ខេត្តកណ្តាល ៖ យុវជនម្នាក់គិតខ្លីសម្រេចធ្វើអត្តឃាតចង.កសម្លាប់ខ្លួនឯងដោយផឹកស្រាស្រវឹងខឹងនឹងសង្សារបែកចិត្ត ហេតុការណ៍នេះកើតឡើងកាលពីម៉ោង៨យប់ ថ្ងៃទី២៣ កញ្ញា ឆ្នាំ ២០១៨ នៅចំណុចភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ។
បើតាមសមត្ថកិច្ចឱ្យដឹងថា ជនរងគ្រោះខាងលើឈ្មោះ ចេង ចាន់ដារ៉ា ភេទប្រុស អាយុ២៣ឆ្នាំ មុខរបរជាកម្មករ មានទីលំនៅភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្តាល ។
សមត្ថកិច្ចបញ្ជាក់ថា មុនកើតហេតុនៅថ្ងៃទី២៣ កញ្ញា ម៉ោង៣រសៀលជនរងគ្រោះកំពុងផឹកស្រាបៀរនៅផ្ទះរបស់ឪពុកមាឈ្មោះផាន់ ចាន់ងួន អាយុ៣៦ឆ្នាំ នៅភូមិស្តៅកន្លែង៣ ជាមួយនឹងមិត្តភក្តិជាច្រើននាក់ផ្សេងទៀត។ ពេលកំពុងអង្គុយផឹកស្រានោះជនរងគ្រោះនិយាយថា «សង្សារខ្ញុំគេប្រលងជាប់ថ្នាក់ទី១២ហើយ ឥឡូវនេះគេបែកចិត្តពីខ្ញុំហើយ ខ្ញុំពិបាកចិត្តណាស់» ហើយជនរងគ្រោះនិយាយដដែលៗជាច្រើនលើកច្រើនសារ ។
សមត្ថកិច្ចបញ្ជាក់ទៀតថា ពេលនោះឪពុកមាជនរងគ្រោះនិយាយទៅកាន់ជនរងគ្រោះថា «កុំពិបាកចិត្តរឿងស្រី» និយាយចប់ជនរងគ្រោះក៏ឈប់ផឹកស្រារួចនិយាយថា «ខ្ញុំទៅងាប់ហើយ» ហើយក៏ដើរទៅផ្ទះបាត់។ លុះម៉ោង៨យប់ថ្ងៃដដែលទើបម្តាយជនរងគ្រោះប្រទះឃើញជនរងគ្រោះចង.កនឹងខ្សែក្រម៉ាក្នុងបង្គន់ក៏ហៅបងប្អូនសាច់ញាតិជួយស្រាយទំលាក់ជនរងគ្រោះចុះដើម្បីសង្គ្រោះជីវិត តែជនរងគ្រោះដាច់ខ្យល់ស្លាប់បាត់ទៅហើយ រួចក៏រាយការណ៍ជូនសមត្ថកិច្ច។
ក្រោយពីទទួលបានព័ត៌មានភ្លាម កម្លាំងប៉ុស្តិ៍នគរបាលរដ្ឋបាលដីឥដ្ឋសហការជាមួយផ្នែកជំនាញ ចុះមកពិនិត្យសពជនរងគ្រោះ និងបញ្ជាក់ថា ជនរងគ្រោះពិតជាស្លាប់ដោយចង.កខ្លួនឯងប្រាកដមែន ក្រោយមកក៏ប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