រាជធានីភ្នំពេញ ៖ ក្រុមជនសង្ស័យលួចប្រដាប់ដោយអាវុធចំនួន២នាក់បានដកកាំភ្លើងបាញ់ចំនួន២គ្រាប់ ពេលដែលធ្វើសកម្មភាពចូលលួចម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១២ បានសម្រេច ហើយត្រូវបានម្ចាស់ដេញតាមទាន់ និងបំរុងស្ទុះទៅវាយក្រុមជនសង្ស័យទាំងនោះ ។ ទោះបីជាយ៉ាង ពុំបណ្តាលអោយមនុស្សណាម្នាក់រងរបួសឡើយ ហើយក្រុមជនសង្ស័យមានគ្នា២នាក់បានជិះម៉ូតូដែលពួកគេជិះធ្វើសកម្ម
ភាពនោះរត់គេចខ្លួនបាត់ស្រមោល ចោលម៉ូតូដែលលួចបាននោះ។
ហេតុការណ៍ផ្ទុះអាវុធនេះបង្កអោយមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី២៤ ខែកញ្ញា ឆ្នាំ ២០១៨ នៅចំណុចផ្លូវលេខ១០៧ ក្នុងភូមិទួលសំពៅ សង្កាត់ទួលសង្កែទី១ ខណ្ឌឬស្សីកែវ ។
ជនរងគ្រោះជាម្ចាស់ម៉ូតូឈ្មោះ គង់ គីម ភេទប្រុស អាយុ២៩ឆ្នាំ ជាមន្ត្រីរាជការ មានលំនៅ តាមផ្លូវលេខ៥៩៨ ក្បែរស្ថាននីយ៍ទូរទស្សន៍ប៉ុស្តិ៍លេខ៣ ក្នុងភូមិ ពោងពាយ សង្កាត់ទួលសង្កែ២ ខណ្ឌឬស្សីកែវ ។
តាមព័ត៌មានអោយដឹងថា នៅមុនពេលកើតហេតុ ជនសង្ស័យមានគ្នា២នាក់ ជិះម៉ូតូមួយគ្រឿង មិនចាំម៉ាក បានធ្វើសកម្មភាពលួចម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១២ ពាក់ស្លាកលេខ ភ្នំពេញ ១BX-១០៧៣ បានសម្រេច ពេលម្ចាស់ចតទុកនៅក្រោយផ្ទះ ។
តាមប្រភពដដែលបានបន្តថា នៅពេលធ្វើសកម្មភាពលួចជិះម៉ូតូចេញ ម្ចាស់ឃើញទាន់ ក៏បានហៅម៉ូតូឌុបនៅក្បែរនោះជិះចេញតាមពីក្រោយ ដោយពុំបានស្រែកអោយភ្ញាក់ផ្អើលនោះទេ ។
នៅពេលបុរសជាម្ចាស់ម៉ូតូជិះម៉ូតូឌុបដេញតាមក៍បានរាយការណ៍ប្រាប់នគរបាលមូលដ្ឋាន អោយជួយស្ទាក់ផងដែរ ។
តាមព័ត៌មានអោយដឹងទៀតថា នៅពេលដែលជនសង្ស័យជិះម៉ូតូដែលលួចបានទៅដល់ ចំណុចខាងជើងអតីតភោជនីយដ្ឋានបុប្ជារាជធានីក៏បានឈប់ និងអង្គុយលើម៉ូតូជាមួយបក្សពួកម្នាក់ទៀត ។ ភ្លាមនោះម្ចាស់ម៉ូតូក៍បានទៅទាន់ ហើយក៍ចុះពីលើម៉ូតូឌុបដើរតម្រង់ក្នុងគោលបំណងស្ទុះទៅវាយជនសង្ស័យដែរ តែជនសង្ស័យម្នាក់បានឃើញទាន់ ក៏ដកកាំភ្លើង បាញ់តម្រង់១គ្រាប់ តែសំណាងល្អមិនត្រូវ ។
បន្ទាប់ពីផ្ទុះអាវុធ ជនសង្ស័យម្នាក់នោះក៍បានរត់ឡើងជិះម៉ូតូបក្សពួកគេចខ្លួន និងបាញ់មួយគ្រាប់ទៀតគំរាម រួចជិះម៉ូតូគេចខ្លួនបាត់ ចោលម៉ូតូដែលលួចបាននោះ ។
តាមព័ត៌មានអោយដឹងទៀតថា ភ្លាមៗនោះបង្កអោយមានការភ្ញាក់ផ្អើលយ៉ាងខ្លាំង ហើយម៉ូតូ និងម្ចាស់ត្រូវបាននគរបាលប៉ុស្តិ៍ទួលសង្កែ២នាំទៅសាកសួរ និងដាក់ពាក្យបណ្តឹង ។ នេះចាត់ទុកជាសំណាងល្អមួយ ដែលក្រុមជនសង្ស័យបាញ់តម្រងម្ចាស់ម៉ូតូតែមិនត្រូវ ៕
ចែករំលែកព័តមាននេះ