សត្វកន្ធាយក្បាលកង្កែប565ក្បាលត្រឡប់ទៅរស់នៅក្នុងធម្មជាតិវិញ
- ភ្នំពេញ
ខេត្តក្រចេះ ថ្ងៃទី១៩ កញ្ញា ២០១៨ ៖ អង្គការសមាគមអភិរក្សសត្វព្រៃ(WCS) សហការជាមួយរដ្ឋបាលជលផល Wildlife Reserve Singapore…
ខេត្តក្រចេះ ថ្ងៃទី១៩ កញ្ញា ២០១៨ ៖ អង្គការសមាគមអភិរក្សសត្វព្រៃ(WCS) សហការជាមួយរដ្ឋបាលជលផល Wildlife Reserve Singapore…
ខេត្តក្រចេះ ថ្ងៃទី១៩ កញ្ញា ២០១៨ ៖ អង្គការសមាគមអភិរក្សសត្វព្រៃ(WCS) សហការជាមួយរដ្ឋបាលជលផល Wildlife Reserve Singapore និងសម្ព័ន្ធដើម្បីការរស់រានប្រភេទសត្វអណ្តើក(Turtle Survival Alliance) បានលែងកូនសត្វកន្ធាយក្បាលកង្កែប (ឬរមិច) ដែលជាប្រភេទរងគ្រោះជិតផុតពូជនៅលើសាកលលោកចំនួន៥៦៥ក្បាលឱ្យទៅរស់នៅក្នុងទីជម្រកធម្មជាតិនៅតាមដងទន្លេមេគង្គវិញ ។ បានប្រមូលកូនកន្ទាយក្បាលកង្កែបដែលលែងនោះពីសំបុកការពារដោយសហគមន៍ដែលជាផ្នែកមួយនៃសកម្មភាពគម្រោង ។
កន្ទាយក្បាលកង្កែបស្ថិតនៅក្នុងបញ្ជីក្រហមរបស់អង្គការ LUCN ដែលជាប្រភេទរងគ្រោះជិតផុតពូជនៅលើសាកលលោក ខណៈចំនួនរបស់វានៅតែបន្តធ្លាក់ចុះគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ។ យើងបានគិតថា កន្ធាយក្បាលកង្កែបបានផុតពូជពីកម្ពុជាទៅហើយ រហូតដល់ឆ្នាំ២០០៧ គេបានរកឃើញវត្តមានពួកវាម្តងទៀតនៅក្នុងបរិវេណ៤៨គីឡូម៉ែត្រ នៅដងទន្លេមេគង្គខេត្តក្រចេះ និងខេត្តស្ទឹងត្រែង ។
លោកញូន ចន្ទី អ្នកសម្របសម្រួលគម្រោងអភិរក្សសត្វកន្ធាយក្បាលកង្កែបនៃអង្គការ WCSបាននិយាយថា ៖ការលែងកូនកន្ធាយក្បាលកង្កែបនេះ ធ្វើឡើងក្នុងគោលបំណងដើម្បីបង្កើនចំនួនសត្វកន្ធាយក្បាលកង្កែបរស់នៅក្នុងធម្មជាតិ ។
លោកញូន ចន្ទីរ បានបន្តថា៖«ការលែងកូនកន្ធាយក្បាលកង្កែបនេះក៏នឹងជួយបង្កើនប្រាក់ចំណូលសម្រាប់សហគមន៍ និងលើកទឹកចិត្តឱ្យពួកគាត់គាំទ្រ និងចូលរួមក្នុងការអភិរក្សប្រភេទសត្វនេះ ពីព្រោះគម្រោងនឹងបង់ប្រាក់ឱ្យសហគមន៍សម្រាប់ការយាម ថែរក្សា និងការពារសំបុកពងកូនសត្វកន្ធាយក្បាលកង្កែប ។
ចាប់តាំងពីឆ្នាំ២០០៧មក អង្គការសមាគមអភិរក្សសត្វព្រៃ(WCS) បានអនុវត្តគម្រោងអភិរក្សកន្ធាយក្បាលកង្កែប(កន្លងមកអនុវត្តដោយអង្គការអភិរក្សអន្តរជាតិ) ដោយសហការជាមួយរដ្ឋបាលជលផល និងសម្ព័ន្ធដើម្បីការរស់រានប្រភេទសត្វអណ្តើក ។ កម្មវិធីការពារសំបុកបានលើកទឹកចិត្តឱ្យប្រជាសហគមន៍រស់នៅខេត្តក្រចេះ និងស្ទឹងត្រែងចូលរួមការពារសត្វកន្ធាយក្បាលកង្កែប ដោយបានជ្រើសរើសអតីតអ្នកប្រមូលពង និងមេពូជកន្ធាយក្បាលកង្កែបឱ្យមកធ្វើការងារជាបុគ្គលិករបស់គម្រោងដើម្បីស្វែងរក និងការពារសំបុកសត្វកន្ធាយក្បាលកង្កែបជំនួសឱ្យការប្រមូលយកពង និងមេពូជសម្រាប់ហូប និងលក់ ។ ចាប់តាំងពីពេលនោះមក យើងបានការពារសំបុកពងកូនបានចំនួន៤០២សំបុក និងបានលែងកូនកន្ធាយក្បាលកង្កែបចំនួន៩០៤៧កូន ។
លោកអ៊ុក វិបុល ប្រធាននាយកដ្ឋានអភិរក្សជលផលនៃរដ្ឋបាលជលផលបាននិយាយថា៖«ការការពារដោយមានការចូលរួមពីអ្នកពាក់ព័ន្ធទាំងអស់ពិតជាចាំបាច់ណាស់ ដើម្បីថែរក្សាកន្ធាយក្បាលកង្កែបកុំឱ្យបាត់បង់ពីលើលោកយើងនេះ ។ ការប្រមូលយកពងកូន ឬចាប់យកមេបូជកន្ធាយក្បាលកង្កែបមកលក់ ឬធ្វើជាម្ហូបគឺជាអំពើខុសច្បាប់នៅក្នុងព្រះរាជាណាចក្រកម្ពុជា ។
លោកអ៊ុក វិបុល បានបន្តថា៖ សាធារណជនទាំងអស់អាចចូលរួមអភិរក្សសត្វកន្ធាយក្បាលកង្កែបកុំឱ្យបាត់បង់បានតាមរយៈការមិនទិញ និងបរិភោគសាច់ ឬពងសត្វកន្ធាយក្បាលកង្កែប ។
ការងារអភិរក្សសត្វកន្ធាយក្បាលកង្កែបទទួលបានការគាំទ្រពីម្ចាស់ជំនួយដូចជា Critical Ecosystem Partnership Fund (CEPF) អង្គការអភិរក្សអន្តរជាតិ Wildlife Reserve Singapore និងសម្ព័ន្ធដើម្បីការរស់រានប្រភេទសត្វអណ្តើក (Turtle Survival Alliance) ៕
ចែករំលែកព័តមាននេះ