រាជធានីភ្នំពេញ ៖ ដោយសារជម្លោះរឿងកន្លែងទុកកង់ សន្តិសុខម្នាក់ដែលខ្វះធម៌ខន្តីបានស្ទុះទៅដាល់នារីអ្នកធ្វើអនាម័យម្នាក់មួយដៃចំភ្នែក បណ្តាលឱ្យជាំរហូតមានការប្តឹងទារសំណងចំនួន២ពាន់ដុល្លារ ។ ប៉ុន្តែដោយសារគ្មានលុយបង់សំណង បុរសជាសន្តិសុខនេះ ក៏ត្រូវសម្ថកិច្ចចាប់ដាក់ខ្នោះ ។…
រាជធានីភ្នំពេញ ៖ ដោយសារជម្លោះរឿងកន្លែងទុកកង់ សន្តិសុខម្នាក់ដែលខ្វះធម៌ខន្តីបានស្ទុះទៅដាល់នារីអ្នកធ្វើអនាម័យម្នាក់មួយដៃចំភ្នែក បណ្តាលឱ្យជាំរហូតមានការប្តឹងទារសំណងចំនួន២ពាន់ដុល្លារ ។ ប៉ុន្តែដោយសារគ្មានលុយបង់សំណង បុរសជាសន្តិសុខនេះ ក៏ត្រូវសម្ថកិច្ចចាប់ដាក់ខ្នោះ ។
ករណីហិង្សានេះ កើតឡើងកាលពីវេលាម៉ោង៩ និង៣០នាទីព្រឹកថ្ងៃទី២៣ ខែកញ្ញា នៅចំណុចភោជនីយដ្ឋាន «តេប៉ាក់» ស្ថិតនៅចំណុចកែងរវាងផ្លូវលេខ៤៣២ និងផ្លូវលេខ១៨៧ ក្នុងសង្កាត់ទំនប់ទឹក ខណ្ឌចំការមន ។ ប្រភពព័ត៌មានពីនគរបាលឱ្យដឹងថា នារីរងគ្រោះឈ្មោះ ធា ស្រីពេជ្រ អាយុ២២ឆ្នាំ ជាអ្នកធ្វើអនាម័យ នៅភោជនីយដ្ឋានខាងលើ ស្នាក់នៅផ្ទះជួលក្នុងភូមិចំរើនផល សង្កាត់ស្ទឹងមានជ័យ២ ខណ្ឌមានជ័យ ។ចំណែកឯបុរសសន្តិសុខជាជនដៃដល់ឈ្មោះ រម្យ សារុន អាយុ២៧ឆ្នាំ យាមនិងស្នាក់នៅក្នុងភោជនីយដ្ឋានខាងលើដែរ និងមានស្រុកកំណើតនៅភូមិក្រយា ឃុំក្រយា ស្រុកសន្ទុក ខេត្តកំពង់ធំ ។
មុនពេលកើតហេតុ នារីរងគ្រោះបានជិះកង់មួយគ្រឿង ចេញពីផ្ទះមកកាន់កន្លែងធ្វើការ នៅក្នុងភោជនីយដ្ឋាន ហើយយកកង់ទៅទុកនៅក្បែរមាត់ទ្វារផ្ទះបាយខាងក្រោយ រួចដើរចូលទៅក្នុង ។ ពេលនោះ បុរសជាសន្តិសុខបានដើរទៅប្រាប់នាងឲ្យយកកង់ទៅទុកនៅខាងមុខវិញ ដើម្បីងាយស្រួលខ្លួនមើលការខុសត្រូវ និងខ្លាចក្រែងចោរលួចបាត់ ព្រោះកន្លងមកធ្លាប់បាត់កង់ម្តងរួចមកហើយ ។ ប៉ុន្តែនាងមិនព្រមយកទៅទុកខាងមុខឡើយ ដោយបានចាក់សោទុកនិងទទួលខុសត្រូវដោយខ្លួនឯង ក៏មានការជជែកតឹងសរសៃកដាក់គ្នាទៅវិញទៅមក ។
ប្រភពព័ត៌មានបន្តថា ដោយទប់កំហឹងមិនបាន បុរសជាសន្តិសុខរូបនេះ ក៏ស្ទុះទៅដាល់នាងមួយដៃចំភ្នែកខាងឆ្វេងបណ្តាលឱ្យបែកឈាមសន្លប់បាត់ស្មារតីតែម្តង ។ ក្រោយកើតុហេតុ ទាំងនារីរងគ្រោះនិងបុរស
ជាសន្តិសុខដៃដល់ ត្រូវបាននាំខ្លួនទៅកាន់ប៉ុស្តិ៍នគរបាលទំនប់ទឹក ហើយភាគីនារីរងគ្រោះបានដាក់ពាក្យបណ្តឹងទាមទារសំណងជំងឺចិត្តចំនួន២ពាន់ដុល្លារ ។ ប៉ុន្តែដោយជនដៃដល់គ្មានលុយបង់សំណងទើបបញ្ជូនបន្តទៅអធិការដ្ឋាននគរបាលខណ្ឌចំការមនទៀត ។
សុភាសិតខ្មែរបានទូន្មានថា ខឹងខុស ខឹងខូច ខឹងខាត ជាការល្អបំផុតដែលគ្រប់គ្នាទប់កំហឹងបាន ទោះក្នុងស្ថានភាពបែបណាក៏ដោយ ។
ចែករំលែកព័តមាននេះ