ខេត្តបាត់ដំបង ៖ សមត្ថកិច្ចបានឱ្យដឹងថា ជនមិនស្គាល់មុខចំនួន២នាក់ បានចូលលួចគោរបស់ប្រជាពលរដ្ឋចំនួន៥ក្បាល តែមិនបានសម្រេច កើតឡើងនៅវេលាម៉ោង១រំលងអធ្រាត្រឈានចូលថ្ងៃទី២៤ កញ្ញា ដែលស្ថិតនៅភូមិប៉ោយស្វាយ ឃុំតាគ្រាម ស្រុកបាណន់ ។
សមត្ថកិច្ចបានឲ្យដឹងទៀតថា សត្វគោទាំង៥ក្បាល់នោះ ជារបស់ឈ្មោះចម ឃើន ភេទប្រុស អាយុ៥៨ឆ្នាំ រស់នៅចំណុចកើតហេតុខាងលើ។ ជនមិនស្គាល់មុខនោះ បានលួចដឹកគោទាំង៥ក្បាលនោះ ដែលម្ចាស់បានចងនៅក្បែរផ្ទះ តែត្រូវឈ្មោះឈឿន សុខា ហៅជុក ភេទប្រុសអាយុ៣៦ឆ្នាំ ប្រទះឃើញទាន់ ក៏ស្រែកឆោឡោផ្អើលពេញភូមិ ធ្វើឲ្យជនសង្ស័យទាំង២នាក់នោះ រត់គេចខ្លួនបាត់ទាំងកណ្ដាលអធ្រាត្រតែម្ដង។
ឈ្មោះឈឿន សុខា ហៅជុក ក៏បានប្រាប់សមត្ថកិច្ចថា ពេលនោះខ្លួនចុះបត់ជើង ទើបប្រទះឃើញមនុស្ស
២នាក់កំពុងដឹកគោឪពុកខ្លួនចេញពីផ្ទះ ។ ពេលនោះខ្លួនក៏បានស្រែកហៅឪពុកខ្លួន ធ្វើឲ្យចោរផ្អើលរត់ចោលគោតែម្ដង។
បើតាមសមត្ថកិច្ចបានបញ្ជាក់ថា សត្វគោទាំង៥ក្បាលនោះ មានមេធំ៣ក្បាល និងកូនតូច២ក្បាល។ ពួកចោរបានលួចគោនោះ មិនបានសម្រេចទេ ហើយពេលនេះសមត្ថកិច្ចកំពុងធ្វើការសួរនាំ ដើម្បីស្រាវជ្រាវរកមុខសញ្ញាដែលប្រព្រឹត្តបទល្មើសទាំងនោះហើយ៕
ចែករំលែកព័តមាននេះ