ខេត្តប៉ៃលិន ៖ ករណីគ្រោះថ្នាក់ចរាចរណ៍មួយកើតឡើងដោយម្ចាស់ត្រាក់ទ័រចតឈប់ដោយមិនបានពន្លត់ម៉ាស៊ីនរួចក៏នាំគ្នាហូបបាយ ស្រាប់តែយុវជនម្នាក់ដើរឡើងទៅបើកលេងក៏ធ្លាក់ចូលក្នុងប្រឡាយក្រឡាប់ត្រូវកង់ធំត្រាក់ទ័រកិនចំពាក់កណ្តាលខ្លួនស្លាប់អាណោចអាធ័ម ។ ហេតុការណ៍នេះកើតឡើងកាលពីម៉ោង១២ថ្ងៃត្រង់ ថ្ងៃទី២៣ ខែកញ្ញា ឆ្នាំ២០១៨ នៅចំណុចចំការស្វាយមួយ ស្ថិតក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ។
ប្រភពពីលោក រី ដារ៉ា អធិការស្តីទីស្រុកសាលាក្រៅឱ្យដឹងថា ជនរងគ្រោះខាងលើឈ្មោះ ភាង ភួង ភេទប្រុស អាយុ២១ឆ្នាំ ជាកម្មករស៊ីឈ្នួលធ្វើចំការស្វាយឱ្យជនជាតិបារាំងម្នាក់ មានស្រុកកំណើតនៅភូមិទួលវិហារ ឃុំរាយប៉ាយ ស្រុកកងមាស ខេត្តកំពង់ចាម ។
បើតាមប្រភពព័ត៌មានឱ្យដឹងថា មុនកើតហេតុ គេឃើញម្ចាស់ត្រាក់ទ័រខាងលើបានបើកត្រាក់ទ័រដឹកសម្ភារ:យកទៅដាក់នៅតាមចំការស្វាយ។ ពេលបើកត្រឡប់មកផ្ទះវិញក៏ឈប់ចតត្រាក់ទ័រទុកនៅក្នុងចំការមួយភ្លែត រួចក៏ដើរទៅហូបបាយនៅក្នុងរោងក្បែរនោះដោយមិនបានពន្លត់ម៉ាស៊ីននោះទេ ។ មួយសន្ទុះក្រោយមកយុវជនម្នាក់ដើរសំដៅទៅកន្លែងត្រាក់ទ័រនោះ បន្ទាប់មកក៏ឮសូរសំឡេងត្រាក់ទ័ររោទិ៍យ៉ាងខ្លាំង ដោយសង្ស័យក៏នាំគ្នាទៅមើលស្រាប់តែឃើញត្រាក់ទ័រក្រឡាប់កិនមនុស្សស្លាប់នៅក្រោមកង់ខាងក្រោយតែម្តង ។ ភ្លាមៗនោះត្រូវម្ចាស់ត្រាក់ទ័រយកត្រាក់ទ័រមួយគ្រឿងទៀតទៅអូសទាញចេញពីប្រឡាយ ដើម្បីយកសពជនរងគ្រោះផងដែរ ។
លោកអធិការស្ដីទីបន្តថា ក្រោយពីយកសពចេញពីក្រោមកង់ត្រាក់ទ័ររួច កម្លាំងជំនាញរបស់លោកបានពិនិត្យឃើញថា ជនរងគ្រោះពិតជាបើកបរមិនមានការប្រុងប្រយ័ត្ន បណ្ដាលឱ្យធ្លាក់ចូលក្នុងប្រឡាយក្រឡាប់ស្លាប់បែបនេះ ។ ហើយបច្ចុប្បន្នសពជនរងគ្រោះត្រូវបានសមត្ថកិច្ចជំនាញប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើតខេត្តកំពង់ចាមហើយ ៕
ចែករំលែកព័តមាននេះ