ខេត្តស្វាយរៀង ៖ ខណៈពេលដែលកាកសំណល់ និងសំរាមកំពុងក្លាយជាបញ្ហាចោទមួយ នៅកម្ពុជា វិនិយោគិនបរទេសជាបន្ដបន្ទាប់បានមកសិក្សា និងបោះទុនវិនិយោគសាងសង់រោងចក្រកែច្នៃកាកសំណល់ និងសំរាមនេះឲ្យទៅជាផលិតផលសម្រាប់បម្រើឲ្យសេចក្ដីត្រូវការក្នុងស្រុក ។ ជាក់ស្ដែង…
ខេត្តស្វាយរៀង ៖ ខណៈពេលដែលកាកសំណល់ និងសំរាមកំពុងក្លាយជាបញ្ហាចោទមួយ នៅកម្ពុជា វិនិយោគិនបរទេសជាបន្ដបន្ទាប់បានមកសិក្សា និងបោះទុនវិនិយោគសាងសង់រោងចក្រកែច្នៃកាកសំណល់ និងសំរាមនេះឲ្យទៅជាផលិតផលសម្រាប់បម្រើឲ្យសេចក្ដីត្រូវការក្នុងស្រុក ។ ជាក់ស្ដែង ក្រុមហ៊ុនដែលមានបទពិសោធន៍លើការកែច្នៃសំរាមរបស់ប្រទេសជប៉ុន បានប្រកាសបោះទុនវិនិយោគសាងសង់រោងចក្រនៅខេត្តស្វាយរៀង ។
នៅក្នុងជំនួបជាមួយលោក ម៉ែន វិបុល អភិបាលខេត្តស្វាយរៀង កាលពីថ្ងៃទី២០ កញ្ញា កន្លងមក លោក YUSUKE OKUMURA នាយកក្រុមហ៊ុន GOMI RECYCLE 110 CO.,LTD និងលោក Yasuhara តំណាងអង្គការ JICA បានលើកឡើងថា ដោយមានការគាំទ្រពីរាជរដ្ឋាភិបាលកម្ពុជា ក៏ដូចជារដ្ឋបាលខេត្ត បច្ចុប្បន្ននេះក្រុមហ៊ុនបានត្រៀមនាំចូលរថយន្តដឹកសំរាម និងសង់រោងចក្រនៅទីតាំងដែលក្រុមហ៊ុន និងរដ្ឋបាលខេត្តស្វាយរៀង បានជ្រើសរើសរួចមកហើយនោះ ។
លោក YUSUKE OKUMURA នាយកក្រុមហ៊ុន GOMI RECYCLE 110 CO.,LTD បានលើកឡើងពីវឌ្ឍនភាពនៃការអនុវត្តគម្រោងនេះ និងស្នើសូមឲ្យរដ្ឋបាលខេត្តបន្ដជួយសហការដើម្បីអនុវត្តកិច្ចការដែលនៅសេសសល់ឲ្យសម្រេចបានលទ្ធផលស្ថាពរនាពេលខាងមុខ ។ ជាមួយនេះ លោកក៏បានថ្លែងអំណរគុណចំពោះការគាំទ្រ និងសហការជាមួយក្រុមហ៊ុនពីថ្នាក់ដឹកនាំខេត្ត ទើបធ្វើឲ្យក្រុមហ៊ុនរបស់លោកឈានមកដល់សម្រេចលទ្ធផលគួរជាទីមោទនៈ នាពេលនេះ ។
លោក ម៉ែន វិបុល អភិបាលខេត្ត ក្នុងឱកាសនោះ ក៏បានថ្លែងអំណរគុណចំពោះក្រុមហ៊ុនដែលបានជ្រើសរើសការវិនិយោគនៅក្នុងខេត្តស្វាយរៀង ហើយលោកបានប្ដេជ្ញាបន្តគាំទ្រ និងសហការតទៅទៀត ដើម្បីឲ្យគម្រោងនេះសម្រេចបានលទ្ធផលជោគជ័យ១០០% ។
