រាជធានីភ្នំពេញ ៖ ក្រសួងទេសចរណ៍បានចេញនូវសេចក្តីណែនាំមួយទៅមន្ទីរទេសចរណ៍រាជធានី-ខេត្តទាំងអស់ ស្តីពីការពង្រឹងការពារសន្តិសុខ សុវត្ថិភាពដល់ភ្ញៀវទេសចរដែលមកទស្សនាកម្សាន្តនៅព្រះ រាជាណាចក្រកម្ពុជា ។ យោងតាមសេចក្តីណែនាំនេះ ក្រសួងបានកត់សម្គាល់ថា វិស័យទេសចរណ៍គឺជាវិស័យអាទិភាពដ៏សំខាន់មួយក្នុងការជំរុញសេដ្ឋកិច្ច-សង្គម…
រាជធានីភ្នំពេញ ៖ ក្រសួងទេសចរណ៍បានចេញនូវសេចក្តីណែនាំមួយទៅមន្ទីរទេសចរណ៍រាជធានី-ខេត្តទាំងអស់ ស្តីពីការពង្រឹងការពារសន្តិសុខ សុវត្ថិភាពដល់ភ្ញៀវទេសចរដែលមកទស្សនាកម្សាន្តនៅព្រះ រាជាណាចក្រកម្ពុជា ។
យោងតាមសេចក្តីណែនាំនេះ ក្រសួងបានកត់សម្គាល់ថា វិស័យទេសចរណ៍គឺជាវិស័យអាទិភាពដ៏សំខាន់មួយក្នុងការជំរុញសេដ្ឋកិច្ច-សង្គម ដោយបាននាំមកនូវចំណូលដល់ជាតិ ផ្តល់ឱកាសការងារ និងរួមចំណែកកាត់បន្ថយភាពក្រីក្ររបស់ប្រជាពលរដ្ឋប្រកបដោយប្រសិទ្ធភាព ។ ជាក់ស្តែង ក្នុងឆ្នាំ២០១៧កន្លងមកនេះ កម្ពុជាទទួលបានទេសចរអន្តរជាតិចំនួន៥,៦លាននាក់ កើនឡើង១១,៨% និងទទួលបានចំណូលជូនជាតិជាង៣,៦ពាន់លានដុល្លារ រួមចំណែកប្រមាណ១២%នៃផលិតផលក្នុងស្រុកសរុប និងបង្កើតឱកាសការងារជូនប្រជាពលរដ្ឋ ដោយផ្ទាល់ចំនួន៦៥ម៉ឺននាក់ ។
ក្រសួងទេសចរណ៍បានបញ្ជាក់ថា នៅក្នុង រយៈពេល៦ខែដើមឆ្នាំនេះ ភ្ញៀវទេសចរអន្តរជាតិដែលមកទស្សនាកម្សាន្តក្នុងប្រទេសកម្ពុជាមានប្រមាណជាង៣លាននាក់ កើនឡើង១៣% បើធៀបនឹងគ្រាដូចគ្នាឆ្នាំ២០១៧ ក្នុងនោះមានភ្ញៀវទេសចរចិនច្រើនជាងគេ ឈរនៅលំដាប់ខ្ពស់ក្នុងចំណោមភ្ញៀវទាំង១០ប្រទេស (Top ១០ ) ។ អនុរដ្ឋលេខាធិការក្រសួងទេសចរណ៍ លោកហោ សារុន បានថ្លែងថា ដើម្បីបង្ការ និងធានាសន្តិសុខ និងសុវត្ថិភាពភ្ញៀវទេសចរ ជាពិសេសភ្ញៀវទេសចរចិន ក្រសួងទេសចរណ៍បានណែនាំដល់គ្រប់មន្ទីរទេសចរណ៍ រាជធានី-ខេត្ត ឲ្យខិតខំយកចិត្តទុកដាក់ខ្ពស់លើបញ្ហាសន្តិសុខ និងសុវត្ថិភាពភ្ញៀវទេសចរ ដែលមកទស្សនាកម្សាន្តក្នុងព្រះរាជាណាចក្រកម្ពុជា ។
