ខេត្តស្វាយរៀង ៖ ជប៉ុនមើលឃើញគំនរសំរាមនៅក្រុងបាវិតក៏ដូចជានៅក្រុងស្វាយរៀងមានច្រើនពាសពេញក្នុងរណ្តៅ និងហៀចេញមកក្រៅនាំឲ្យប៉ះពាល់ដល់សុខុមាលភាពប្រជាពលរដ្ឋ ហើយរាជរដ្ឋាភិបាលបានចំណាយថវិកាជាច្រើនសម្រាប់ធ្វើអនាម័យសំអាតសំរាមនេះ ។
នាពេលថ្មីៗនេះអាជ្ញាធរខេត្តស្វាយរៀងបានទទួលជួបពិភាក្សាជាមួយលោក YUSUKE OKUMURA នាយកក្រុមហ៊ុន GOMI RECYCLE 110 CO.,LTD (ប្រទេសជប៉ុន) និងលោក Yasuhara តំណាងអង្គការ JICA និងសហការី ពាក់ព័ន្ធទៅនឹងការគ្រប់គ្រងរថយន្តដឹកសំរាម និងការសាងសង់រោងចក្រកែច្នៃសំរាមទៅជាគ្រឿងសំណង់ និងគ្រឿងសង្ហារិមក្នុងទឹកដីខេត្តស្វាយរៀង ។
ពាក់ព័ន្ធទៅការបង្កើតរោងចក្រកែច្នៃសំរាមអោយទៅជាគ្រឿងសំណង់ និងគ្រឿងសង្ហារិមនេះតំណាងក្រុមហ៊ុនហាយប្រ៊ីដដែលកំពុងតែប្រតិបត្តិការប្រមូលសំរាមនៅទីប្រជុំជនក្រុងបាវិតបានថ្លែងថា សព្វថ្ងៃសំរាមនៅក្រុងបាវិតក្នុងមួយថ្ងៃប្រមាណពី១២០ទៅ១៧០តោន ដូច្នេះបើមានក្រុមហ៊ុនកែច្នៃសំរាមមកវិនិយោគនោះក្រុមហ៊ុនលោកស្វាគមន៍ជានិច្ច ព្រោះរាល់ថ្ងៃខណៈដែលដឹកសំរាមដល់ទីលានចាក់សំរាមត្រូវចំណាយថវិការជួលកម្មករឲ្យដុតសំរាមចោលទៀត ។
ប្រភពពីតំណាងក្រុមហ៊ុនហាយប្រ៊ីដបានថ្លែងបន្តទៀតថា រថយន្តដែលត្រូវដឹកសំរាមរបស់ក្រុមហ៊ុនមាន១៩គ្រឿង និងកម្មករប្រមាណជិត៥០នាក់ដែលកំពុងធ្វើប្រតិបត្តិការប្រមូលសម្រាមនៅក្រុងបាវិត ហើយកាលពីមុនក្នុងមួយថ្ងៃមានសំរាមតែ៧០ទៅ៩០តោនប៉ុណ្ណោះតែនៅឆ្នាំ២០១៨នេះសំរាមកើនដល់ពី១២០ទៅ១៧០តោនក្នុងមួយថ្ងៃដូច្នេះមានការកើនឡើងច្រើនជាងមុនដោយសារកំណើនរបស់ប្រើប្រាស់ និងគ្រឿងហូបចុកតាមរោងចក្រ កាស៊ីណូ និងតាមផ្ទះប្រជាពលរដ្ឋកើនឡើងពីមួយថ្ងៃទៅមួយថ្ងៃ ។
បើតាមតំណាងក្រុមហ៊ុននេះក៏បានបង្ហាញសុដិ្ឋនិយមថា ក្រុមហ៊ុនប្រមូលសំរាមរបស់លោក និងសហការជាមួយក្រុមហ៊ុនជប៉ុនដែលមានបំណងមកបង្កើតរោងចក្រកែច្នៃសំរាមនេះ ហើយក៏បានសំណូមពរឲ្យក្រុមហ៊ុនសំរាមនេះ មកបង្កើតរោងចក្រអោយកៀកនឹងទីលានចាក់សំរាម ដើម្បីងាយស្រួលប្រមូលសំរាមយកទៅកែច្នៃផងដែរ ។
សូមបញ្ជាក់ថា បើតាមការប្រជុំពិភាគសាររវាងអាជ្ញាធរខេត្ត និងក្រុមហ៊ុនកែច្នៃសំរាមនេះអាជ្ញាធរខេត្ត ក្នុងនាមរដ្ឋបាលខេត្តនៅតែបន្តគាំទ្រ សហការតទៅមុខទៀតដើម្បីឲ្យគម្រោងនេះសម្រេចបានលទ្ធផលជោគជ័យ ១០០% ព្រោះថា ការបង្កើតរោងចក្រកែច្នៃសំរាមទៅជាផលិតផលសម្ភារសំណង់ និងគ្រឿងសង្ហារិមនេះ មិនត្រឹមតែបានផ្ដល់ការងារធ្វើបន្ថែមជូនប្រជាពលរដ្ឋខេត្តស្វាយរៀងប៉ុណ្ណោះទេ ប៉ុន្តែក៏ចូលរួមលើកកម្ពស់អនាម័យ បរិស្ថាន និងសោភ័ណទីក្រុង គាំទ្រទៅដល់ផែនការរបស់រដ្ឋបាលខេត្តក្នុងការជំរុញលទ្ធភាពនៃការប្រឡងប្រណាំងទីក្រុងស្អាតនាខាងមុខ ។ រីឯមហាជនរស់នៅក្រុងបាវិតសំណូមពរសូមឲ្យក្រុមហ៊ុនហាយប្រ៊ីដប្រមូលសំរាមឲ្យបានលឿនជាងនេះកុំទុកសំរាមឲ្យនៅយូថ្ងៃពេកពីព្រោះជារដូវភ្លៀង ៕
ចែករំលែកព័តមាននេះ