រាជធានីភ្នំពេញ ៖ រថយន្តមួយគ្រឿងបានបុកជាមួយម៉ូតូមួយគ្រឿងយ៉ាងពេញទំហឹងបណ្តាលអោយស្លាប់ម្នាក់ និងរងរបួសធ្ងន់ម្នាក់ ហេតុការណ៍នេះបានកើតឡើងកាលពីវេលាម៉ោង១១និង២០នាទីយប់ថ្ងៃទី២៤ ខែកញ្ញា ឆ្នាំ២០១៨ តាមបណ្តោយផ្លូR៦កែងផ្លូវ៥ នៅចំណុចប្លុកបឹងកក់ ស្ថិតនៅក្នុងសង្កាត់ស្រះចក ខណ្ឌដូនពេញ ។
ជនរងគ្រោះដែលស្លាប់ឈ្មោះ សំ ស៊ាត ភេទប្រុស អាយុ៣០ឆ្នាំ ជាបុគ្គលិកខុទ្ធកាល័យនៃធនាគារជាតិកម្ពុជា ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញបុរស២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GD-៥៨៥០ បើកបរតាមបណ្តោយផ្លូវR៦ ក្នុងទិសដៅពីលិចទៅកើត ពេលពេលមកដល់ចំណុចកើតហេតុខាងលើនេះក៏ស្រាប់តែមានរថយន្តមួយគ្រឿងម៉ាកវីហ្គោ ពណ៌ស ពាក់ស្លាកលេខ ភ្នំពេញ ២A-៩៧៧៧ បើកបរតាមបណ្តោយផ្លូវR៦ ក្នុងទិសដៅពីជើងទៅត្បូងបើកក្នុងល្បឿនយ៉ាងលឿន ។
លុះពេលមកដល់ចំណុចផ្លូវបែកជាបួន រថយន្តបង្កមិនបានបន្ថយល្បឿននោះទេ ក៏ជ្រុលចង្កូតទៅបុកម៉ូតូចំពីមុខពេញទំហឹង បណ្តាលអោយដួលរងរបួសធ្ងន់បុរសម្នាក់ជាអ្នកបើកបរ ចំណែកបុរសម្នាក់ទៀតដែលអង្គុយពីក្រោយបានស្លាប់ភ្លាមៗនៅនឹងកន្លែងកើតហេតុ ។
ភ្លាមៗនោះដែរ រថយន្តម៉ាកវីហ្គោមិនបានឈប់នៅដោះស្រាយនោះទេ ក៏បានបន្ថែមល្បឿនបើករត់គេចខ្លួនបាត់ស្រមោល បន្សល់ទុកតែជនរងគ្រោះដែលស្លាប់តែប៉ុណ្ណោះ មួយសន្ទុះក្រោយមកក៏មានរថយន្តសង្គ្រោះរបស់គ្លីនិកឯកជនមួយមកដឹកយកជនរងគ្រោះដែលរបួសធ្ងន់យកទៅព្យាបាល ។
ក្រោយពេលកើតហេតុសមត្ថកិច្ចក៏បានដឹកយកសពរបស់ជនរងគ្រោះយកទៅតម្កល់នៅវត្តទឹកថ្លា រីឯម៉ូតូរបស់ជនរងគ្រោះវិញត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