លោកបន្ដថា ចំណុចសំខាន់ៗនៃសេចក្តីណែនាំរបស់ក្រសួង រួមមាន ត្រូវតាមដានរាល់ព័ត៌មាន និងសេចក្តីជូនដំណឹងពីអាកាសធាតុ ក្នុងករណីមានខ្យល់ព្យុះ ខ្យល់កន្ទ្រាក់ ភ្ញៀវធ្លាក់ខ្លាំង ទឹកជំនន់ ឬគ្រោះធម្មជាតិផ្សេងៗ ដែលអាចបង្កគ្រោះថ្នាក់ ដល់ភ្ញៀវទេសចរ និងជាពិសេសម្ចាស់ទូកម៉ាស៊ីនដឹកភ្ញៀវទេសចរ ។ ទន្ទឹមនោះ ត្រូវយកចិត្តទុកដាក់ត្រួតពិនិត្យមធ្យោបាយដឹកជញ្ជូនទេសចរណ៍ (ផ្លូវទឹក ផ្លូវគោក ផ្លូវដែក ) ត្រូវមានសោភ័ណភាព គុណភាព ផាសុកភាព និងមានសម្ភារសង្គ្រោះពេល មានគ្រោះថ្នាក់ ។ ត្រូវមានស្លាកសញ្ញាសុវត្ថិភាព និងសញ្ញាគ្រោះថ្នាក់ផ្សេងៗទៀត នៅតាមតំបន់ រមណីដ្ឋាននានាជាភាសាខ្មែរ អង់គ្លេស និងភាសាទី៣( យោងសារាចរណែនាំលេខ០០៤ សរណន ចុះថ្ងៃទី២៩ ខែមិនា ឆ្នាំ២០១៨)។ ចំណែកម្ចាស់មូលដ្ឋានអាជីវកម្ម សេវាកម្មទេសចរណ៍ ត្រូវមានបំពាក់នូវប្រព័ន្ធសុវត្ថិភាពឲ្យបានត្រឹមត្រូវទៅតាមកម្រិតស្តង់ដា (បំពង់ពន្លត់អគ្គិភ័យ កាមេរ៉ាសុវត្ថិភាព ច្រកសុវត្ថិភាព ជាដើម) ។ ត្រូវមានវិធានការការពារ និងត្រៀមទុកជាមុននូវសម្ភារបឋម ដើម្បីជួយដល់ភ្ញៀវទេសចរនៅពេលជួបនូវគ្រោះថ្នាក់ដែលអាចកើតមានឡើងជាយថាហេតុ ។
មន្ទីរទេសចរណ៍ត្រូវធ្វើការណែនាំដល់ទីភ្នាក់ងារ និងការីទេសចរណ៍មិនត្រូវរៀបចំខ្សែ ទស្សនកិច្ចទៅកាន់ទីកន្លែងណា ដែលមានហានិភ័យខ្ពស់ ជាពិសេសសម្រាប់ភ្ញៀវទេសចរជនជាតិចិន ។ ត្រូវមានលេខទូរស័ព្ទសម្រាប់ទំនាក់ទំនងបន្ទាន់នៅពេលដែលភ្ញៀវទេសចរជួបគ្រោះថ្នាក់ផ្សេងៗ ។
ដោយឡែកចំពោះអ្នកវិនិយោគបរទេសដែលមករកស៊ីទទួលទានរយៈពេលវែងនៅកម្ពុជាមានបំណងចង់បើកបររថយន្តដោយខ្លួនឯងលើផ្លូវថ្នល់ក្នុងព្រះរាជាណាចក្រកម្ពុជាត្រូវមានប័ណ្ណបើកបរកម្ពុជាតាមមធ្យោបាយពីរយ៉ាង គឺត្រូវប្រឡងយកប័ណ្ណបើកបរដូចប្រជាពលរដ្ឋខ្មែរដែរ ហើយត្រូវយកប័ណ្ណបើកបររបស់ប្រទេសខ្លួនមកប្តូរយកប័ណ្ណបើកបរកម្ពុជា ដោយដាក់ពាក្យសុំនៅក្រសួងសាធារណការនិងដឹកជញ្ជូន ។ ក្នុងករណី ប័ណ្ណបើកបរមិនសរសេរជាភាសាអង់គ្លេស ឬភាសាបារាំងត្រូវបកប្រែជាភាសាខ្មែរ ឬភាសាអង់គ្លេស ឬភាសាបារាំង ដោយមានការបញ្ជាក់ទទួលស្គាល់ពីស្ថានទូត ឬទីស្ថានកុងស៊ុល ឬស្ថានរបស់បេសកកម្មរបស់ខ្លួន ។
ចំពោះជនបរទេសដែលកាន់ប័ណ្ណបើកបរអន្តរជាតិ « International Driving Permit» ដោយអនុលោមតាមអនុសញ្ញាទីក្រុងវីយ៉ែន ឆ្នាំ១៩៤៩ ឬឆ្នាំ១៩៦៨ អាចបើកបររថយន្តនៅលើ ផ្លូវថ្នល់ក្នុងព្រះរាជាណាចក្រកម្ពុជាបាន ប៉ុន្តែត្រូវភ្ជាប់មកជាមួយនូវប័ណ្ណបើកបរជាតិរបស់ជន បរទេសនោះ ៕
ចែករំលែកព័តមាននេះ