ជឿថាមានប្រេតទេ?
ប្រាកដជាមាន នេះបើអាងលើគម្ពីរពុទ្ធសាសនាដែលមានជាអនេកបរិយាយស្រាយបំភ្លឺពីបញ្ហាក្រុមប្រេតនេះយា៉ងពិស្តារក្រៃណាស់ ដូចក្នុងតិរោកុឌ្ឌេសូត្របង្ហាញជាសក្ខីកម្មថា តិរោកុឌ្ឌេសុ តិត្ថន្តិ សន្ធិ…ពួកប្រេតទាំងឡាយមកហើយ កាន់ផ្ទះនៃញាតិដោយគិតថាជាផ្ទះរបស់ខ្លួន រមែងឈរនៅត្រង់ផ្លូវបែកជាពីរ បែកជាបី ផ្លូវបែកជាបួន ខ្លះឈរនៅក្បែរជញ្ជាំងផ្ទះ ខ្លះឈរនៅនឹងក្បាលជណ្តើរ ខ្លះស្ថិតនៅក្បែរបង្អួច ខ្លះឈរចាំនៅក្នុងរបងវត្ត…រង់ចាំទទួលអាហារពីញាតិ ។ ព្រោះតែវត្ថុតាងទាំងអស់នោះហើយ បានជាក្នុងពិធីកម្មផ្សេងៗ សូម្បីតែយួរចង្ហាន់មួយស្រាក់ទៅប្រគេនលោក ក៏សាមីទានឧទ្ទិសកុសលទៅប្រេតជាញាតិរបស់ខ្លួនដែរ ។ ព្រោះហេតុនោះ គួរបរិស័ទទាំងឡាយចេញដំណើរទៅជួបប្រេតជាញាតិដែលកំពុងរង់ចាំនៅវត្តអារាមក្នុងថ្ងៃភ្ជុំបិណ្ឌ ពិសេសនៅថ្ងៃវេនដាក់បិណ្ឌទី១នេះ ដែលជាថ្ងៃពិសេសនៃបុណ្យកាន់បិណ្ឌដំបូង ។
តាមចំណាំនៅថ្ងៃកាន់បិណ្ឌវេនទី១ឃើញប្រជាពុទ្ធបរិស័ទតាមចំណុះជើងវត្តនីមួយៗមូលមីរដេរដាសយកចង្ហាន់ និងគ្រឿងសក្ការៈគ្រប់សារពើមានមុខឆ្ពោះទៅទីអារាមរៀងៗខ្លួនដោយទម្លាក់ចោលការងារមួយអន្លើសិនឆ្លៀតឱកាសទៅធ្វើបុណ្យទានយា៉ងសស្រាក់សស្រាំដើម្បីឧទ្ទិសកងការមហាកុសលទៅបុព្វការីជនដែលបានស្លាប់ទៅ ព្រោះមានជំនឿថា ប្រេតជាញាតិរបស់ខ្លួនកំពុងរង់ចាំទទួលអាហារនៅទីនោះទាំងការស្រេកឃ្លានបំផុត ។
បិណ្ឌភ្ជុំមានរយៈពេល១៥ថ្ងៃ ដែលអាចចាត់ថាជាពិធីធំ និងមានវេលាយូរជាងបណ្តាបុណ្យនានាលើកលែងតែកឋិនទាន ។ នៅក្នុងអំឡុងបិណ្ឌភ្ជុំនេះដែរ គេឃើញមានពិធីមួយទៀតលេចធ្លោផងដែរ គឺការបោះបាយបិណ្ឌ ដែលជាទីពេញនិយមសម្រាប់ក្រុមយុវវ័យច្រើនជាងមនុស្សចាស់ពេលម៉ោងប្រហែល៣រំលងអធ្រាត្រ បានបណ្តើរគ្នាទាំងក្រុមទាំងហ្វូងទៅបោះបាយបិណ្ឌដោយគំនិតថា នឹងបានដល់ប្រេតជាញាតិរបស់ខ្លួនកំពុងចាំទទួល។ តែថាការធ្វើទានក្នុងទីងងឹតរបៀបនេះប្រឈមនឹងហានិភ័យច្រើន ព្រោះបើប្រេតមែនទែននោះមិនថ្វីទេ មិនចេះធ្វើបាបមនុស្ស តែគួរឱ្យខ្លាចបំផុតចំពោះក្រុមមនុស្សធ្វើប្រេត ឬមនុស្សមានចិត្តគំនិតដូចប្រេត ឬក៏និយាយឱ្យចំគឺក្រុមសង្គមងងឹតតែម្តង ដែលនៅច្របូកច្របល់ក្នុងហ្វូងមនុស្សនោះដែរ ។ ក្រុមនេះហើយដែលច្រើនបង្កបញ្ហាទាញទឹកចិត្តម្ចាស់ទានឱ្យល្អក់កករ តាមរយៈការលួច ឆក់ ឬកេងចំណេញ…ធ្វើឱ្យម្ចាស់ទានក្តៅឆេវមួយរំពេច ខ្ពុបបុណ្យអស់ ដូច្នេះគួរប្រយ័ត្នផង ។
ទាក់ទងនឹងបញ្ហានេះ មានការចោទសួរថា តើពិធីបោះបាយបិណ្ឌនេះធ្វើឡើងទៅតាមលំអានអ្វី តាមបែបលិទ្ធិសាសនា ឬធ្វើទៅតាមទម្លាប់ ? មានមតិលើកឡើងដ៏ចម្រូងចម្រាសជាច្រើនទាំងផ្នែកពុទ្ធចក្រ និងអាណាចក្រ មានទាំងសរសើរផង និន្ទាផង។ ខ្លះថា បោះបាយបិណ្ឌជាការខ្ជះខ្ជាយស្បៀងអាហារ ខ្លះថាដឹកនាំបុណ្យបញ្ច្រាសទិស ខ្លះថាជាការថែរក្សាប្រពៃណីវប្បធម៌ឱ្យគង់វង្ស ខ្លះថាធ្វើទៅតាមទិដ្ឋិរបស់អាចារ្យដើម្បីច្បាមយកលាភ…នេះគ្រាន់តែជាមតិមជ្ឈដ្ឋាន តែបើតាមការពិនិត្យជាក់ស្តែង ពិធីនេះធ្វើឡើងតាមរបៀបពុទ្ធសាសនាខ្លះ និងតាមបែបទម្លាប់ខ្លះ ។
ហេតុផលត្រង់ថា ពេលទៀបភ្លឺឃើញបរិស័ទយកពំនូតបាយបិណ្ឌលាយដោយវត្ថុច្រើនមុខប្រកបដោយរសយា៉ងពិសេសទាំងថាស ទាំងល្អី និងគ្រឿងបរិក្ខារផ្សេងៗមានធូប ទៀន ផ្កាភ្ញីជាដើមទៅតម្កល់នៅចំពោះមុខសង្ឃ ហើយអាចារ្យដឹកនាំសូត្រធម៌វេរឧទ្ទិសផលបុណ្យផ្សាយទៅប្រេតជាញាតិ…ការរៀបចំចាត់ចែងពិធីកម្មបែបនេះគឺធ្វើត្រូវតាមលំអានពុទ្ធសាសនាហើយ ។ បន្ទាប់ពីនោះមក អាចារ្យពីរបីនាក់ដឹកនាំបរិវារមួយអន្លើដោយពំនូតបាយខ្លះប៉ុនកដៃ ខ្លះប៉ុនកជើងតាមបំណងរបស់អ្នកធ្វើ ដែលគេនិយមហៅថាបាយបិណ្ឌទៅជាមួយផងមានមុខឆ្ពោះទៅព្រះវិហារ ហើយដើរប្រទក្សិណ និងបោះដុំបាយទាំងនោះទៅក្នុងទីផ្សេងៗដែលអារាមខ្លះមានធ្វើកន្លែងសម្រាប់បោះដុំបាយ តែអារាមខ្លះបោះពាសវាលពាសកាលពេញខឿនវិហារគួរឱ្យល្អើមបំផុតពេលដុំបាយទាំងនោះត្រូវទឹកភ្លៀងរីកពព្រៀក ។ ខ្លះបោះទៅក្នុងទីងងឹតដោយគំនិតថា ពួកប្រេតនៅឈរចាំទទួលអាហារក្នុងទីនោះ ខ្លះគប់ដាក់គ្នាយា៉ងរញ៉េរញ៉ៃទៅជារឿងលេងសេីចក៏មាន…ពិធីរបៀបនេះធ្វើឡើងទៅតាមទម្លាប់ ។
ជារួមមកបើទោះជាតាមទម្លាប់ក្តី ឬតាមរបៀបសាសនាក្តី ក៏សុទ្ធតែជាប្រយោជន៍ដល់មនុស្សជាតិ ប្រសិនបើអ្នកដឹកនាំពិធីឆ្លាតឈ្លាសវៃក្នុងការដឹកនាំ មិនគិតពីប្រយោជន៍ខ្លួនជាធំ ព្រោះបរិស័ទទាំងនោះជឿបុណ្យបាបណាស់ សម្តីអាចារ្យថាយា៉ាងមេ៉ច ប្រាកដជាធ្វើតាមយ៉ាងនោះហើយ។
ពិតណាស់ ពិធីកម្មទាំងឡាយបើចាត់ចែងទៅតាមរបៀបពុទ្ធសាសនាមិនបង្កការលំបាកសោះ គ្រាន់តែសប្បុរសយកចង្ហាន់ ឬទេយ្យវត្ថុដែលនាំទៅនោះតម្កល់នៅចំពោះមុខព្រះសង្ឃ និងប្រគេនលោកដោយសេចក្ដីគោរព ហើយស្របគ្នានឹងការប្រគេននោះក៏ត្រូវឧទ្ទិសផលបុណ្យចំពោះសាច់ញាតិដែលស្លាប់ទៅឱ្យចំៗឈ្មោះ ឬថាញាតកាទាំង៧សន្តានរួមតែម្តងក៏បាន ផលទាននេះនឹងទៅដល់ពួកញាតិជាប្រេត ហើយរួចចាកអត្តភាពជាប្រេតក្នុងខណៈនោះភ្លាម ។
ទស្សនៈនេះមិនមែនជាការរារាំង ឬហាមឃាត់សប្បុរសទាំងឡាយ ដែលនិយមគប់បាយបិណ្ឌទេ ធ្វើក៏ធ្វើចុះមិនអត់ប្រយោជន៍ឡើយ ព្រោះថាជាកុសលទានមួយដែលសង្គ្រោះដល់សត្វតិរច្ឆានគ្រប់ប្រភេទរាប់តាំងឆ្កែ ឆ្មា ស្រមោច សង្អារទៅ ដែលតាមទ្រីស្តីពុទ្ធសាសនាថា ធ្វើទានចំពោះសត្វតិរច្ឆានបានបុណ្យមួយរយអត្តភាព ។ ប៉ុន្ដែការធ្វើទានក្នុងទីងងឹតបែបបោះបាយបិណ្ឌនេះប្រឈមនឹងហានិភ័យច្រើនណាស់ពិសេសយុវតីគួរប្រយ័ត្នផង ។ ក្នុងសកម្មភាពដ៏ច្របូកច្របល់បែបនេះ ចៀសមិនផុតពីវត្តមានក្រុមមនុស្សទុច្ចរិតនៅជាមួយដែរទេ ពួកនេះសម្លឹងរំពៃមើលរបស់ទ្រព្យដែលនៅជាប់នឹងខ្លួនអ្នកទាំងឡាយ ឱ្យតែហ៊ានធ្វេសតែបន្តិចបើមិនបាត់ទូរស័ព្ទ ក៏ហិនកាបូបលុយដែរ ដែលករណីបែបនេះកើតមានជាច្រើនមកហើយ ៕
ចែករំលែកព័តមាននេះ