រាជធានីភ្នំពេញ ៖ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសបានថ្លែងកាលពីថ្ងៃទី២១ ខែកញ្ញា ២០១៨ថា ជំនួយរបស់រដ្ឋាភិបាលសាធារណៈរដ្ឋប្រជាមានិតចិនបានជួយដល់ការពង្រឹងឯករាជ្យភាព និងរក្សាបានធិបតេយ្យនៃប្រទេសកម្ពុជា ។
ការលើកឡើងនេះនៅក្នុងពេលទទួលជួបលោក Xiong Bo ឯកអគ្គរដ្ឋទូតចិនជម្រាបលាលោកឧបនាយករដ្ឋមន្ត្រីនៅទីស្តីការក្រសួងការបរទេស ។ យោងតាមលោក កេត សុផាន់ អ្នកនាំពាក្យក្រសួងការបរទេសបានថ្លែងប្រាប់អ្នកសារព័ត៌មាន ក្រោយជំនួបថា លោកទូតចិនបានសំដែងការសោតស្តាយដែលលោកត្រូវបានចប់អាណត្តិក្នុងរយៈពេលខ្លីនៅកម្ពុជា តែត្រឹមរយៈពេល២ឆ្នាំ ។ លោកទូតលើកឡើងថា«ក្នុងរយៈពេល២ឆ្នាំខ្ញុំ បានសង្កេតឃើញថា មានការរីកចម្រើនលើគ្រប់វិស័យនៅកម្ពុជា» ។ ជាពិសេសវិស័យសេដ្ឋកិច្ចសង្គមដែលប្រទេសទាំងពីរបានសហការគ្នាក្នុងកម្រិត«ខ្សែក្រវ៉ាត់ និងផ្លូវ» ដែលជាគោលនយោបាយរបស់ចិន ។ ក្នុងនោះមានការផ្លាស់ប្តូរទស្សនកិច្ចយ៉ាងមមាញឹករបស់ថ្នាក់ដឹកនាំនៃប្រទេសទាំងពីរ ។ លោកទូតចិនបានលើកឡើងថា ក្នុងអាណត្តិរបស់លោកបានសម្របសម្រួលដល់ថ្នាក់ដឹកនាំនៃប្រទេសទាំងពីរបានបំពេញទស្សនកិច្ចទៅវិញទៅមក រហូតដល់ថ្នាក់ប្រមុខរដ្ឋ ។
កាលពីពេលថ្មីនេះលោកប្រធានាធិបតីចិនស៊ីជិនពីងបានរៀបចំការចូលគាល់ព្រះមហាក្សត្រនៅក្នុងទីក្រុងប៉េកាំង ក្នុងលក្ខណៈជាគ្រួសារតែមួយកម្ពុជា-ចិន ។ លោកឧបនាយករដ្ឋមន្ត្រីប្រាក់ សុខុន បានថ្លែងតបចំពោះការលើកឡើងរបស់សមភាគីចិនវិញថា លោកសូមកោតសសើរចំពោះបេសកកម្មការទូត រយៈពេល២ឆ្នាំ របស់លោក (Xiong Bo) នៅកម្ពុជាប្រកបដោយជោគជ័យ ។ ទោះបីរយៈពេលខ្លីក្តី តែការចាប់ផ្តើមនោះចប់ពេលដែលលោកប្រធានាធិបតីចិនមកបំពេញទស្សនកិច្ចនៅកម្ពុជា និងលោកនាយរដ្ឋមន្ត្រីចិនមកចូលរួមបើកប្រជុំកំពូលមេគង្គឡានឆាងនៅកម្ពុជា ។
លោកឧបនាយករដ្ឋមន្ត្រីបានលើកឡើងថា លោកសូមថ្លែងអំណរគុណចំពោះមិត្តចិត្តដែលបានសំរួលដល់ទស្សនកិច្ចរបស់ប្រតិភូកម្ពុជាដឹកនាំដោយសម្តេចតេជោ ហ៊ុន សែន នៅខេត្តណាន និងក្នុងពិព័រណ៍អាស៊ានចិនលើកទី១៥ ។ លោកថា«ខ្ញុំសូមអរគុណដល់ប្រទេសចិនដែលបានផ្តល់ជំនួយក្នុងការអភិវឌ្ឍសេដ្ឋកិច្ចសង្គម ដែលជំនួយទាំងនោះក៏បានពង្រឹងនូវតួនាទីនយោបាយកម្ពុជាក្នុងការរក្សានូវឯករាជ្យ និងអធិបតីភាពរបស់ខ្លួន » ។ លោកថា ឆ្នាំ២០១៨នេះ ជាខួបលើកទី៦០ឆ្នាំ នៃទំនាក់ទំនងការទូតកម្ពុជាចិន ប្រទេសទាំងពីរបានរៀបចំព្រឹត្តិការណ៍ធំៗមួយចំនួន ដើម្បីអបអរសាទរខួប៦០ឆ្នាំនេះ ដើម្បីបន្តរឹតចំណងសាមគ្គីភាពនៃប្រទេសទាំងពីរ ៕
ចែករំលែកព័តមាននេះ