៍ប្រាប់នគរបាលមូលដ្ឋានឱ្យជួយស្ទាក់ផងដែរ ។
តាមព័ត៌មានឱ្យដឹងទៀតថា ពេលជនសង្ស័យជិះម៉ូតូដែលលួចបានទៅដល់ខាងជើងអតីតភោជនីយដ្ឋាន
បុប្ជារាជធានី ក៏ឈប់និងអង្គុយលើម៉ូតូជាមួយបក្សពួកម្នាក់ទៀត ។ ភ្លាមនោះម្ចាស់ម៉ូតូទៅទាន់ ហើយចុះពីម៉ូតូឌុបដើរតម្រង់ទៅក្នុងគោលបំណងស្ទុះទៅក្របួចឬវាយ ឯចោរម្នាក់ឃើញទាន់ ក៏ដកកាំភ្លើងបាញ់តម្រង់១គ្រាប់ តែសំណាងល្អមិនត្រូវ ។
បន្ទាប់ពីផ្ទុះអាវុធ ជនសង្ស័យម្នាក់នោះ ក៏រត់ឡើងជិះម៉ូតូបក្សពួកគេចខ្លួន និងបាញ់មួយគ្រាប់ទៀតគំរាមមិនឱ្យដេញ រួចជិះម៉ូតូគេចខ្លួនបាត់ ដោយទុកចោលម៉ូតូដែលលួចបាននោះវិញ ។ ដោយការផ្ទុះអាវុធ២គ្រាប់ពីសំណាក់ក្រុមចោរ បង្កឱ្យមានការភ្ញាក់ផ្អើលយ៉ាងខ្លាំង ហើយទាំងម៉ូតូនិងម្ចាស់ត្រូវបាននគរបាលប៉ុស្តិ៍ទួលសង្កែ២ នាំទៅសាកសួរនិងដាក់ពាក្យបណ្តឹង ៕
ចែករំលែកព័តមាននេះ