ម៉េចក៏ចឹងទៅវិញនោះ…ជួបប្រទះ
- ប៉ៃលិន
ខេត្តប៉ៃលិន ៖ នៅរសៀលថ្ងៃទី២៣ ខែកញ្ញា ឆ្នាំ២០១៨ ក្រុមមន្ត្រីអភិរក្សព្រៃឈើចំនួន៤នាក់ បានចុះល្បាត នៅចំណុចជើងភ្នំដំបង សង្កាត់អូរតាវ៉ៅ ក្រុងប៉ៃលិន…
ខេត្តប៉ៃលិន ៖ នៅរសៀលថ្ងៃទី២៣ ខែកញ្ញា ឆ្នាំ២០១៨ ក្រុមមន្ត្រីអភិរក្សព្រៃឈើចំនួន៤នាក់ បានចុះល្បាត នៅចំណុចជើងភ្នំដំបង សង្កាត់អូរតាវ៉ៅ ក្រុងប៉ៃលិន ដែលមានផ្ទះប្រជាពលរដ្ឋចំនួន៣ខ្នង ស្រាប់តែជួបប្រទះនឹងគ្រឿងចក្រអេស្កាវ៉ាទ័រ១គ្រឿង កំពុងធ្វើសកម្មភាព ឈូសឆាយដីព្រៃ តំបន់ការពារធនធានធម្មជាតិក៏ចាប់ឃាត់តែម្តង ។
ចំណែកអ្នកដែលហៅឱ្យគ្រឿងចក្រចូលទៅឈូសឆាយដីព្រៃតំបន់អភិរក្សក៏ត្រូវចាប់ឃាត់ខ្លួន ដើម្បីកសាងសំណុំរឿងបញ្ជូនទៅតុលាការកាលពីថ្ងៃទី២៤ ខែកញ្ញា ឆ្នាំ២០១៨ ។
ប្រភពព័ត៌មានពីលោក គឹម សុខា ប្រធានមន្ទីរបរិស្ថានខេត្តប៉ៃលិនបានឱ្យដឹងថា ជនសង្ស័យ មានឈ្មោះ ថុះ ថាន ភេទប្រុស អាយុ៣២ឆ្នាំ មានស្រុកកំណើតរស់នៅភូមិចកធំ ឃុំកកោះ ស្រុកមោងឫស្សី ខេត្តបាត់ដំបង មានប្រពន្ធឈ្មោះ ខយ គឹមឡាង បច្ចុប្បន្នរស់នៅក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ។ លោកបន្តទៀតថា ជនសង្ស័យខាងលើបានអាស្រ័យផលនៅលើដីព្រៃតំបន់អភិរក្សជាយូរឆ្នាំមកហើយ ដោយខាងលោកមិនអនុញ្ញាតឱ្យកាប់ទន្ទ្រានបន្តទៀតនោះទេ ។ ប៉ុន្តែពីមួយឆ្នាំទៅមួយឆ្នាំពួកគេទាំងនោះតែងតែលួចកាប់ព្រៃឈើ និងដុតរានយកដីធ្វើចម្ការរហូតដល់រសៀលថ្ងៃកើតហេតុខាងមន្ត្រីអភិរក្សចុះល្បាតឃើញ មានគ្រឿងចក្រកំពុងតែឈូសឆាយក៏ធ្វើការចាប់ឃាត់ ដើម្បីធ្វើសំណុំរឿងបញ្ជូនទៅតុលាការតែម្តង ។
ចំណែកប្រជាពលរដ្ឋរស់នៅក្បែរតំបន់ខាងលើបានបង្ហើបឱ្យដឹងដែរថា ដីព្រៃតំបន់អភិរក្សខាងលើត្រូវបានគេលួចកាប់ទន្ទ្រានស្ទើរតែក្លាយទៅជាវាលចម្ការពោត និងដំឡូងមីអស់ទៅហើយ ដោយក្នុងនោះក៏មានប្រជាពលរដ្ឋខ្លះ ហើយនឹងមន្ត្រីការពារនៅតំបន់នោះជាអ្នកកាប់ខ្លះ។ ប្រភពបន្តទៀតថា មើលទៅព្រៃត្រង់ចំណុចខាងលើមិនអាចរក្សាបានយូរប៉ុន្មាននោះទេ ព្រោះតែការការពាររបស់មន្ត្រីបរិស្ថានមានការធូររលុងខ្លាំងពេក ។
ជាពិសេសនៅត្រង់ចំណុចស្លេវ ភូមិភ្នំដំបង សង្កាត់អូរតាវ៉ៅ ត្រូវបានប្រជាពលរដ្ឋរស់នៅតំបន់នោះចូលទៅកាប់អស់រាប់សិបហិកតា សូម្បីតែមន្ត្រីអភិរក្សខំប្រឹងប្រែងចុះល្បាតរាល់ថ្ងៃក៏នៅតែទប់មិនជាប់ដែរ ព្រោះមានអ្នកឈរចាំបើកភ្លើងខៀវឱ្យចូលទៅកាប់ រួចយកលក់ឱ្យអ្នកមានលុយរាប់សិបហិកតាផងដែរ ៕
ចែករំលែកព័តមាននេះ