រាជធានីភ្នំពេញ ៖ មន្ត្រីនគរបាលប៉ុស្តិ៍កាកាប១មួយរូប ខណៈកំពុងឈរសម្រួលការកកស្ទះចរាចរណ៍នៅលើដងផ្លូវ ស្រាប់តែងងឹតមុខ រួចដួលស្លាប់ភ្លាមៗនៅកណ្ដាលថ្នល់ ត្រង់ចំណុចដែលតែងមានកកស្ទះរាល់ថ្ងៃនោះ ។ ទោះជាយ៉ាងណា ដោយមិនអស់ចិត្ត មន្ត្រីនគរបាលរួមការងារ បានដឹកបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកពោធិ៍ចិនតុងភ្លាមៗ ប៉ុន្តែពេលទៅដល់គ្រូពេទ្យបានប្រាប់ថា គាត់ស្លាប់បាត់ទៅហើយ ។
ហេតុការណ៍នេះ កើតឡើងកាលពីវេលាម៉ោង១១ព្រឹកថ្ងៃទី២២ ខែកញ្ញា នៅតាមមហាវិថីសហព័ន្ធរុស្ស៊ី ត្រង់ចំណុចជិតក្រុមហ៊ុនស្រាបៀរអង្គរ ស្ថិតក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ ។ ជនរងគ្រោះឈ្មោះ នូវ បូរិន អាយុជាង៥០ឆ្នាំ មានឋានន្តរស័ក្តិអនុសេនីយ៍ទោ និងមានទីលំនៅក្នុងភូមិចំការឪឡឹក សង្កាត់កាកាប១ ។
មន្ត្រីនគរបាលមួយរូបឲ្យដឹងថា នៅព្រឹកថ្ងៃនោះ រូបលោករួមនឹងមន្ត្រីនគរបាលរួមការងារជាច្រើនរូប
ទៀត បានទៅសម្រួលចរាចរណ៍នៅចំណុចខាងលើ ដែលចរាចរណ៍មានភាពមមាញឹកយ៉ាងខ្លាំង មិនតែប៉ុណ្ណោះក៏ឈរក្រោមកម្ដៅថ្ងៃខ្លាំងទៀតផង ។ លុះនៅម៉ោងប្រមាណ១១ព្រឹក ស្រាប់តែលោក នូវ បូរិន ងងឹតមុខដួលផ្ងារក្រោយស្លាប់ភ្លាមតែម្ដង ។ ទោះជាយ៉ាងណា ដោយសារតែមិនអស់ចិត្តថាគាត់ស្លាប់ មន្ត្រីនគរបាលរួមការងារបានប្រញាប់ប្រញាល់ដឹកបញ្ជូនទៅកាន់មន្ទីរពេទ្យបង្អែកពោធិ៍ចិនតុងដើម្បីសង្គ្រោះបន្ទាន់ ប៉ុន្តែពេលទៅដល់គ្រូពេទ្យប្រាប់ថា លោក នូវ បូរិន ស្លាប់បាត់ទៅហើយ ។
ប្រភពដដែលបន្តថា កាលពីមុនលោកអនុសេនីយ៍ទោ នូវ បូរិន ជាមន្ត្រីនគរបាលនៅខេត្តបាត់ដំបង ហើយលោកទើបតែផ្លាស់មកបម្រើការងារនៅប៉ុស្តិ៍នគរបាលរដ្ឋបាលកាកាប១ បានរយៈពេលជាង៣ខែប៉ុណ្ណោះ ។ លោកបានចុះសម្រួលចរាចរណ៍ដែលតែងមានការកកស្ទះនៅត្រង់ចំណុចខាងលើ រួមជាមួយមន្ត្រីនគរបាលប៉ុស្តិ៍ជាមួយគ្នាជារៀងរាល់ថ្ងៃ ដីម្បីសម្រួលដល់ការធ្វើដំណើររបស់ប្រជាពលរដ្ឋ និងមន្ត្រីរាជការទូទៅ ដែលធ្វើដំណើរឆ្លងកាត់តាមមហាវិថីសហព័ន្ធរុស្ស៊ីនេះ ជាពិសេសក្បួនគណៈប្រតិភូជាតិ-អន្តរជាតិផងដែរ ។ ពេលនេះស្រាប់តែលោកជួបគ្រោះអកុសលដួលស្លាប់បែបនេះ ពិតជាគួរឲ្យសោកស្ដាយពន់ពេក ហើយក៏សូមចូលរួមរំលែកទុក្ខជាមួយគ្រួសារសពផងដែរ ។
មរណភាពរបស់លោក នូវ បូរិន ធ្វើឲ្យមានការចាប់អារម្មណ៍ពីសំណាក់មហាជន និងថ្នាក់ដឹកនាំកំពូលៗ ។ ជាក់ស្ដែង សម្ដេចតេជោនាយករដ្ឋមន្ត្រី ហ៊ុន សែន ក៏បានចូលរួមឧបត្ថម្ភថវិកាចំនួន១០លានរៀល លោក ស សុខា រដ្ឋលេខាធិការក្រសួងអប់រំ យុវជន និងកីឡាចំនួន១លានរៀល និងលោក ឃួង ស្រេង អភិបាលរាជធានីភ្នំពេញចំនួន២លានរៀល និងថវិកាផ្ទាល់ខ្លួន១លានរៀលទៀត ។ ថវិកាទាំងអស់នេះត្រូវបានលោក ហែម ដារិទ្ធិ អភិបាលខណ្ឌពោធិ៍សែនជ័យ នាំយកទៅប្រគល់ជូនគ្រួសារសព។
ចែករំលែកព័តមាននេះ