លោកអភិបាលខេត្តមានប្រសាសសន៍ថា ៖« ការបង្កើតរោងចក្រកែច្នៃសំរាមទៅជាផលិតផល សម្ភារសំណង់និងគ្រឿងសង្ហារិមនេះ មិនត្រឹមតែបានផ្ដល់ការងារធ្វើបន្ថែមជូនប្រជាពលរដ្ឋខេត្តស្វាយរៀងប៉ុណ្ណោះទេ ប៉ុន្តែក៏ចូលរួមលើកកម្ពស់អនាម័យបរិស្ថាន និងសោភ័ណទីក្រុង គាំទ្រទៅដល់ផែនការរបស់រដ្ឋបាលខេត្តក្នុងការជំរុញលទ្ធភាពនៃការប្រឡងប្រណាំងទីក្រុងស្អាតនាពេលខាងមុខផងដែរ »។
ជាមួយនេះ ដើម្បីសម្របសម្រួលកិច្ចការនានាដែលនៅសេសសល់ ជាពិសេសពាក់ព័ន្ធនឹងរថយន្តដឹកសំរាម និងការសាងសង់រោងចក្ររបស់ក្រុមហ៊ុននេះ លោកអភិបាលខេត្តបានចាត់ឲ្យមានមន្ត្រីទទួលធ្វើការពិភាក្សា និងសហការជាមួយក្រុមហ៊ុនបន្តទៀតទៅលើចំណុចលម្អិតនានាដែលគាំទ្រ និងជំរុញកិច្ចការនេះឲ្យសម្រេចលទ្ធផលជោគជ័យល្អប្រសើរតាមការគ្រោងទុក។
គួរកត់សម្គាល់ផងដែរ កាលពីថ្ងៃទី១៣ សីហា កន្លងមក វិនិយោគិនចិនបានបោះទុនប្រមាណ៣០០លានដុល្លារ ដើម្បីសាងសង់រោងចក្រកែច្នៃសំរាមលើផ្ទៃដីជាង៣០ហិកតា នៅស្រុកស្ទឹងហាវ ខេត្តព្រះសីហនុ ។
បើតាមតំណាងក្រុមហ៊ុនវិនិយោគចិន លោក សុំ ពិសិដ្ឋ បានលើកឡើងថា កិច្ចការមួយនេះ ប្រសិនជាគ្មានការរាំងស្ទះណាមួយទេ ក្រុមការងារនឹងចាប់ផ្ដើមដំណើរការសាងសង់រោងចក្រនៅចុងឆ្នាំនេះ ដោយត្រូវចំណាយពេលសាងសង់ចំនួន២ឆ្នាំ និងចាប់ផ្តើមដំណើរការសាកល្បងជំហានដំបូងនៅឆ្នាំ២០២១ ។
លោកបានអះអាងថា ៖« ចំពោះប្រភពសំណល់ដែលយកមកកែច្នៃ គឺមានក្រុមហ៊ុនដៃគូមួយជាអ្នកទទួលប្រមូលពីខេត្តនានាក្នុងប្រទេសកម្ពុជាដោយមិនមានការនាំចូលសំណល់ពីប្រទេសក្រៅឡើយ »។
អគ្គនាយកនៃអគ្គនាយកដ្ឋានគាំពារបរិស្ថាននៃក្រសួងបរិស្ថាន លោក ហេង ណារ៉េត បានមានប្រសាសន៍ថា បើសិនជាគម្រោងនេះប្រមូលយកសំរាមតែនៅក្នុងស្រុកសម្រាប់កែច្នៃ ខាងក្រសួងសូមស្វាគមន៍និងសាទរចំពោះកិច្ចការនេះ តែហាមដាច់ខាតនូវការនាំចូលកាកសំណល់ពីក្រៅប្រទេសមកកែច្នៃក្នុងស្រុក ។
លោកថ្លែងថា ៖« យើងសាទរចំពោះ គម្រោងបង្កើតរោងចក្រកែច្នៃនៅទីនោះ តែសូមឲ្យប្រមូលសំរាមក្នុងស្រុកកែច្នៃ ព្រោះបច្ចុប្បន្ននេះយើងក៏កំពុងតែមានបញ្ហាប្រឈមរឿងសំរាមនេះដែរ ។ ដូចយើងឃើញស្រាប់ សំរាមក្នុងស្រុកយើងត្រូវបានយកចាក់ចោល និងមិនទាន់មានការកែច្នៃណាមួយឡើយ » ៕
ចែករំលែកព័តមាននេះ